1 IMNDEWA tsakalonga na Musa ahala hawafile iwana weli wa Aruni, tsawafa ahala hawamsoghelele IMNDEWA habehi na kuudusula upfumba iwaghomighwe. 2 Kamlongela, "Umlongele ndughu yako Aruni apfino, mwiko ukwingila Hanu Haenzeluke ihali kuchughu mwe lipanzia ka pfayobama mwenyegho. Yaleke kwingila hanu aho kwaapfila aho nene nitsolawila mna libingu mchanya mwa hanu ha ukuwalombela iwanu libatsi. 3 Aruni ng'ana yengile hanu haenzeluke ng'ani, kobamighwa yalapfe mwana mmale we ng'ombe wa kuleghusa nzambi na ng'unzu yumwe wa ukulakatsighwa."

4 "Katsakwogha ne ghamatsi, kuya katsopfala lighwanda lila lienzeluke, lijoho litselu, kaputula na kwiyoha msipi mtselu mchuno na chilemba."

5 "Yasole mvulati weli kulawa kwa iwanu wa Isiraeli, wawe wa nambiko ya kuleghusa nzambi na ng'unzu yumwe yawe wa nambiko ya ukulakatsighwa. 6 Tanu Aruni yamlapfe ng'ombe mmale ayo yawe wa nambiko ya ukuleghusa nzambi tsayatendile yeye imwenyegho na tsawatendile iwanu iwali hakaye yake. 7 Kuya yasole wamene weli, yaweke habei ne ghumlango ghwa Lihema lya ukwitinganila. 8 Yase tsisimbi mchanya na hatsilaghala hasi tsilamule mene wachi yatsolapfighwa kwa IMNDEWA, na mene yungi yatsolekelelighwa yoke kunyika kutali ne ndalo, iyokemighwa Azazeli, aku ka kobapa tsinzambi tse wanu yatsighale kutali. 9 Yamsole imene ayula itsisimbi itsimghwile yawe wa IMNDEWA na yamlapfe yawe wa ukuleghusa nzambi. 10 Imene itsisimbi itsimghwile yoke, katsolapfighwa aku kamghima. Aruni hayomlekelela yoke mna inyika kutali ne ndalo iyokemighwa Azazeli, aku ka kabapa tsinzambi tse wanu, baho iwanu watselamla ne IMNDEWA kwa ukuleghusighwa nzambi tsawo."

11 "Aruni hayomlapfa ing'ombe mmale iyatsoleghusa tsinzambi tsayatendile yeye mwenyegho na iwanu iwali akaye yake, 12 yasole chitetso na yakahale imikala ikwaka mna imatsabahu, na yasole maghawo meli gha upfumba utighinike ghendo, kuya yengitse upfumba awo na ichitetso acho mna hanu henzeluke ng'ani. 13 Yeke upfumba awo mna imikala ikwaka, na baho lyolawila hosi lyoghubika chighubiko cha Lisanduku lya Laghano. 14 Yaditse kwa chidole chake mna idamu ye ng'ombe iyaikingile, na yamitse hambele ya chighoda cha ukuwalombela iwanu libatsi, na yamitse mala saba kwa ichidole chicho hambele ya lisanduku lya laghano."

15 "Kuya yamsubutule imene ayula wa nambiko ya ukuleghusa tsinzambi tse iwanu wose. Kuya yasole idamu yake na yaighale hanu henzeluke ghendo kuli kuchughu mwe lipanzia na yamitse hanu ha ukuwalombela iwanu libatsi, na yamitse kwa ichidole chicho hambele ha lisanduku lya laaghano, ka pfayatendile na idamu ye ng'ombe. 16 Kwa ukutenda apfi, kohatenda hanu Haenzeluke Ghendo hele, naye yamitse mna Lihema lya ukwitinganila, kwaapfila lyahaghati mwe iwanu wa Isiraeli iwehile na iwane tsinzambi nyingi. 17 Yaleke kwingila munu wowose mna Lihema lya ukwitinganila ahala Aruni hayakwingila mghati kuhatenda Hanu Henzeluke Ghendo hele. Imunu kodaha kwingila ahala hayomalitsa kwilamla yeye mwenyegho, na hayomalitsa kuwalamlitsa wanu iwali ukaye yake ne Imulungu na iwanu wose wa Isiraeli. 18 Kuya katsolawa na kughenda hana imatsabahu hambele ha IMNDEWA na kohatenda hele. Yasole idamu chidogho ya ing'ombe ayula na ya imene ayula na yaibake imatsabahu chila ubali. 19 Katsoimitsila idamu imatsabahu ayo kwa chidole chake mala saba, na kwa ukutenda apfo koitenda yele na koihimika kulawa mna ukwiha kwose kwa iwanu wa Isiraeli."

20 "Aruni hayomalitsa kuhatenda Hanu Haenzeluke Ghendo hele na Lihema lya ukwitinganila lyele na matsabahu nayo yele, baho yamsole ing'unzu ayula mghima iyasaghulighwe yawe wa Azazeli iyobapa tsinzambi tse wanu yatsighale kutali. 21 Aruni katsakwika ghamoko ghake mchanya mwa ing'unzu ayo iyali mghima na yalonge aku yatoghole ka iwanu wa Isiraeli watenda ghehile na watotsa na watenda nzambi, na agho ghose ghawatendile yagheke mna litwi lya imene ayo, kuya katsomdima yaghende kunyika na imunu iyasaghulighwe ukutenda apfo. 22 Yakamlekelele imene ayo yoke kunyika, hanu halihela iwanu, aku kasola nzambi tsawo tsose."

23 "Kuya Aruni yengile mghati mwa Lihema lya ukwitinganila, katsotsula maghwanda matselu ghanoghile ghayapfalile ahala hayengile Hanu Haenzeluke Ghendo na kughaleka amwo. 24 Naye katsakogha baho hanu haenzeluke na kupfala maghwanda ghake gha ukaye. Katsolawa na yawachinje iwanjama iwolapfighwa walakatsighwe, yumwe yawe wa ukuleghusa nzambi tsake mwenyegho na yungi yawe wa ukuleghusa nzambi tsawatendile iwanu. 25 Ghamapfuta ighalawile mna iwanyama iwalapfighwe nambiko ya ukuleghusa nzambi ghatsolakatsighwa mna matsabahu. 26 Imunu ayula iyasaghulighwe kumlekelela ing'unzu ayula yoke mna inyika ukwasa tsinzambi tse wanu, tanu kobamighwa yatsapfe maghwanda ghake na yoghe, kuya kodaha kwingila mna indalo. 27 Ing'ombe na imene ayula iwasubutulighwe ili wawe nambiko ya ukuleghusa nzambi tse wanu, awala idamu yawo isolighwe na kughalighwa Hanu Haenzeluke Ghendo ili Waisiraeli waleghusighwe nzambi tsawo, watsolapfighwa kunze kwa ndalo yawo. Kuko ngotsi tsawo na nyama tsawo na mipfi yawo pfitsolakatsighwa. 28 Naye imunu iyowalakatsa kobamighwa yatsapfe maghwanda ghake na yoghe mwenyegho mna ghamatsi, Yang'atenda apfo, kodaha kwingila mna indalo."

29 "Laghitso lino mlikinde ghamatsuwa ghose. Mna tsuwa lya kumi mna ghumwetsi ghwa saba, mwemwe wenyegho na iwagheni iwokala namwe mwobamighwa mleke ukuja chinu chochose na mleke kusang'ana. 30 Mtsotenda apfo kwaapfila mna litsuwa alyo mwemwe mtselamlitsa na nene IMNDEWA, na nitsowatenda mwele kulawa mna tsinzambi tsenu, namwe mtsakoneka mwela hambele hangu. 31 Mna tsuwa alyo mtsobwihila, namwe mtsoleka ukuja. Laghitso alyo mtsolikinda matsuwa ghose. 32 Mtambika iyabakighwe ghamapfuta na iyasaghulighwe yakinde hanu hayang'ali yosang'ana aba wake, yuyo yatsosang'ana isang'ano ya ulamlitsi aku kopfala maghwanda matselu ghaenzeluke, 33 katsohatenda Hanu Haenzeluke Ghendo hele, na kotenda Lihema lya ukwitinganila nalyo lyele, na koitenda imatsabahu nayo yele, na kowatenda iwatambika na iwanu wose wa Isiraeli wele. 34 Mna ghamatsuwa ghenu ghose ghamkala, mwobamighwa kughakinda malaghitso ghano chila mwaka, ghatsowatenda iwanu wose wa Isiraeli wele kulawa mna tsinzambi tsawo tsawotenda."

Musa tsakatenda ghose ka Imulungu pfayamlaghitse.