Lucas 19

Yesu kakwingila Yerusalemu kwa kudeng’elelighwa

28 Yesu hamalitse kulonga apfo, kawalongolela kaghenda Yerusalemu. 29 Hapfikile habehi na Betifage na Betaniya, kune chidunda ichikemighwa Mitseituni, kawatuma iwanang’ina wake weli, 30 kawalongela, "Mghende mne tsikaye tsila tsamtsilola. Hamkwingila mna tsikaye atso, mtsomwona imwana we ipunda kohighwa, ng’ana yadinighwe ne imunu bae. Mumdohole mumghale hano 31 Imunu wowose ang’awaghutsa, ‘Ebali mwumdohola?’ Mumlongele, ‘Mtwatsa kombama.’ "

32 Na awala iwatumighwe waghenda wapfika ka Yesu pfawalongele. 33 Hawang’ali womdohola imwana we ipunda, iwenyegho wawaghutsa, "Ebali mwomdohola imwana we ipunda?"

34 Nawo wedika, "Mtwatsa kombama." 35 Kuya wamghala kwa Yesu, watandika maghwanda ghao mmughongo mwa imwana we ipunda wamdinitsa Yesu mchanya mwake. 36 Na hang’ali yoghenda, iwanu watandika maghwanda ghawo mnzila.

37 Hapfikile habehi na mhulumko ghwa chidunda cha Mitseituni, mtingano mkulu ghwe iwanang’ina wake wandusa kudeng’elela na kumtunya Imulungu kwa kukemelela, kwa aghala makulu ghawonile. 38 Walonga,

"Kebweda Imndewa iyakutsa kwa taghwa lye IMNDEWA!

Kulanga kukale tseghamba,

ne utunitso kuchanya kulanga!"

39 Mafarisayo wamwenga iwakalile mna mtingano ghula wamlongela Yesu, "Mlangulitsi, uwalonge iwanang’ina wako wenyamale!" 40 Yesu kawedika, "Nowalongela, hawano wang’enyamala, ghamabwe ghano ghatsolapfa litsi."