1 Tegheletse imbuli aino mwemwe Waisiraeli, nene pfaniwadomboketsela,

2 Isi ya Isiraeli ighwa, isi ikalile ka ipinga mwali,

nayo ng'aitsakwinuka keli baye!

Kalekighwa kayeka mna isi yake,

wala haduhu hata munu wa ukwimwinula.

3 Kwaapfila IMNDEWA Imulungu kolonga apfino,

wanu elufu imwe wa ghumji watsolawa na watsoghenda kwitowa,

lekeni wanu miya imwe watsakuya wagima.

wanu miya imwe wa ghumji ghumwe watsakuka lekeni iwatsohona wanu kumi.

4 IMNDEWA Imulungu kowalongela apfino Waisiraeli,

"Mnibame namwe mtsokala wagima!

5 Lekeni mleke kughenda Beteli wala Giligali,

wala mleke kughenda Beeri Sheba,

kwaapfila iwanu iwokala Giligali watsoghalighwa kuna utumwa,

na ghumji ghwa Beteli ghutsohinyighwa."

6 Mbameni IMNDEWA namwe mtsokala wagima!

Mng'aleka ukutenda apfo, yeye katsowalambita iwelekighwa wa Yosefu na ghumoto,

nagho ghutsowalakatsa iwanu wa Beteli,

na kuduhu hata munu iyatsodaha kughutsima.

7 Mwemwe yamtenda ihaki iwe chinu cha usungu,

na imtenda ihaki yoneke si chinu baye.

8 Yeye yatsitendile tsinondo tsa Chilimila na Orioni,

iyotenda chilo chikulu chiwe nemitondo

na misi iwe chilo,

iyoghakema ghamatsi gha ibahali ghakale hamwe,

na iyoghalekelela mna isi inyalile,

IMNDEWA Imulungu lilyo litaghwa lyake.

9 Yeye yuyo iyowamalitsa wana tsingupfu na kuhinya tsingome tsawo.

10 Mwemwe mwomwihila imunu iyokembela, na mwombetsa ayula iyolongesa mna libalatsa.

11 Mwemwe mwowadidimitsa iwahingwa na mwowananahitsa walihe ngoto ng'ulu ya ingano,

lelo hata ka mtsenga tsing'anda tsa ghambawe gha bei ng'ulu,

lekeni ng'amtsokala amwo baye,

hata ka mlima mighunda inoghile ya minzabibu,

lekeni idipfai yake ng'amtsakunwa baye.

12 Kwaapfila nene nomanya pfamtotsile ng'ani,

na tsinzambi tsenu pfatsili nyingi,

mwemwe mwowadununza iwanu wana ihaki na mwobokela hongo,

na mowaghoma iwahinghwa waleke ukupata ihaki kuna libalatsa.

13 Apfo mna ghamatsuwa agho, imunu yana ihekima katsenyamala tulu,

kwaapfila agho ghatsakuwa matsuwa ghehile.

14 Mtende ighanoghile na si ghehile baye,

ili mkale wagima,

naye IMNDEWA iyana tsingupfu yamlongagha kahamwe na mwemwe,

yakale hamwe na mwemwe.

15 Mleke kunoghelwa na ighehile, Ila mnoghelwe na ighanoghile,

ghendeleleni ukulamla ghoya mna libalatsa,

songaha IMNDEWA katsowonela libatsi iwanu wa Yosefu iwalekighwe wagima.

16 Lelo apfino pfipfo pfayolonga IMNDEWA, IMNDEWA Imulungu yana tsingupfu tsose,

kutsakuwa na chililo mna chila nzila ng'ulu,

na mna chila chibwalu cha ukwitinganila, iwanu watsodomboketsa apfino, "Twochona! Twochona!

Iwanu iwolima watsokemighwa watse walile hamwe

na iwanu iwolihighwa iwadahile ukudomboketsa watsakutsa wadomboketse.

17 Iwanu watsodomboketsa mna imighunda ya minzabibu,

kwaapfila nene nitsobita haghatighati henu niwatowe.

Yanilonga apfo nene IMNDEWA."

18 Mtsochona mwemwe yamlilolela litsuwa lya IMNDEWA!

Hebali mlilolela litsuwa lya IMNDEWA?

Litsuwa alyo litsakuwa na chisi na si ghumwanga baye.

19 Itsakuwa ka imunu iyotsuma yampfuke isimba, kuya ketingana na dubu,

au ka imunu iyakwingila mng'anda mwake kuya keka ghumoko ghwake mwibanda na baho inzoka kamluma.

20 Angu litsuwa lya IMNDEWA ng'alitsakuwa na chisi, na si mwanga baye?

Ona, litsakuwa na chisi totolo, na ng'alitsakuwa na mwanga baye.

21 IMNDEWA kolonga apfino, "Ipfihungo pfenu pfonyihila na nopfibetsa,

na imitingano yenu ya ukunitambikila nene yonyihila.

22 Hata ka mtsonilapfila tsinambiko tsenu tsa ukulakatsighgwa na ipfijo,

nene sitsotsibokela baye,

na tsinambiko tsenu tsa ukukala tseghamba tsa wanyama iwanonile,

nene sitsotsilola ghendo baye.

23 sibama baye kuhulika litsi lya tsiwila tsenu,

na litsi lya ipfing'weng'we pfenu sitsohulikitsa baye.

24 Lekeni mleke ihaki ihulumke ka ghamatsi pfaghohulumka,

na uluso wenu uwe ka chikolongo ing'achinyala.

25 Mwemwe Waisiraeli, pfihi tsamnilapfila pfinu na nambiko,

hamkalile kunyika kwa miyaka arobaini?

26 Lekeni mwoduta ipfinyagho pfa Sakuti mfalume wenu, na mwoduta ipfinyagho pfa Kaiwani mulungu wenu wa tsinondo,

ipfinyagho pfamtendile mwemwe iwenyegho.

27 Apfo nitsowaghala kuna isi ya utumwa,

kutali kubita Damasko,

iyolonga apfo IMNDEWA,

litaghwa lyake kokemighwa Imulungu yana Tsingupfu Tsose."