1 IMNDEWA kamlongela Musa, 2 "Walongele Waisiraeli apfino, ipinga yang'akinda inda, na kweleke mwana mmale, ayo kakuwa keha kwa ghamatsuwa saba ka apfila pfayakuwa keha mna ghamatsuwa ghake gha ukwingila kumto. 3 Mna tsuwa lya nane imwana ayo yengile ngoma. 4 Kuya ipinga ayo katsoghendelela kuwa keha mbaka haghomala ghamatsuwa selasini na madatu. Mna ghamatsuwa agho yaleke kukinda chinu chochose ichilapfighwe kwe Imulungu wala yaleke kwingila hanu haenzeluke mbaka ghamatsuwa gha ukutendighwa yele keli ghapfike. 5 Lekeni ka keleka imwana pinga, ipinga ayo kakuwa keha kwa majuma meli ka apfila pfayakuwa keha mna ghamatsuwa ghake gha ukwingila kumto. Katsokala matsuwa sitini na sita aku kotendighwa yele keli."

6 "Ghamatsuwa ghake gha ukutendighwa yele keli haghomala, ghawe gha ukweleka imwana mmale au ghe imwana pinga, yamghalile imtambika imwana we ing'olo yane ghumwaka ghumwe hana ghumlango ghwa Lihema lya ukwitinganila, iyatsolapfighwa yalakatsighwe na yamghalile injiwa au tetele, awo watsolapfighwa kwe IMNDEWA waleghuse tsinzambi tsake. 7 Kuya mtambika katsowalapfa kwe Imulungu, naye Imulungu komleghusila nzambi tsake tsayatendile. Apfo ipinga ayo kakuwa kela keli kulawa mna ukwingila kwake kumto. Apfi pfipfo pfaitsakuwa ipinga wowose yang'eleka imwana mmale au ipinga."

8 "Ka ipinga ayo kahela imwana we ing'olo, yaghale tetele wabili au njiwa weli, yumwe katsolapfighwa yalakatsighwe na yungi katsolapfighwa yawe wa kuleghusa nzambi tsake. Mtambika katsomtenda ipinga ayo tsinzambi tsake tsileghusighwe. Na baho katsakwela keli."