1 IMNDEWA kalonga, "Mleke kwitendela pfinyagho pfe milungu ya ughutsu, wala kwimitsa pfinyagho pfa kusongola, wala kwimitsa ingutso, wala mleke kwimitsa libwe lyolyose lila ilisongolighwe mna isi yenu, ili mpfinamile na kupfitambikila. Nene na IMNDEWA wenu. 2 Mghakindilise Ghamatsuwa ghangu gha kubwihila na mlipfuke Lihema lyangu Lienzeluke. Nene yuyo IMNDEWA."

3 "Mng'ategheletsa na kukinda malaghitso ghangu na imiko yangu yaniwalongele, 4 nitsowaghalila imvula ya chila msimu, isi itsakweleka ipfijo pfingi, na mibiki ili kumghunda itsakweleka ghamatunda ghake. 5 Ipfijo pfitsakuwa pfingi ghendo mbaka msimu ghwa ukupfuna ingano ghutsetingana na msimu ghwa kubawa tsinzabibu, na msimu ghwa kubawa tsinzabibu ghutsetingana na msimu ghwa kuhanda ingano. Mtsakuwa na pfijo bwelele, namwe mtsokala ghoya mna isi yenu."

6 "Nitsowatenda mkale tseghamba mna isi yenu, namwe mtsowasa aku ng'ampfuka chinu chochose baye. Nitsowalapfa iwanyama iwakali muisi na isi yenu ng'aitsakuwa na ng'ondo baye. 7 Mtsowawinga iwanu iwowehila na kuwakoma kwa lipanga. 8 Iwanu wenu watano watsowawinga iwanu miya imwe, iwanu wenu miya imwe watsowawinga iwanu elufu kumi. Iwanu iwowehila watsakughwa kwa lipanga hambele henu. 9 Nitsowalola kwa uluso mkulu na nitsowatenda mweleke iwana, nawo watsakongetseka. Nitsotenda achila chanilaghane na mwemwe. 10 Mwemwe mtsakuwa na pfijo bwelele mbaka ipfijo pfampfunile ghumsimu ghufosile mtsolapfa kunze ili mwike ipfijo pfampfuna sambi. 11 Na nene nitsokala namwe, wala sitsomlekani baye. 12 Nitsakwanga mghati mwenu na nitsakuwa Imulungu wenu namwe mtsakuwa wanu wangu. 13 Nene na IMNDEWA Imulungu, inili Imulungu wenu, yaniwalapfile mna isi ya Misiri ili mleke kuwa watumwa wa Wamisiri. Tsanilibena libiki lyamwohighwe msingo na niwatenda mwemwe mghende aku mghende wima."

14 "Lekeni ka ng'amnitegheletsa baye wala ng'amghakinda baye ghamalaghitso ghangu, 15 mng'ailema imiko yangu na mimoyo yenu ing'aghahila ghamalaghitso ghangu na mwolema ukutenda aghala ghatwilaghane ka mtsotenda, 16 na nene nitsotenda apfino, nitsowaghalila uwogha wa kwidukitsa, na chikololo ing'achihona, na lihoma ilitsowatenda muwe pfifita na muwe nyondenyonde. Mtsohanda hela mbeghu tsenu, kwaapfila iwala iwowehila iwo iwatsakuja chamuhandile. 17 Na nene nitsoweng'a chisogho, na iwanu iwowehila watsowatowa, mtsotawalighwa na awala iwomuhilani. Namwe mtsopfuka na kutsuma hata ka kuduhu imunu iyowawinga."

18 "Hata ka agha ghose ghalawila na mng'ali nga'mbama baye kunihulikitsa, nitsoghendelelagha kuwatowa mala saba kwa tsinzambi tsenu tsamtenda. 19 Nitsochilapfa ichidandali chenu ichiwatenda mwighode na nitsokutenda kulanga kuwe kukomu ka chuma na lidongo liwe komu ka shaba. 20 Tsingupfu tsenu tsitsakwagha hela ghendo, kwaapfila isi yenu ng'aitsomela baye ipfijo, na imibiki ihili mna isi yenu ng'aitsakweleka ghamatunda baye."

21 "Namwe mng'aghendelela kuleka kunihulikitsa, na mng'aghendelela kundema nitsowongetsela keli maghayo mala saba, ka nzambi tsenu pfatsili. 22 Na nene nitsoghala iwanyama wakali mghati mwenu, nawo watsowaboka iwana wenu na ukuja imifugho yenu, nene nitsowahungutsa muwe chidogho, apfo nzila tsenu tsitsakuwa tsahela wanu wa kutsibita."

23 Na ka ghamaghayo aghano ghamlawilani aku namwe ng'ambama baye kunihulikitsa wala kunihundukila, 24 nene mwenyegho nitsowehila na nitsowadununza mala saba kwa nzambi tsenu tsamtenda. 25 Nene nitsoghala ilipanga mna mwemwe, nalyo litsowatowa kwaapfila tsamlema ukutenda achila chatwilaghane. Na hamtsumila mna tsikaye tsenu mwikinge, nene nitsowaghalila utamu ing'auhona mbaka iwanu iwowehila watsowaghogha na woweka mna ghamoko ghawo. 26 Ichijo chenu nitsochihungutsa mbaka wapinga kumi watsakwambika pfighate pfawo pfose mna chikong'o chimwe. Nawo watsowagholela pfighate kwa kulinga mna minzani, namwe mtsakuja lekeni ng'amwighuta.

27 Ka agha ghose ghomlawilani lekeni mwemwe ng'amnihulika baye na mwoghendelela kunihila, 28 na nene nitsowonela maya na nitsowabela. Nitsowongetsela keli ghamaghayo ghawe mala saba kwa nzambi tsenu tsamtenda. 29 Nzala yenu itsakuwa ng'ulu mbaka mtsowaja iwana wenu iwamale ne wapinga. 30 Nitsopfihinya ipfidunda pfenu pfa kutambikila milungu, nitsohahinya hanu henu hamdusulila upfumba, na notsasa tsimauti tsenu mchanya mwa pfinyagho pfa milungu yenu. Na nene nitsowahila ghendo. 31 Tsikaye tsenu nitsotsilakatsa, na hanu henu ha kutambikila nitsohatenda hawe hachuwa, na ipfijo pfamndapfile pfilakatsighwe, ng'apfitsoninung'ila ghoya baye. 32 Nitsoihinya isi yenu mbaka iwanu iwowehila iwatsakutsa kukala amwo wakangawale. 33 Nitsowatenda mwemwe mtowighwe na lipanga namwe mtsopwililika mna tsiisi tsa wanu wangi. Isi yenu itsokala uchuwa na tsikaye tsenu tsitsakuwa mahame.

34 Mwemwe hamtsakuwa mna ghamoko gha iwehile wenu, isi itsoghadeng'elela ghamatsuwa ghake gha kubwihila baho hakutsakuwa na uchuwa. Isi itsobwihila na kudeng'elela ghamatsuwa ghake gha kubwihila. 35 Ghamatsuwa ghose hakutsakuwa na uchuwa, isi itsobwihila mbwihilo ing'aghupatile baye mna ghamatsuwa ghenu gha kubwihila hamng'ali mkala amwo.

36 Na wayenu wala iwahonile iwali mna tsiisi tsa wanu wangi nitsowatenda wawe na wogha mkulu mmoyo mwawo hata lutsani iluhighisighwa na libeho lutsowatenda watsume. Watsotsuma ka wowingighwa na munu yane lipanga na watsakughwa hata ka kuduhu munu iyowawinga. 37 Watseghwila wenyegho kwa wenyegho ka imunu iyotsuma yaleke kutowighwa na lipanga. Mtsakuwa mwahela ngupfu yoyose ya kuwatowa iwanu iwowehila. 38 Mtsokufa mna tsiisi tsa wanu wangi na isi tsawo tsitsowametsa. 39 Na wayenu iwahonile watsakufila mna isi tse wanu iwowehila kwa aghala ghehile ghawatendile, nawo watsohupila kuko kwa aghala ghehile ghawatendile iwabala wawo.

40 Lekeni wang'alonga na wang'atoghola ka wawo na iwabala wawo wose watenda ghehile, na kwa ughutsu wawo iwangutsukile na kwa ukulema kwao kwawandemile, 41 na wang'atanga ebali nene niwalemele na kuwaghala mna isi tsa wanu iwowehila, na kwa mimoyo yawo ili misughu ing'aleghela na kutoghola ghehile ghawo ghawatendile, 42 baho nene nitsokumbuka laghano lyangu lyatwilaghane na Aburahamu, Isaka, na Yakobo na kuikumbuka isi ila yaniwalongele nitsoweng'a.

43 "Hawatsakuwa kunze mwa isi yawo, isi ayo itsodeng'elela matsuwa ghake gha ukubwihila haitsakuwa uchuwa. Matsuwa agho watsosama ghehile ghawo kwa kubetsa malaghitso ghangu na kughahila. 44 Lekeni hata ghang'alawila agho, hawatsokala mna isi tsa wanu iwowehila, nene sitsowaleka baye wala kuwahila ili niwakome na ndeke kutenda achila chanilaghane nawo. 45 Lekeni kwaajili yawo nitsolikumbuka laghano lyanendile ne iwabala tsawo iyaniwalapfile mna isi ya Misiri, aku iwanu wa isi tsingi wolola, ili nene niwe Imulungu wawo. Nene yuyo IMNDEWA wawo."

46 Aghano ghagho ghamalaghitso, imiko, na malangulitso gha IMNDEWA ghayaweng'ile iwanu wa Isiraeli akula kuchidunda Sinai kubitila Musa.