1 IMNDEWA kamlongela Musa, 2 "Aghano ghagho ghamalaghitso ighomlongotsa imunu iyahonile ukoma mna litsuwa lya ukutendighwa yele, imunu ayo yaghalighwe kwa mtambika, 3 naye imtambika yamghale kunze, kutali na tsindalo tsawo, kuko yamlole ka ukoma iyali nawo uhona, 4 mtambika katsolaghitsa waghalighwe wapfideghe weli waghima iwanoghile na chibanzi cha mbiki ghwa mweretsi, na nyutsi ndung'u na putila lya hisopo kwa imunu ayo iyotendighwa yele keli. 5 Mtambika katsolaghitsa wamchinje chideghe yumwe mna chiha ichimemile ghamatsi ghanoghile gha mbwibwi. 6 Mtambika katsomsola ichideghe ayula iyali mghima, na ichibanzi achila cha ghumbiki ghwa mweretsi, na nyutsi aila ndung'u na putila lya hisopo na pfose apfo yapfipfabike mna idamu ya ichideghe ayula iyachinjighwe. 7 Kuya yammitsile idamu mala saba imunu ayo iyotendighwa yele, baho mtambika yawalongele iwanu ka imunu ayo kela. Kuya katsomlekelela ichideghe ayula iyali mghima yaghuluke mlanga. 8 Imunu ayo yatsapfe maghwanda ghake na yatsighete tsimvili tsake kuya yoghe, naye baho kakuwa kela. Yang'atenda agho, katsokala na wayaghe mna ndalo yawo, lekeni tanu katsokala kunze mwa chibumbulika chake kwa ghamatsuwa saba. 9 Mna tsuwa lya saba yaghete tsimvili tsake tsose, na tsindepfu tsake tsose na mikiti na mvili tsose itsili mlukuli mwake. Kuya yatsapfe maghwanda ghake kuya yoghe, naye baho kakuwa kela. 10 Mna tsuwa lya nane yaghale wana wamale weli we ng'olo, iwenelele, na yaghale ing'olo mbughuma yane ghumwaka ghumwe, na yaghale makimbo madatu gha utimbo utighinike ghendo na una ghamapfuta, utimbo awo uwe wa kumlapfila Imulungu na ghamapfuta koloboi saba. 11 Mtambika iyomtenda imunu ayo yele yamghale hambele he IMNDEWA habehi na ghumlango ghwa Lihema lya ukwitinganila hamwe nea ipfinu pfayaghalile. 12 Mtambika yasole imwana yumwe we ing'olo na ghamapfuta aghala koloboi saba, yamlapfile IMNDEWA ili naye yamleghusile inzambi yake. Yapfinule mchanya kulangusa ghendo ka pfilapfighwa kwe IMNDEWA. 13 Kuya yamchinje ing'olo ayo hanu haenzeluke, ahala hawochinjila iwanyama iwolapfighwa ne iwanu ili nzambi tsawo tsileghusighwe na iwanyama iwolapfighwa ne iwanu walakatsighwe. Ing'olo ayuno wa ukuleghusa matotso keghala na ing'olo wa ukuleghusa nzambi, pfinu pfake pfakuwa pfa mtambika, ayo nambiko iihenzeluke ghendo. 14 Mtambika yasole idamu chidogho ye nambiko ya ukuleghusa matotso, yambake imunu ayo iyotendighwa yele mna membe ya ghutwi lyake lya kujilo na chidole ghumba cha ghumoko ghwake ghwa kujilo na chidole ghumba cha mghulu ghwake ghwa kujilo. 15 Kuya mtambika yasole chidogho ghamapfuta yaghide mna chighanza cha ghumoko ghwake ghwa kumoso. 16 Yapfabike chidole chake cha ghumoko ghwake ghwa kujilo mna ghamapfuta agho na yamitse hambele he IMNDEWA mala saba. 17 Ghamapfuta ighokala mna chighanza chake yambakatse imunu ayo ahala hana membe ya lighutwi lyake lya kujilo na yambakatse hane chidole ghumba cha ghumoko ghwake ghwa kujilo na yambakatse hane chidole ghumba cha mghulu ghwake ghwa kujilo, hanu hahala hayabakile idamu ye imnyama iyalapfighwe kuwaleghusila iwanu inzambi. 18 Ghamapfuta ighokala yambake mwitwi imunu ayo na yaitende sang'ano aino ili kumtenda yele na kumlamlitsa imunu ayo na IMNDEWA."

19 "Mtambika yamchinje imnyama yumwe mna awala weli iwalapfighwe, ili Imulungu yamleghusile tsinzambi tsayatendile imunu ayula iyoneke keha. Kuya mtambika yamchinje imnyama yungi iyalapfighwe yalakatsighwe. 20 Pfipfila mtambika yeke ipfijo pfe ingano mchanya mwe imnyama ayo iyalapfighwe yalakatsighwe mna imatsabahu. Apfo mtambika koitenda ing'onde ya ukumtenda imunu ayo yele, naye baho kakuwa kela."

21 "Lekeni ka imunu ayo ka muhingwa, ng'odaha baye kulapfa ipfinu apfo, yamghalile mtambika imwana yumwe mmale we ing'olo yawe wa kumliha Imulungu iwe nambiko ya kuleghusa matotso inulighwe mchanya, yatsotendighwa chiwe chitango cha ukumtenda imunu ayo yele. Pfipfila yaghale kimbo limwe lya usaghe utighinike ghendo na une ghamapfuta uwe pfijo pfe ingano ipfilapfighwa kwe Imulungu na ghamapfuta koloboi saba. 22 Pfipfila yaghale mughi wabili au iwana weli we njiwa, yumwe yawe wa ukuleghusa nzambi tsayatendile na yungi yawe wa ukulakatsighwa. 23 Mna litsuwa lya nane yamghalile mtambika ipfinu apfo hambele ha ghumlango ghwa Lihema lya ukwitinganila, pfikalapfighwe kwe Imulungu ahala hayotendighwa yele. 24 Mtambika yamsole imwana mmale we ing'olo iyamlapfile kwa kulema kulapfa ipfinu ipfili pfake Imulungu na ghamapfuta aghala koloboi saba na wapfinule mchanya kulangusa ka womlapfila IMNDEWA. 25 Mtambika yamsubutule imwana ayo we ng'olo wa nambiko ya ukuleghusa nzambi na yakinge idamu, kuya yasole idamu chidogho yambake imunu ayo hane ghutwi lyake lya kujilo na hane chidole ghumba lya ghumoko ghwake ghwa kujilo na hane chidole ghumba cha mghulu ghwake ghwa kujilo. 26 Mtambika yaghaghide ghamapfuta agho chidogho mna chighanza chake cha ghumoko ghwa kumoso. 27 Kuya katsomitsa ghamapfuta agho chidogho mala saba kwa chidole cha ghumoko ghwake wa kujilo hambele he IMNDEWA. 28 Kuya mtambika katsomghela imunu ayo ghamapfuta hane membe ya lighutwi lya kujilo na hane chidole ghumba cha ghumoko ghwake ghwa kujilo na chidole ghumba cha mghulu ghwake ghwa kujilo. Katsombakatsa ahala hayambakile idamu ye nambiko ya ukuleghusa matotso. 29 Ghamapfuta ighakalile mna chighanza chake katsombaka mwitwi imunu ayo, ili yamtende yele hambele he IMNDEWA na kwilamlitsa naye. 30 Kuya mtambika katsomsola tetele yumwe mna awala weli au njiwa weli ka imunu ayo pfayodaha kulapfa. 31 Mughi yumwe katsolapfighwa ili yaleghuse nzambi na yungi wa katsolapfighwa ili yalakatsighwe, hata ka katsolapfa mughi awo, pfipfila yalapfe na usaghe ili mtambika yamtende imunu ayo yele hambele he IMNDEWA. 32 Aghano ghagho ghamalaghitso gha mbuli tsa imunu yane ukoma, lekeni ng'odaha baye kulapfa ipfinu ipfibamighwa ipfimtenda yele."

33 IMNDEWA kamlongela Musa na Aruni, 34 "Hamkwingila mna isi ya Kanani yanimwing'ani iwe yenu, na ning'eka upfundo mna ubanda we ing'anda imwe ili muisi amwo, 35 yane ing'anda ayo yamlongele mtambika ka upfundo woneka mng'anda mwake. 36 Mtambika katsolaghitsa ipfinu pfose pfilapfighwe kunze ng'ana yeye yengile baye kulola chinu acho, ili pfose ipfili mng'anda pfileke kwoneka pfiha. Kuya mtambika katsakwingila kuilola ing'anda ayo. 37 Katsolola ukungu ka woneka mbanda na ka uwa wa chijani au uwa mdung'u na ka woneka wingila mghati wohimba ubanda, 38 mtambika katsolawa kunze kwe ghumlango na kuihinda ing'anda ayo kwa ghamatsuwa saba. 39 Litsuwa lya saba mtambika katsakuya keli kuilola ing'anda ayo. Ka ukungu awo wenela mwibanda mwa ing'anda ayo, 40 mtambika katsolaghitsa ghamabwe ighali hanu hane ukungu ulapfighwe na ukwasighwa hanu hehile kunze mwe ikaye. 41 Naye katsolaghitsa imibanda ya mng'anda amwo ikwangulighwe chila ubali, na chokaa iikwangulighwe yasighwe kunze mwe kaye hanu hehile. 42 Kuya watsosola ghamabwe ghangi na kuhatsenga hanu ahala hawabomole, nawo watsoikulugha keli ing'anda ayo."

43 "Ka ukungu awo utsolawila keli ahala haulapfa ghamabwe agho na kukwangula chokaa na kuikulugha keli, 44 mtambika yatse kuilola. Ka ukungu wenela mna ing'anga ayo, awo ukungu iuhinya ing'anda, apfo ing'anda ayo iha. 45 Ing'anda ayo imwaghighwe na ghamabwe ghake, mibiki yake na msanga mtselu pfighalighwe hanu hehile kunze mwe kaye. 46 Kuya imunu wowose iyatsakwingila mng'anda amwo ghamatsuwa ing'anda ayo ihindighwa katsakuwa keha mbaka nemihe. 47 Imunu wowose iyowasa au iyakuja mmng'anda amwo kobamighwa yatsapfe maghwanda ghake."

48 "Lekeni mtambika yang'engila kuikaghula ing'anda ayo, na kuyona ka ukungu ng'awenele baye kulawa ahala haikulughighwe, mtambika katsowalongela iwanu ka ing'anda ayo yela kwaapfila ukungu umala. 49 Ili kuitenda ing'anda ayo yele yane ing'anda katsoghala pfideghe wabili ne chibiki cha mweretsi, nyutsi ndung'u na putila lya hisopo. 50 Katsomsubutula chideghe yumwe mna chiya chine ghamatsi ghanoghile gha mbwibwi. 51 Katsosola chibiki cha mweretsi na putila lya hisopo na nyutsi ndung'u ne chideghe ayula yungi iyali mghima na kupfighela pfose mna idamu ya ichideghe ayula iyasubutulighwe. Kuya mtambika katsoimitsa idamu mna ing'anda ayo mala saba. 52 Apfo pfipfo pfatsoitenda ing'anda ayo yele kwa idamu ya chideghe na ghamatsi ghanoghile gha mbwibwi na chideghe na chibiki cha mweretsi na liputila lya hisopo na nyutsi ndung'u. 53 Ichideghe ayula mghima katsomlekelela yaghende tsake mmighunda kunze mwe ikaye. Apfo pfipfo pfayatsoitenda ing'anda ayo yele, nayo itsakuwa yela."

54 "Aghano ghagho ghamalaghitso gha mbuli yoyose ya ukungu wa utamu uukwenela, 55 ukungu iuli mna lighwanda au mna ing'anda, 56 upfimbe, lipute au chilonda, 57 ili kulangusa chinu chihi ichihile na chihi ng'achihile baye. Agho ghagho ghamalaghitso gha mbuli ya ukungu na ukoma."