1 Kuya IMNDEWA kamlongela Musa na Aruni, 2 "Walongeleni Waisiraeli apfino, kuhisi kwe mmale wowose kung'alawa udusi, udusi awo iulawa womtenda yehe. 3 Imunu ayo kakwoneka keha hata ka udusi awo woghendelela kulawa au woleka kulawa. Apfi pfipfo immale iyolawa udusi pfayakwoneka keha. 4 Lusatsi lwolwose lyayowasila au chinu chochose chayokalila chakuwa chiha. 5 Imunu wowose iyodonza lusatsi lwa immale ayo, 6 au iyokalila chinu chochose chayakalile immale ayo, kobamighwa yatsapfe maghwanda ghake, kuya yoghe, naye katsakuwa keha mbaka nemihe. 7 Imunu wowose iyomdonza immale iyolawa udusi, kobamighwa yatsapfe maghwanda ghake kuya yoghe, naye katsakuwa keha mbaka nemihe. 8 Immale wowose iyolawa udusi yang'ambwalulila ghamate imunu, imunu ayula iyabwalulilighwe ghamate kobamighwa yatsapfe maghwanda ghake, kuya yoghe, naye katsakuwa keha mbaka nemihe. 9 Ichinu chochose chayokalila immale iyolawa udusi ahala hayomwendesa imnyama, nacho pfipfila chiha. 10 Imunu wowose iyochidonza ichinu chayakalile immale ayo, katsakuwa keha mbaka nemihe. Imunu wowose iyochighala chayakalile imunu ayo kobamighwa yatsapfe maghwanda ghake, kuya yoghe, naye katsakuwa keha mbaka nemihe. 11 Immale wowose iyolawa udusi yang'amdonza imunu aku ng'ahopfughe baye ghamoko ghake na ng'oghile baye, iyakindighwe katsakuwa keha mbaka nemihe. 12 Chiya chochose cha lidongo ichidonzighwe ne imunu iyolawa udusi chobamighwa chitulighwe. Lekeni chiya chochose ichitendighwe na libiki chobamighwa chihopfughighwe na ghamatsi."

13 "Immale yang'ahona ukulawa udusi yabete kwa ghamatsuwa saba mbaka haghopfika matsuwa gha ukutendighwa yele keli. Haghopfika ghamatsuwa agho yatsapfe maghwanda ghake, kuya yoghe mna ghamatsi ighalengele, naye baho kakuwa kela. 14 Litsuwa lya nane, yasole njiwa weli au makinda meli ghe njiwa, yawaghale hambele he IMNDEWA hane ghumlango ghwa Lihema lya ukwitinganila, na baho yamwing'e mtambika. 15 Mtambika katsowalapfa, yumwe yawe wa nambiko ya kuleghusa nzambi tsayatendile na yungi yawe wa nambiko ya ukulakatsighwa, kwa ukutenda apfo mtambika katsomlamlitsa ne IMNDEWA, na immale ayo kakuwa kela mna ukulawa kwake udusi."

16 "Immale wowose ka tsimbeghu tsake tsomlawa, yaloghetse lukuli lwose, naye katsokala keha mbaka nemihe. 17 Tsimbeghu tsing'alaghalila mna lighwanda au mna ghwanda lya ngotsi yoyose ila, alyo litsapfighwe kwa ghamatsi, nalyo lyakuwa liha mbaka nemihe. 18 Ka immale yang'awasa ne ipinga na tsimbeghu tsing'alawa, awo wose weli woghe, nawo watsokala weha mbaka nemihe."

19 "Ipinga wowose yang'awa mna ghamatsuwa ghake gha ukughenda kumto, katsakuwa keha kwa ghamatsuwa saba. Imunu wowose iyomkinda ipinga ayo, katsakuwa keha hambele he Imulungu mbaka nemihe. 20 Ichinu chochose chayokalila au chayowasila chakuwa chiha. 21 Imunu wowose iyodonza lusatsi lwake au ichinu chochose chayakalile ipinga ayo, yatsapfe maghwanda ghake kuya yoghe, naye kakuwa keha mbaka nemihe. 22 Imunu wowose iyodonza chinu chochose chayakalile ipinga ayo, yatsapfe maghwanda ghake kuya yoghe, naye kakuwa keha mbaka nemihe. 23 Imunu wowose iyatsodonza ichinu chochose chayawasile au chayakalile ipinga ayo, katsakuwa keha mbaka nemihe."

24 "Ka immale kanga ne ipinga ayo na idamu imlaghalila, immale ayo kakuwa keha kwa ghamatsuwa saba, na lusatsi lwolwose lwayawasile lwakuwa lwiha."

25 "Idamu ing'alumbilila kumlawa ipinga kwa ghamatsuwa mengi kubita pfailawagha au kolawa idamu matsuwa si ghake baye gha ukulawa idamu, ayo katsoghendelela kuwa keha ghamatsuwa ghose idamu haimlawa. 26 Lusatsi lyolyose lyayowasila au chighoda chochose chayokalila, chitsakuwa chiha ka pfaghali ghamatsuwa ghake gha ukughenda kumto. 27 Imunu wowose iyodonza ipfinu apfo, katsakuwa keha hambele he IMNDEWA na yahopfughe maghwanda ghake kuya yoghe, naye katsokala keha mbaka nemihe. 28 Ipinga ayo yang'amalitsa kughenda kumto, yakale kwa ghamatsuwa saba, na ghang'amala matsuwa agho, kakuwa kela. 29 Mna tsuwa lya nane yasole njiwa weli au makinda meli gha tetele yamghalile mtambika habei ne ghumlango ghwa Lihema lya ukwitinganila. 30 Mtambika yamlapfe yumwe yawe wa nambiko ya ukuleghusa nzambi tsayatendile na yungi yawe nambiko tsa ukulakatsighwa. Mtambika yang'atenda apfo, katsomlamlitsa ne IMNDEWA na komleghusila nzambi tsayatendile."

31 "Apfo muwakanye Waisiraeli wakale kutali ne ipfinu ipfiwatenda wehe, ili waleke kukomighwa mna ukwiya kwawo kwa kulitenda lihe Lihema lyangu lya ukwitinganila ilili mna wawo."

32 Aghano ghagho ghamalaghitso gheng'ighwe immale iyolawa udusi na ayula iyolawa tsimbeghu iyakuwa keha, 33 na kwa ipinga iyoghenda kumto na kuwa keha. Na immale au ipinga wowose iyolawa chochose na mmale iyowasa na ipinga yehile.