1 IMNDEWA kamlongela Musa, "Walongele iwatambika, iwana wa Aruni apfino, ka kuleke kuwa ne imunu wowose mna wawo iyetenda keha kwa kukinda lukuli lwa munu yafile wa hakaye yake, 2 ila kodaha kulukinda lukuli lwa mai wake na lwa aba wake na lwa imwanaghe na lwa mkulu wake. 3 Pfipfila kodaha kulukinda lukuli lwa lumbu wake iyali ng'ana yakwelighwe baye iyokala mng'anda mwake. Kwitenda keha kwa kukinda tsing'uli tsawo kwaajili ye wanu awo kodaha. 4 Yaleke kwitenda keha kwa kukinda lukuli lwa munu wa lukolo lwa mwehe wake."

5 "Iwatambika mwiko kubeya chipala, wala kubeya mmbalimbali mwa ndepfu tsawo wala kwisanza sale mlukuli ili woneke ka womlilila imunu yafile. 6 Wobamighwa wawe waenzeluke kwe Imulungu wawo, wala waleke kuliligha taghwa lya Imulungu wawo. Kwaapfila wawo iwo iwondapfila nene ipfijo ipfilakatsighwa, ka ipfijo pfangu nene Imulungu. Apfo wobamighwa wawe wahenzeluka. 7 Imtambika yaleke kukwela ipinga iyali chiweghe, wala ipinga iyalekighwe na mmale wake, lekeni hayokwela yakwele ipinga ayula ng'ana yammanye baye immale, kwaapfila imtambika kaenzeluka kwe Imulungu. 8 Iwanu muwone iwatambika ka wenzeluka, kwaapfila wawo womlapfila Imulungu wenu ichijo. Muwone watambika ka wenzeluka kwaapfila nene yaniwatenda mwemwe mwenzeluke na Imulungu na nienzeluka."

9 "Imwana pinga wa imtambika yang'awa chiweghe, ayo komghela chinyala aba wake, apfo yalakatsighwe kwa ghumoto. 10 Mtambika mkulu wowose, kwaapfila yeye ka mkulu mna ndugu tsake, naye tsakaghelighwa ghamapfuta mwitwi mwake, na kasaghulighwa ili yapfale maghwanda ighenzeluke, yaleke kukala aku mvili tsitimka wala yaleke kudegha maghwanda ghake kulangusa ka kodomboketsa, 11 yaleke kwingila hanu hane lukuli lwa munu yafile, yaleke kwitenda keha kwa kukinda imauti ya aba wake, au imauti ya mai wake. 12 Kwaapfila kasaghulighwa yamsang'anile Imulungu kwa kubakighwa ghamafuta mwitwi, apfo yaleke kuka hanu haenzeluke wala yaleke kuhatenda hehe. Nene yuyo IMNDEWA."

13 "Mtambika mkulu yakwele ipinga yula yang'ana yammaye immale baye. 14 Yaleke kukwela pinga mghane, wala pinga iyalekighwe na mmale wake wala yaleke kukwela ipinga chiweghe. Yakwele ipinga ayula yang'ana yammanye immale baye kulawa mna lukolo lwake, 15 ili iwanu wake waleke kuwona weha iwanaghe iyatsoweleka mwenyegho. Nene yuyo IMNDEWA yanimtendile yenzeluke."

16 Kuya IMNDEWA kamlongela Musa, 17 "Mlongele apfino Aruni, imtsukulu wowose iyatsakwoneka mna pfeleko pfako pfose ipfikutsa iyali na chilema mlukuli, ng'obamighwa baye kunisoghelela habehi na kundapfila nene chijo. 18 Munu wowose ayula yawe ka chifita au ka chimbete, au kana mula igholeke ka ya sungula au kana chilungo chongetseka mlukuli mwake, 19 au kana mghulu ighubeneke au kana ghumwoko ghugholojoke, 20 au kana chinumbi, au iyali mughuhi ng'ani, au yane chilema mna tsinenge tsake, yane upfimbe au yane utamu wa ngotsi au ayula iyatulike tsimbeghu, ayo yaleke kunisoghelela habehi na kundapfila nene ichijo. 21 Imunu wowose mna lweleko lwa mtambika Aruni yana ichilema yaleke kunisoghelela habehi na kundapfila ipfijo ipfilapfighwa kwa kulakatsighwa kwa ghumoto. Kwaapfila yeye kana chilema, yaleke kunisoghelela nene Imulungu yandapfile ichijo changu. 22 Imunu ayo kodaha ukuja ichijo ichilapfighwe kwa Imulungu wake, pfinu ipfienzeluke na apfila ipfienzeluke ghendo. 23 Kwaapfila kana chilema, apfo yaleke kwingila mghati mwa lipanzia wala kuiseghelela imatsabahu, hela katsohatenda hanu haenzeluke hehe, kwaapfila nene na IMNDEWA yaniwatenda wenzeluke."

24 Musa kamlongela Aruni na iwanaghe na Waisiraeli wose ipfinu apfo.