1 Tsuwa limwe Imtwatsa Imulungu kamlongela, Yona imwana wa Amitai, 2 "Uke ughende Ninawi ghumji ghula mkulu, uwalonge iwanu kwaapfila nighona ghamatendo ghawo ghehile." 3 Lekeni Yona kalema kughenda kwayatumighwe ne Imtwatsa Imulungu. Tsakaghenda mne ghumji ghwa Yopa, kuko kalapfa sendi, kadina mne imeli iighenda isi ya kutali ya Tarisisi, ili amuhepe Imulungu.

4 Lekeni Imtwatsa Imulungu kaghala libeho kulu mne ibahali, inyahemu tsa ng'ulu ng'ani mbaka imeli tsaibama kubeneka. 5 Iwanu yawang'ali wosang'ana mne imeli tsawapfuka ng'ani, chila yumwe kamlilila imulungu wake yamwapfile. Baho wayasa imitsigho mne ibahari ili imeli iwe mbewe na ileke kutsama. Lekeni Yona tsakahulumka kune ichumba cha kuisi che imeli na kuko kawasa fofofo.

6 Imwimilitsi mkulu we imeli kampfika Yona kamlongela, "Ebali ghweghwe kowasa? Ulamke umlombe mulungu wako, songaa katsotwonela libatsi na kutuleka tuwe waghima."

7 Kuya, iwanu iwosang'ana mne imeli welongela, "Mtse twase tsisimbi tulole nani yatendile mbaka twoghaya pfino." Tsawatenda apfo, ne tsisimbi tsilamla Yona iyo iyatendile apfo. 8 Wamlongela Yona, "Utulongele sambi, yuhi yatendile mbaka twoghaya pfino? Utenda choni hano? Ulawile mne isi yachi? Likabila lyako nani?"

9 Yona kawedika, "Nene na Mueburaniya, nomtambikila Imtwatsa Imulungu, Imulungu wa kulanga, yalumbile isi ne ibahali." 10 Kuya Yona kaghendelela kulonga ka yang'ali yomuhepa Imtwatsa Imulungu.

Iwanu iwosang'ana mne imeli hawahulike agho wapfuka ng'ani, wamlongela, "Achi choni chautendile?" 11 Chipindi acho ibahali ing'ali itikuka sideke, apfo iwanu iwosang'ana mne imeli wamghutsa, "Tukutende choni ili inyahemu inyamale?"

12 Yona kawedika, "Mnyase mne ibahali, ne ibahali itsenyamala. Mana nene iye yanitendile mbaka inyahemu ino ilawile."

13 Waleka kumwasa mne ibahari, wegangamitsa kuikwegha imeli ipfike kumwani. Lekeni ng'awadahile bae, kwaapfila ibahali tsaing'ali ighendelela kutikuka. 14 Kuya wamlomba Imtwatsa Imulungu, walonga, "Ghwee Imtwatsa Imulungu, twokulomba, uleke kututenda tufe mne ghamatsi wala uleke kutwona ka twetwe iwo yatumuhonzile imunu yuno yafe! Ambe ghweghwe yutendile agha ghose ghalawile." 15 Baho wamsola Yona wamwasa mne ibahali, na bahala ibahali itikuke inyamala tulu. 16 Alino liwatenda iwanu iwosang'ana mne imeli wampfuke ng'ani Imtwatsa Imulungu, wamlapfila inambiko na welaghana kumsang'anila Imulungu.

17 Kuya Imtwatsa Imulungu kamghala isomba mkulu kammetsa Yona, naye kakala mne lida lya somba matsuwa madatu chilo na misi.