1 IMNDEWA kawalongela Musa na Aruni, 2 "Munu wowose yang'apfimba au yang'awa na pfibuhu au ng'opfu ing'alawa mlukuli mwake, napfo pfing'oneka ka ukoma, imunu ayo yaghalighwe kwa mtambika Aruni au yaghalighwe kwa mwanaghe yumwe iyali mtambika. 3 Mtambika katsohalola hanu hana utamu na ka mvili itsili ihanu aho tsighaluka tsiwa nzelu na utamu wenyegho ung'oneka uhimbika mna lukuli lwake, apfo mmanye awo ukoma. Mtambika yang'amalitsa kumlola, yawalongele iwanu ka imunu ayo keha. 4 Ka ichibuhu acho chiwa chitselu, lekeni ng'achihimbike baye mlukuli wala tsimvili tsa ihanu aho ng'atsighaluke baye tsiwe nzelu, mtambika katsombaghula imunu ayo yakale kutali ne iwanu kwa ghamatsuwa saba. 5 Mtambika katsomkaghula keli imunu ayo mna litsuwa lya saba, na ka chibuhu cha pfipfila na kakona ng'achenele baye mna ingotsi yake, mtambika katsombaghula keli imunu ayo yakale kutali ne iwanu kwa ghamatsuwa saba ghangi. 6 Mtambika yamlole keli imunu ayo mna litsuwa lya saba, ka hanu hane utamu hahona na utamu ng'awenele baye, mtambika katsowalongela iwanu ka imunu ayo kela, apfo tsa pfibuhu pfiliheka na si ukoma baye. Imunu ayo yatsapfe maghwanda ghake, naye kakuwa kela. 7 Lekeni ka ipfibuhu apfo pfenela keli mna ngotsi kulawa hala mtambika hayamlolile na kulawa ahala hayawalongele iwanu kela, imunu ayo yamghendele keli mtambika. 8 Mtambika katsomlola keli, na ka pfibuhu pfila pfenela mna ngotsi, mtambika yawalongele iwanu ka imunu ayo keha, awo lelo ukoma ghendo."

9 "Imunu yang'awa na ukoma, yaghalighwe kwa mtambika. 10 Mtambika yamlole, na ka kakona upfimbe mtselu mna ingotsi yake, na tsimvili itsili ihanu aho tsiwa nzelu na upfimbe awo ughaluka uwa chilonda, 11 awo ukoma ukalile matsuwa mengi. Mtambika katsowalongela iwanu ka imunu ayo keha. Yaleke kumbaghula, kwaapfila yeye ma keha."

12 "Ka ukoma umwenela mna lukuli lwake lwose, kulawa mwitwi mbaka mmaghulu ka apfila pfayakona mtambika, 13 mtambika katsomlola keli. Yang'amwona ka ukoma umwenela mlukuli mwose, katsowalongela iwanu ka imunu ayo kela kwaapfila lukuli lwose lughaluka luwa lutselu, apfo imunu ayo kela. 14 Lekeni ching'oneka chilonda chibisi mna lukuli lwe imunu ayo, imunu ayo kakuwa keha. 15 Baho mtambika hayochona chilonda acho chibisi, yawalongele iwanu ka imunu ayo keha kwaapfila awo wenawo ukoma. 16 Lekeni ichilonda acho ching'aghaluka keli chiwe chitselu, imunu ayo yamghendele mtambika. 17 Naye katsomlola na yang'ona ichilonda chighaluka chiwa chitselu, katsowalongela iwanu ka imunu ayo kela."

18 "Imunu yang'awa na pute mna ingotsi yake, nalyo lihona, 19 lekeni hanu hala halikalile lipute alyo halawila upfimbe mtselu au hawa hadung'u na hawa hatselu chidogho, yaghende yakamlanguse mtambika. 20 Mtambika katsohalola hanu aho, yang'ona haimbika na mvili itsili hanu aho tsiwa nzelu, mtambika katsowalongela iwanu ka imunu ayo keha, awo ukoma iulawile mna lipute. 21 Lekeni mtambika yang'ahalola ihanu aho na kwona haduhu mvili nzelu, wala ng'ahaimbike baye, ila hafinala, katsombaghula imunu ayo kwa ghamatsuwa saba. 22 Utamu awo ung'enela mna ingotsi, mtambika katsowalongela iwanu ka imunu ayo keha, kana utamu. 23 Lekeni ka hanu halili lipute hapfipfila na ng'ahongetseke baye mna ng'otsi, ila ili baho ng'opfu iliyeka ya lipute. Mtambika katsowalongela iwanu ka imunu ayo kela."

24 "Imunu yang'alakala, na ingotsi ya hanu halakale yang'awa hadung'u au hatselu, au yang'awa hatselu ghendo, 25 mtambika katsohalola ihanu aho, yang'ona tsimvili tsiwa nzelu na haimbika, apfo awo ukoma. Ukoma awo ulawila kubitila ihanu aho halakale. Mtambika katsowalongela iwanu ka imunu ayo keha kwaapfila kana ukoma. 26 Lekeni mtambika yang'ona tsimvili tsa ihanu aho si nzelu baye, na ng'ahaimbike baye ila hafinala, mtambika katsombaghula imunu ayo kwa ghamatsuwa saba. 27 Mna litsuwa lya saba mtambika yamlole, na yang'ona ka utamu wenela mna ngotsi, mtambika yawalongele iwanu ka imunu ayo keha, kwaapfila kana ukoma. 28 Lekeni ka chilonda acho ng'achenele baye, ila chifinala, na uli baho upfimbe uliyeka iulawile mna ukulakala kwake, mtambika yawalongele iwanu ka imunu ayo kela, kwaapfila iyali nayo ng'opfu ya ukulakala."

29 "Munu wowose, yawe mmale au pinga ka kana chilonda mwitwi mwake au hana ichidepfu chake, 30 mtambika yachilole ichilonda acho, na yang'ona chihimbika na tsimvili itsili baho tsiwa tsanjano na tsinyolodoka, mtambika yawalongele iwanu ka imunu ayo keha, kwaapfila apfo pfibuhu na awo ukoma iuli mwitwi na iuli mchidepfu. 31 Mtambika yang'ona ng'achihimbike baye na tsimvili itsili baho si nitu baye, katsombaghula imunu ayo kwa ghamatsuwa saba. 32 Litsuwa lya saba mtambika yachilole ichilonda acho. Ka ng'achongetseke baye na kuduhu mvili tsanjano wala kuduhu pfibuhu pfopfose ihanu aho, 33 imunu ayo yatsighete tsimvili tsake au ndepfu tsake, lekeni hane pfibuhu yaleke kutsigheta. Kuya mtambika katsombaghula imunu ayo kwa ghamatsuwa ghangi saba. 34 Mna litsuwa lya saba, mtambika yapfilole keli ipfibuhu apfo, yang'ona ka ng'apfenele baye mna ingotsi, na ng'apfihimbile baye mna ngotsi, mtambika yawalongele iwanu ka imunu ayo kela. Imunu ayo yatsapfe maghwanda ghake na baho kakuwa kela. 35 Lekeni ka ipfibuhu apfo pfenela kulawa ahala mtambika hayamlongele kela, 36 Mtambika yamlole imunu ayo yang'ona ka pfenela mna ngotsi, mtambika ng'obamighwa kulola tsimvili ka tsiwa tsanjano kwaapfila yoneka ghendo ka imunua yo keha. 37 Lekeni mtambika yang'ona ipfibuhu apfo pfihona na tsimvili tsinitu tsota hanu aho, ipfilonda apfo pfihona, na imunu ayo kela. Mtambika yawalongele iwanu ka imunu ayo kela. 38 Munu wowose, yawe mmale au pinga ka kana ng'opfu nzelu mlukuli mwake, 39 mtambika yamlole imunu ayo. Mtambika yang'ona ka tsing'opfu atso tsiwa nzelu chidogho, na pfili baho pfibuhu pfiliyeka, yamlongele ka kela."

40 "Munu yang'awa na uhalatsa, ayo kela, kwaapfila yali nawo uhalatsa uliyeka. 41 Ka uhalatsa awo wanzila kuchisogho mbaka hane uhanga, imunu ayo kela kwaapfila yali nawo uhalatsa uliyeka. 42 Lekeni ka kana chilonda chidung'u au chitselu hane uhalatsa wake, awo ukoma ulawila hane uhalatsa wake. 43 Mtambika yamlole na ka kwona chilonda chidung'u au chitselu chipfimba hane uhalatsa wake au hane uhanga wake, nacho chakwoneka ka ukoma."

44 Mtambika katsowalongela iwanu ka imunu ayo keha, kwa ukoma iuli mwitwi mwake. 45 "Imunu wowose yane ukoma katsopfala maghwanda ighadegheke, na tsimvili tsake yaleke kutsichana, kuya yaghubike mlomo wake na yadamilile yalonge, ‘Nene nyiha, nene nyiha!’ 46 Imunu ayo katsoghendelela kuwa keha kwa ghamatsuwa ghose gha utamu awo. Yeye keha, naye katsokala yaliyeka kunze kutali ne tsindalo tsawo."

47 "Ka maghwanda ghe munu yane ukoma ghananahila mna ligwanda, liwe ghwanda lya nyutsi, au ghwanda tselu, 48 au ghwanda lyolyose lila, liwe lifumighwa au lifoghosighwa kwa chitambala chitselu au kwa nyutsi au ghwanda lye ingotsi yoyose lila, 49 ka upfundo awo unanahile mna lighwanda alyo uwa wa chijani au mdung'u, apfo ghwanda alyo lipfunda, nalyo lighalighwe kwa mtambika yakalilole. 50 Mtambika katsolola upfundoa awo naye kolika hambalimbali lighwanda alyo kwa ghamatsuwa saba. 51 Litsuwa lya saba mtambika katsolola upfundo awo. Ka upfundo awo wenela mna lighwanda alyo, liwe lifumighwa au lifoghosighwa au ghwanda lya ngotsi yoyose ila, ghwanda alyo lina upfundo. 52 Mtambika katsolilakatsa lighwanda alyo kwapfila lina upfundo iukwenela."

53 "Mtambika yang'ona upfundo awo ng'awenele baye mna lighwanda, 54 yamlaghitse imunu yane lighwanda alyo yalitsapfe na yalyike hambalimbali kwa ghamatsuwa saba. 55 Lighwanda alyo ling'atsapfighwa, Mtambika baho yalilole, na ka kakwona hanu hana upfundo ng'ahelile baye, yalilakatse lighwanda alyo kwaapfila liha hata ka upfundo wake ng'awenele baye, na hata ka hanu hane upfundo ha kuchughu au hambele. 56 Lekeni ka mtambika kohakaghula keli na kakwona hanu hana upfundo hela, yahadeghe ihanu aho hane upfundo. 57 Lekeni ka upfundo wolawila keli mna lighwanda ilifumighwe au ilifoghosighwe au mna ligwanda lye ngotsi, lighwanda alyo lilakatsighwe. 58 Lekeni ka upfundo ulawila ahala lighwanda halitsapfighwe, lighwanda alyo litsapfighwe keli ili lyele." 59 Aghano ghagho malaghitso ghe upfundo iulawila mna lighwanda lya nyutsi au maghwanda matselu au ilifumighwe au ilifoghosighwe au lya ngotsi. Kwa kuwinza ghamalaghitso ghano mtsodaha kumanya lighwanda ilelile na lighwanda ilihile.