1 Yona hayang'ali kamne lida lye isomba tsakamlomba Imtwatsa, Imulungu wake. 2 Kalonga,

"Ghwee Imulungu,

haning'ali nighaya,

nikukema,

naghwe kunyidika,

kulawa kutsimu, tsanikulilila,

naghwe kuhulika chililo changu.

3 Tsakunyasa hanu hane ghamatsi ighaghendese hasi,

haghatighati mwe ibahali,

ghamatsi mengi tsaghanipfingilila,

ghamawimbi ne ghamatsi ghaluta mchanya mwangu.

4 Tsanonga kunyasa kutali, ndeke kukala hambele yako,

ndeke kuyona keli Ing'anda yako yenzeluke.

5 Ghamatsi tsaghanitsila mchanya mwangu, na ghanilakila,

ibahali yose tsainitsunguluka,

imvulu ye ibahali tsainighubika mwitwi.

6 Tsanihulumka mbaka kuhisi kwapfanzile ipfidunda, mne *iisi ine mibani iindighwe ghamatsuwa ghose.

Lekeni ghweghwe, Imtwatsa Imulungu wangu kunilapfa mne lipondo alyo aku namghima.

7 Haning'ali nihila no ukufa

tsanikukumbuka ghweghwe, Imtwatsa Imulungu,

tsanikulomba,

naghwe tsakuhulika mne Ing'anda yako yenzeluke.

8 Iwanu iwotambikila pfinyagho pfa ughutsu,

woulema ghendo uluso waubama kuwatendela.

9 Lekeni nene nitsokwimbila wila wa kukutunya, nitsokulapfila nambiko

na kutenda achila chanilaghane naghwe.

Imtwatsa Imulungu iye yokombola."

10 Baho, Imtwatsa Imulungu kamlaghitsa isomba yamdeke Yona kumwani, naye katenda apfo.