1 Kuya Imtwatsa Imulungu kalonga lwakeli na Yona. Kalonga, 2 "Ughende kune ghumji mkulu ghwa Ninawi, ukawapetele iwanu imbuli yanikulongele." 3 Apfo Yona kamuhulikitsa Imtwatsa Imulungu kaghenda Ninawi. Ghumji ghwa Ninawi tsa mkulu ng'ani. Imunu kobamighwa yaghende kwa matsuwa madatu mbaka kughumalitsa. 4 Yona tsakanga kwa misi imwe, kuya kengila mna ghumji ghwa Ninawi. Kandusa kuwalongela iwanu, "Ghang'ali matsuwa alubaini ghumji ghwa Ninawi ghutsohinyika."

5 Iwanu we Ninawi watoghola chayalongile Imulungu kubitila Yona. Apfo walamla waleke ukuja, ne iwanu wose kulawa iwakulu mbaka iwadodo wapfala ghamaghunila kulangusa ka watsileka nzambi tsawo.

6 Imndewa wa Ninawi hayahulike apfo, kenuka mne chighoda chake cha undewa, katsula maghwanda ghake gha undewa, kapfala maghunila na kuya kakala mne lipfu. 7 Tsakawapetela iwanu wa Ninawi imbuli ino, "Aghano malaghitso kulawa kuna nene imndewa ne iwakulu weyangu. Mleke kumleka imunu wala ing'ombe wala imnyama wowose wa kufughighwa yaje. Mleke kuwaleka waje wala ukunwa ichinu chochose. 8 Lekeni iwanu wose ne iwanyama wapfale ghamagunila. Chila imunu yamlombe Imulungu kwa ghumoyo ghwake ghose na yaleke kutenda ghehile ne yaleke ughobo. 9 Songaa Imulungu katsoleka kutenda ghabamile kutenda na kutwonela libatsi, na kuleka kutwonela maya, na ng'atutsokomighwa bae!"

10 Imulungu hayonile pfawatendile, na pfawalekile kutenda ghehile, kaleka chayabamile kutenda, kaleka kuwatowa ka pfayabamile.