1 IMNDEWA kawalongela Musa na Aruni, 2 "Walongele Waisiraeli apfino, mna wanyama wose iwokala muisi, mwodaha kuwaja iwanyama awano. 3 Mwodaha kumja mnyama wowose yana tsikwato itsigholile mala mbili na iyoselula. 4 Lekeni mleke ukuja imnyama iyoselula lekeni tsikwato tsake ng'atsigholile baye au tsikwato tsake tsighola lekeni ng'oselula baye. Mleke kumja ing'amiya, ayo ng'oselula baye lekeni ng'wato tsake ng'atsigholile baye. Ayo mwemwe kumja mwiko. 5 Mleke kumja imimbi, kwaapfila koselula lekeni tsikwato tsake ng'atsigholeke baye, mwemwe mwiko kumja. 6 Mleke kumja isungula, ayo yeye koselula lekeni kahela kwato itsigholile, mwiko mwemwe kumja. 7 Mleke kumja ingubi, ayo kana kwato itsigholile lekeni ng'oselula baye, ayo mwiko mwemwe kumja. 8 Kwaapfila iwanyama awo weha, mleke kuja inyama yawo wala kuidonza mitsogha yawo. 9 Pfilumbe wose iwokala mwibahali na iwokala mna imito, mwodaha kuwaja awala wane mapetsi na maghamba. 10 Lekeni chilumbe chochose ichikala mwibahali na ichikala mna ghumto ichilihela mapetsi wala maghamba, acho mleke kuchija. 11 Mwiko mwemwe kuja pfilumbe apfo. Mleke kutsija nyama tsawo, wala kuidonza mitsogha yawo kwaapfila yodesa ghendo. 12 Chinu chochose ichikala mna ghamatsi ichilihela mapetsi au maghamba, acho chiha kuna mwemwe."

13 "Pfideghe wano wose weha kuna mwemwe, apfo mleke kuwaja maghengele, furukombe, chipungu, 14 chimanga, kosi wose, 15 bondwa wose, 16 imbuni, chighuluka nzila, dudumitsi, pfitema wose, 17 chimulu, mnandi, chimulu mkulu, 18 mumbi, mwari, mderi, 19 korongo, koikoi wose, hudihudi, na popo. 20 Iwang'onyo wose wane ghamabawa na iwoghenda kwa ghamaghulu mane, awo wose weha kuna mwemwe. 21 Lekeni pfilumbe wane ghamabawa na iwane ghamaghulu iwoghendela ghamaghulu matali kwa kudalukila muisi, mwodaha kuwaja. 22 Mwodaha ukuja iwanzighe wose, senene wose, pfidanukila wose, na mbulumundu wose. 23 Lekeni iwang'onyo wose iwane ghamabawa na ghamaghulu mane, awo muwehile ghendo."

24 "Imunu wowose iyokinda mitsogha yawo katsakuwa keha mbaka nemihe. 25 Imunu yang'aiduta mitsogha ya pfilumbe awano, katsakuwa keha mbaka nemihe, na yatsapfe maghwanda ghake. 26 Imunu wowose yang'amkinda imnyama yane tsikwato itsigholile lekeni ng'oselula baye, imunu ayo katsakuwa keha. 27 Iwanyama wose iwoghendela pfighanza pfawo hata ka wana maghulu mane, awo muwehile ghendo, na imunu wowose iyokinda ghumtsogha ghwa imnyama ka ayo kakuwa keha mbaka nemihe. 28 Imunu wowose iyoduta mitsogha yawo katsakuwa keha mbaka nemihe, naye yatsapfe maghwanda ghake. Iwanyama wano muwehile ghendo."

29 "Pfilumbe apfino napfo pfiha kuna mwemwe, chikwili na mbewa na tukwa wose na 30 bulubulu, ng'enge, ghulughuja, ghong'ole na kangawingo. 31 Awo wose muwehile ghendo, na imunu wowose iyatsoikinda mitsogha yawo, kakuwa keha mbaka nemihe. 32 Ka ghumtsogha ghwa pfilumbe awo ghung'alaghalila chinu chochose chila, chiwe cha mibani au chiwe cha ghwanda au cha ngotsi au cha ghunila au chiwe cha chinu chochose chila ichitendighwe chisang'ane mna ing'onde yoyose ila, ichinu acho chakuwa chiha mbaka nemihe, lekeni ching'aghelighwe mna ghamatsi, chonogha keli. 33 Ka ghumtsogha ghwake ghulaghalila mna chiya, chochose ichili mghati mwa chiya acho chakuwa chiha na ichiya acho chitulighwe. 34 Ka ghamatsi ighali mna ichiya acho ghang'alaghalila mna ichijo, nacho ichijo chakuwa chiha. Na chokunwa chochose ichili mna ichiya acho nacho chakuwa chiha. 35 Ka pfitomo pfa mitsogha ayo pfilaghalila mna chinu chochose chila, ichinu acho chakuwa chiha. Chiwe tanuli au chiwe chikong'o, chobamighwa chitulighwe. Apfo pfitsakuwa pfiha, napfo kuna mwemwe pfiha ghendo. 36 Lekeni chisima au mbwibwi ya ghamatsi pfakuwa pfinogha. Lekeni chochose ichikinda imitsogha ayo chakuwa chiha. 37 Mitsogha ing'alaghalila mna tsimbeghu tsa ukuhanda, tsimbeghu atso ng'atsikuwa tsiha baye. 38 Lekeni ka tsimbeghu tsilowekighwa ili tsote, na chitomo cha mtsogha ching'alaghalila mumo, tsimbeghu atso tsiha ghendo kuna mwemwe."

39 "Mnyama wowose wamlongelighwe mwodaha kumja yang'afa imwenyegho, imunu wowose iyokinda mtsogha ghwake, kakuwa keha mbaka nemihe. 40 Imunu wowose yang'aja nyama ya mitsogha ayo, kakuwa keha mbaka nemihe, ayo yatsapfe maghwanda ghake. Na wowose yatsoduta mtsogha agho, katsotsapfa maghwanda ghake, kakuwa keha mbaka nemihe."

41 "Chilumbe chochose ichitambala muisi kuna mwemwe chiha, mleke kuchija. 42 Chochose achila ichitambalila ilida, au ichighendela maghulu mane au ichighenda kwa maghulu mengi, acho mleke kuchija, mwiko kuna mwemwe. 43 Mleke kwitenda mwiha kwa ukuja chochose achila kulawa mna pfilumbe apfino. 44 Kwaapfila nene IMNDEWA yuyo Imulungu wenu, muwe wahenzeluka kwaapfila nene na muhenzeluka. 45 Nene yuyo IMNDEWA yaniwalapfile Misiri ili niwe Imulungu wenu, apfo muhenzeluke kwaapfila nene na muhenzeluka." 46 Aghano ghagho malaghitso gha iwanyama na iwapfideghe na pfilumbe pfose pfine ughima ipfikala mna ghamatsi na muisi, 47 ghamwing'ighwe ili mdahe kubaghula yuwi iyanoghile na yuwi iyehile, na mdahe kumanya chilumbe chachi chodaha kujighwa na chilumbe chachi ng'achikujighwa baye.