1 IMNDEWA tsakamlongela Musa, 2 "Mkeme Aruni na iwanaghe, kuya usole maghwanda ghawo maenzeluka, na mapfuta gha ukuwabakatsa na ng'ombe wa ukuwaleghusila nzambi tsawo, na ng'unzu weli na usole chiseghe china ipfighate ipfilihela hamila. 3 Kuya uwakeme wanu wose wa Isiraeli wetingane hambele hana ghumlango ghwa Lihema lya ukwitinganila."

4 Musa tsakatenda ka IMNDEWA pfayamlaghitse, kawakema iwanu wose hambele ha ghumlango ghwa Lihema lya ukwitinganila. 5 Musa kawalongela apfino iwanu wose, "Aghano ghagho ghayalaghitse IMNDEWA ghatendeke."

6 Kuya Musa tsakawaghala Aruni na iwanaghe hambele na kuwahopfugha na ghamatsi wele hambele ha IMNDEWA Imulungu. 7 Kuya kampfatsa Aruni likanzu na kulyoha kwa msipi, kuya kampfatsa lijoho na kampfatsa chisibau na kuchoha mchuno mwake kwa msipi ighwohighwe ghoya ghwa ichisibau acho. 8 Kuya keka chikoba cha mmambagha mwa Aruni, na mghati mwa ichikoba acho keka ghamabwe meli gha ukulamulila ighokemighwa Urimu na Thumimu. 9 Kuya kampfatsa Aruni ikofiya na hambele ha ikofiya ayo keka chibamba chikighwe unzolingo wa nzahabu, litaji lyenzeluke ka IMNDEWA pfayamlaghitse Musa. 10 Kuya Musa kasola ghamapfuta ghenzeluke, kalibakatsa Lihema Lienzeluke na ipfinu pfose ipfili mghati mwake, na kwa ukutenda apfo kapfilapfa pfiwe pfa IMNDEWA. 11 Kuya kamitsa ghamapfuta mna Imatsabahu mala saba, na kapfibakatsa ghamapfuta ipfinu pfose ipfili baho, na libigha lya ukuhopfughila, na chikalilo cha libigha, na kupfitenda pfenzeluke. 12 Pfipfila Musa kamghela Aruni ghamapfuta mwitwi, na baho kamhimika yamtambikileghe Imulungu. 13 Kuya Musa kawaghala iwana wa Aruni hambele, kawapfatsa tsikanzu na kawoha misipi mpfuno mwawo, na kawapfatsa tsikofiya mwitwi mwawo ka IMNDEWA pfayamlaghitse.

14 Kuya Musa kamghala ng'ombe wa nambiko ya ukuwaleghusila nzambi, naye Aruni na wanaghe weka ghamoko ghawo mwitwi mwa ing'ombe ayo. 15 Musa kamtsubutula ing'ombe ayo, kasola idamu chidogho, na kwa chidole chake katsibakatsa tsimembe tsa Imatsabahu kwa idamu ayo, ili Imatsabahu yele. Kuya kasola idamu ikalile kaikutula hasi he matsabahu. 16 Kuya Musa kasola ghamapfuta ghose ighali mna usapi, hanu hanoghile ha likini na tsifigho tsose mbili na ghamapfuta ghake kapfilakatsa mchanya mwa Imatsabahu. 17 Lekeni inyama ya ing'ombe ayo, ingotsi yake na imipfi yake, kapfilakatsa kwa ghumoto kunze kutali na ndalo yawo, ka IMNDEWA pfayamlaghitse. 18 Kuya keli Musa kamghala ng'unzu iyalapfighwe yalakatsighwe. Aruni na iwanaghe weka ghamoko ghawo mwitwi mwa ing'unzu ayo. 19 Musa kamchinja na idamu ya ing'olo ayo kaimitsa mna chila ubali wa Matsabahu. 20 Kamghana ing'olo ayo mahundemahunde, kaghalakatsa hamwe na litwi lyake na ghamapfuta ghake. 21 Kuya kauhopfugha usapi na ghamaghulu ghake kwa ghamatsi, Musa kamlakatsa ing'olo ayo wose mna Imatsabahu. Imnyama yuno iyalapfighwe ka nambiko ya ukulakatsighwa mmoto, tsa chijo cha Imulungu, na ukunung'ila kwake komnoghela ghoya IMNDEWA. Musa katenda ka IMNDEWA pfayamlaghitse. 22 Kuya kamghala ng'unzu yungi mmale, ayo yawe ng'unzu wa ukuhimikighwa kwa Aruni na wanaghe wawe watambika. Nawo weka ghamoko ghawo mwitwi mwa ing'unzu ayo. 23 Musa kamchinja, kasola idamu ya ing'olo ayo kambakatsa Aruni mna membe ya lighutwi lyake lya kujilo, na mna chidole gumba cha ghumoko ghwake ghwa kujilo na kambakatsa hane ichidole gumba ichili mna mghulu ghwake ghwa kujilo. 24 Kuya kawaghala iwana wa Aruni hambele, naye Musa kawabakatsa idamu chidogho mna tsimembe tsa ghamaghutwi ghawo gha kujilo na mna pfidole gumba ipfili mna maghulu ghawo gha kujilo. Idamu ingi kaimitsa mna chila ubali wa Imatsabahu. 25 Kuya kasola ghamapfuta ghose, ghumkila hamwe na ghamapfuta ghake, ghamapfuta ighaghubike usapi, hanu hanoghile ha likini, hamwe na tsifigho tsose mbili, ghamapfuta ghake na hatsa lya mghulu ghwa kujilo ghwa kuchughu ghwe ing'unzu ayo. 26 Kuya hane chiseghe chila cha pfighate ipfilihela hamila iikighwe hambele ha IMNDEWA, kalapfa chighate chimwe ichilihela ihamila, na chighate chimwe china ghamapfuta gha nzeituni na kalapfa chighate chimwe chidodo, pfose kapfika mchanya mwa ghamapfuta gha imnyama yula, na mchanya mwa ghumghulu ghula. 27 Musa kapfika mna ghamoko gha Aruni na wanaghe, nawo wapfinula mchanya na wapfihighisa akuno na akuno kulangusa ka pfose apfo pfilapfighwa kwa IMNDEWA. 28 Kuya Musa kapfisola pfinu apfo pfose mna ghamoko ghawo na kapfilakatsa mna Matsabahu hamwe na ipfinu ipfilapfighwe pfilakatsighwe. Imnyama yuno iyalapfighwe mna ukusaghulighwa kwa Aruni na iwanaghe, komnung'ila ghoya IMNDEWA. 29 Kuya Musa kasola chidali chila kachinula mchanya na kachihighisa akuno na akuno, ka IMNDEWA pfayamlaghitse. Ichidali acho cha ing'unzu iyalapfighwe mna ukuhimikighwa kwa Aruni na wanaghe wawe watambika, acho chijo chake Musa. 30 Kuya Musa kasola ghamapfuta gha kubaka ghenzeluke na idamu kulawa mna Matsabahu kammitsila Aruni na iwanaghe na kaghamitsila maghwanda ghawo. Kwa ukutenda apfo, Musa kamhimika Aruni na iwanaghe wamtambikileghe IMNDEWA hamwe na ghamaghwanda ghawo. 31 Musa kamlongela Aruni na iwanaghe, "Muyambike inyama ila ya ng'olo wakeli habehi ha ghumlango ghwa Lihema lyenzeluke, muije baho hamwe na pfighate ipfili mna chiseghe cha nambiko ya ukuhimika. Mtende ka pfayanilaghitse IMNDEWA, inyama ayo itsakujighwa na Aruni na iwanaghe. 32 Ilakatse Inyama yoyose na chighate chochose ichikala. 33 Namwe mleke kulawa kunze kwa ghumlango ghwe luwa lwa Lihema lya ukwitinganila kwa matsuwa saba mbaka ghamatsuwa gha kuhimikighwa ghamale, kwaapfila mtsohimikighwa mna ghamatsuwa saba. 34 IMNDEWA katulaghitsa tutende achino chatutendile leloli, tutenda apfi ili Imulungu yawaleghisile nzambi tsenu. 35 Mtsokala hane ghumlango ghwa Lihema chilo na misi mna ghamatsuwa agho saba, aku mwosang'ana aghala ghayawalaghitse IMNDEWA. Ka ng'amtenda apfo, mtsakufa ghendo. Apfi pfipfo pfayanilaghitse IMNDEWA." 36 Apfo Aruni na iwanaghe watenda chila chinu IMNDEWA chayamlaghitse Musa.