1 Mtowe malati hako Siyoni,

mtowe imembe mne chidunda chenzeluke,

mdedeme mwemwe yamkala mne isi ya Yuda,

kwaapfila litsuwa lya kuhigha lye Imulungu lya habei ukupfika.

2 Litsuwa alyo litsakuwa na ichisi na chililo,

litsakuwa litsuwa lighubikighwe ne liwingu ne ichisi totolo.

Maasikali ka lipfunge likulu lye iwanzighe wa habehi ukutsa

ka ichisi ichitanda mne ipfidunda.

Chinu acho ng'ana chilawile bae

wala ng'achitsolawila keli bae mne lweleko lwose lukutsa.

3 Ka ghumoto pfaghulakatsa,

wohinya chila chinu ichili hambele hawo,

no kuleka chila chinu kuchughu cholakala,

hala ng'ana wapfose bae isi tsainogha ka ibostani ya Edeni,

lekeni wang'apfosa isi yakuwa mahame.

Kuduhu ichinu chochose ichidaha kulihepa.

4 Wakoneka ka falasi, wotsuma na

wopfingilila ka falasi we ng'ondo.

5 Hawoghulukaghuluka mne pfidanando pfe pfidunda,

woduma ka mituka ikweghighwa ne falasi,

wolambila ka imvulu isakale pfailambila mne ghumoto,

wakwoneka ka kingili lye iwanu ilighenda kune ing'ondo.

6 Wang'apfika habehi, iwanu wopfuka ghendo,

ipfihanga pfawo pfoyauka.

7 Wopfingilila ka iwamaasikali iwadahile kwitowa,

kuya wokwila mwibanda.

Wose wolumbilila woghenda hambele bila kulola kuchugho,

kuduhu hata yumwe iyohunduka na kwang'a nzila ingi.

8 Kuduhu yomkunughitsa miyaghe,

chila yumwe kang'a hanu hake.

Wopfosa hata hanu hane maasikali wane tsisilaha,

wala kuduhu ichidaha kuwaghoma.

9 Wopfingilila mne mibanda ye ghumji,

wotsipalamila tsing'anda no kwingila,

webenyetsa wengile mne ghamadilisha ka wahitsi.

10 Woitenda isi yose ighudeme hambele yawo,

mlanga namwo mwohighitsika.

Lutsuwa na lwetsi pfoghelighwa ichisi,

natso tsinondo tsoleka ukung'aika.

11 Imtwatsa Imulungu kalikemelela lipfunge lyake lye maasikali,

wa wengi ng'ani na wana ngupfu sideke,

yawomuhulikitsa ng'awopeteka bae.

Litsuwa lye Imulungu kulu ng'ani na lyoghuma wogha,

yuhi yatsodaha ukududumila?

12 Nene Imtwatsa Imulungu nolonga apfino, "Lekeni hata sambi,

mmbwihile kwa ghumoyo ghose,

kwo ukufunga, kwa ukulila na kwa ukudomboketsa.

13 Mleke ukudegha ghamabwende ghenu kulangusa ka mwona usungu,

ila mwone usungu mna imimoyo yenu."

Mmwihile IMNDEWA wenu.

Yeye kamluso na kana libatsi,

ng'asumkagha bae kwona maya, yeye ng'epfagha bae kutunoghela,

matsuwa ghose yeye koleka kutuhigha.

14 Songaa Imtwatsa Imulungu wenu katsotelehula,

naye komwing'ani ipfijo pfingi,

namwe mtsomlapfila yeye nambiko ye ipfijo na chokunwa.

15 Mkatowe malati mna chidunda Siyoni!

Muwalaghitse iwanu waleke ukuja,

muwalongele iwanu wetingane hamwe.

16 Wakemeni iwanu wose,

muwahopfughe iwanu wele.

Waghaleni tsinasekulu, na

muwakeme iwana,

na hata iwana iwoghwawa wose.

Wakemeni na awala iwekwelile sambi,

walawe mna pfumba pfawo.

17 Walongele Iwatambika, awala iwosang'ana hanu ha kutambikila,

na hane libani lye ing'anda ye Imulungu,

walile na walombe,

"Ghwee Imulungu wonele libatsi iwanu wako.

Uleke kuwaleka iwanu wangi

watubetse no kulonga,

‘Alikwani lelo Imulungu wawo?’"

18 Lelo Imulungu kainoghela isi yake,

na kawonela libatsi iwanu wake.

19 Imtwatsa Imulungu kawedika, kaweng'a ghawalombile, kalonga,

"Lelo nitsomwing'eni keli ipfijo, chokunwa na ghamafuta ghe mitseituni.

Sitsowatenda baye mbetsighwe keli ne iwanu we isi tsingi.

20 Nitsolilapfa lipfunge lye iwanzighe ililawa kasikazini,

nitsowatenda watsume mbaka kunyika,

awala iwalongole nitsowasa mne ibahali ya Shamu

na awala iwali kuchugho nitsowasa mne Ibahali ya Mediteraniya.

Kuko watsakufa, watsopfunda no kunung'a.

21 Ghwee isi uleke ukupfuka,

ila deng'elela na utowe lukenze

mana Imulungu katenda makulu.

22 Mleke ukupfuka mwee iwanyama,

ghumghina ghudegheta,

imibiki yolapfa ghamatunda ghake,

imitsabibu ne mitini yakweleka sideke.

23 Deng'eleleni mwemwe iwanu wa Siyoni,

mumtowele lukenze Imulungu, kwaapfila yeye kowaghalila imvula ya chila msimu,

imvula ye ghamasika ne imvula ya mlao ka pfayang'ali yotendagha.

24 Hanu ho kubetela hatsomema keli ipfilundo pfe pfijo,

na hanu ha kukamila hatsomema ghamafuta na dipfai.

25 Nitsowohitsila ipfinu pfose ipfijighwe ne iwanzighe kwa miyaka yose,

chila chinu ichijighwe ne pfidanukila ne balangulu,

nene iyaniwaghalile lipfunge alyo kulu.

26 Namwe mtsopata ipfijo pfingi, mtsakuja mbaka mwoleka,

na mtsolitunya taghwa lye Imulungu wenu,

yeye yawatendeleni pfinu pfa kukangawatsa.

Iwanu wangu ng'awotsobetsighwa keli bae.

27 Kuya mwemwe Waisiraeli mtsomanya ka nene na hamwe na mwemwe,

nene Imulungu iyo Imulungu wenu na kuduhu yungi.

Iwanu wangu ng'awotsombetseni keli bae.

28 "Nitsowaghalila ghumuwe ghwangu mna iwanu wose.

Iwana wenu iwamale ne iwapinga watsolonga mbuli tsangu,

tsina sekulu wenu watsolota tsindoto,

iwanenu iwalume ne iwapinga watsakona ipfinu ipfitsolawila.

29 Pfipfila nitsowaghalila ghumuhe ghwangu kwe iwatumwa wenu,

iwamale ne iwapinga.

30 Nitsotenda ipfinu pfa kukangawatsa mlanga na mne isi,

kutsakuwa na idamu, ghumoto na lihosi ilitanda ka wingu.

31 Lutsuwa lutsakuwa ne ichisi na

ghumwetsi ghutsakuwa mdung'u ka idamu.

Agha ghose ghatsolawila ng'ana litsuwa likulu na lokupfuka lye Imtwatsa Imulungu lipfike.

32 Aho iwanu wose iwatsolomba kwa taghwa lye Imulungu watsokombolighwa.

Kwaapfila mne chidunda cha Siyoni na Yerusalemu,

kutsakuwa ne iwanu iwatsohona,

ka pfanongile nene Imtwatsa Imulungu.

Awala waniwasaghule watsakuwa waghima."