Nambiko tsa ukuleghusa tsinzambi tsobamighwa tsilapfighwe kwa tsinzambi atsino. 1 "Munu wowose yang'akemighwa kuna libalatsa naye kobamighwa yalonge achila chayonile au chayahulike, lekeni yeye kolema ukulonga chayonile au chayahulike, ayo naye kakuwa kana ghomba."

2 "Munu wowose mna mwemwe yang'akinda chinu chihile hambele ha IMNDEWA, iwe kakinda mitsogha ya iwanyama wa kumuhulo au wa ukufugha, au iwe kakinda mitsogha ya wang'onyo iwotambala, na baho hayotanga ka kakinda, naye yamanye ghendo ka katotsa, 3 au yang'akinda chinu ichilawa mlukuli mwa munu ichilongighwa ka chiha, au chiwe chochose achila, aku ng'amanyile baye ka kakinda, na baho hayatsomanya chayatendile, yamanye ghendo ka katotsa."

4 "Munu yang'eleha kutenda chinu chochose achila, chiwe chinogha au chiha, ka apfila pfawelaha iwanu wangi aku ng'awakwalangula baye, imunu ayo hayatsotanga ka katenda apfo, yamanye ghendo ka katotsa. 5 Lelo yeye mwenyegho hayotanga ka katotsa mna tsinzambi atsino, yatoghole inzambi iyaitendile hambele ha iwanu, 6 kuya yamghalile IMNDEWA ng'olo mbughuma au mene mbughuma kulawa mna iwanyama wake, kwa inzambi yake aila iyatendile. Naye imtambika katsomlapfa kwa Imulungu, na baho kakuwa kahela nzambi keli."

7 "Lekeni ka kahela mwana wa ng'olo au mene wa ukulapfa kwa inzambi aila iyatendile, yamlapfile IMNDEWA njiwa weli au makinda meli gha tetele, yumwe kolapfighwa kwa inzambi iyatendile na yungi kolapfighwa yakalakatsighwe mna Imatsabahu. 8 Yawaghale kwa imtambika, naye imtambika yamlapfe yumwe yawe wa kumleghusila inzambi aila iyatendile kwa kumbobotola isingo bila kulighana litwi lyake. 9 Kuya yasole idamu chidogho yabakatse mmbalimbali mwa Imatsabahu, na idamu ingi ikalile, katsoikutula hasi ha Imatsabahu. Kwa ukulapfighwa akuno kwa injiwa, inzambi ileghusighwa. 10 Kuya Imtambika yalapfe ayula wakeli yakalakatsighwe ka pfailaghitsighwe. Kwa ukutenda apfo, imunu ayo kakuwa ng'atotsile baye. Naye Imulungu komleghusila inzambi yake."

11 "Ka kahela ghendo njiwa weli au makinda meli gha tetele, yamlapfile Imulungu kimbo limwe lya usaghe utighinike ghendo kwa inzambi aila iyatendile. Lekeni yaleke kuughela ghamapfuta wala mapfumba kwaapfila usaghe awo ulapfighwa ka nambiko ya kuleghusa nzambi. 12 Yaughale kwa imtambika, naye yadeghe ghawo limwe, lighawo alyo limwe lyolangusa ghendo ka usaghe awo wose iulapfighwe wa kwake yeye IMNDEWA. Naye imtambika yaulakatse mchanya mwa Imatsabahu, mchanya mwa ipfinu pfingi ipfilapfighwe kwa IMNDEWA ka nambiko ya ukuleghusa tsinzambi. Naye IMNDEWA komleghusila inzambi yake. 13 Imtambika yang'atenda apfi komlamlitsa na Imulungu, imunu ayo kakuwa ng'atotsile baye mna tsinzambi atsino tsayatendile na baho Imulungu komleghusila inzambi yake. Usaghe ukalile utsakuwa wa imtambika ka pfaitendighwa inambiko ya ichijo."

14 IMNDEWA kamlongela Musa, 15 "Munu wowose yang'atenda nzambi aku ng'amanyile baye ka chayatendile nzambi, kwa kulema kulapfa ipfinu apfila ipfibamighwa yeng'ighwe IMNDEWA, kobamighwa yamulihe IMNDEWA kwa kumghalila ng'unzu iyenelele kulawa kuna wang'olo wake, naghwe umanye imnyama ayo youtsighwatse kwa ukulingana na ipfinu ipfili mna Lihema lya ukwitinganila. 16 Pfipfila imunu ayo kobamighwa yoitse ichinu achila chayalekile ukumwing'a IMNDEWA, yamwongetsele asilimiya ishilini ya bei ya ichinu acho. Kuya yamwing'e imtambika ichinu acho, naye imtambika katsomlapfila Imulungu ing'unzu ayo kwa inzambi iyatendile imunu ayo ka nambiko ya ghamatotso, baho imunu ayo kakuwa kahela nzambi keli."

17 "Munu wowose yang'atenda nzambi aku ng'amanyile baye ka chayatendile nzambi, kwa kutenda ichinu chochose ichighomighwe mna ghamalaghitso gha IMNDEWA, imunu ayo katotsa ghendo, naye katsohighighwa kwa ukutotsa kwake. 18 Imunu ayo yaghale ing'unzu iyenelele kwa imtambika, naye imtambika katsomlapfila Imulungu ing'unzu ayo kwa litotso lyatendile imunu ayo, na baho litotso lya imunu ayo lyakuwa lileghusighwa. 19 Ukumlapfila inambiko ya ghamatotso IMNDEWA, komtenda imunu yaleghusighwe litotso."