1 IMNDEWA kamlongela Musa, 2 "Walaghitse iwanu wa Isiraeli wakughalile mapfuta ighalengele gha nzeituni gha ukwika mna ipfitasa ili pfakeghe matsuwa ghose. 3 Aruni katsotuwa ipfitasa mghati mwa Lihema lya ukwitinganila, kunze kwa lipanzia lya lisanduku lya laghano ili pfakeghe hambele hangu kulawa nechilo mbaka nemitondo. Alino laghitso lya kukindighwa na pfeleko pfenu mna ghamatsuwa ghose. 4 Yapfituwe ipfitasa apfo ipfili mna chighutso cha nzahabu iliyeka, pfakeghe matsuwa ghose hambele hangu nene IMNDEWA."

5 "Naghwe usole makimbo kumi na meli gha utimbo utighinike ghendo, woke pfighate kumi na pfili. 6 Ipfighate apfo pfikighwe mna imilia mili mchanya mwa metsa ikandikighwe nzahabu iliyeka ikighwe hambele ha IMNDEWA, chila mlia wike pfighate sita. 7 Chila mlia wike upfumba unoghile mna pfikombe pfa nzahabu, upfumba awo utsolakatsighwa mna ghumoto na utsakuwa chitango ka pfighate apfo pfilapfighwa kwe IMNDEWA. 8 Chila Tsuwa lya Sabato Aruni katsakwika ghoya pfighate pfingi mna imilia hambele hangu nene IMNDEWA, ipfilawa kwe iwanu wa Isiraeli ka laghano lya ghamatsuwa ghose. 9 Ipfighate apfo pfitsakuwa pfa Aruni yaliyeka ne wanaghe, nawo watsopfija hanu henzeluke kwaapfila pfienzeluka ghendo kulawa mna tsinambiko tsila tsamndapfila nene IMNDEWA kwa ghumoto."

10 Tsuwa limwe tsakuna msongolo yumwe aba wake tsa Mmisiri na mai wake tsa Mwisiraeli. Tsakesonga na Muisiraeli yumwe mghati mwe ndalo. 11 Imsongolo ayo kaliligha na kulilighita taghwa lye Imulungu. Apfo iwanu wamghala imsongolo ayo kwa Musa. Mame wa imsongolo ayo tsakakemighwa Shelemosi, neghe Debri, wa lukolo lwa Dani. 12 Nawo wamsweka mng'anda aku wombeta Imulungu yatsowalongela choni. 13 IMNDEWA kamlongela Musa, 14 "Mlapfeni kunze kwe ndalo yenu imsongolo ayo, na awala wose iwamuhulike koligha weke ghamoko ghawo mwitwi mwake, kuya iwanu wose wamkome kwa kumtowa na mabwe. 15 Kuya uwalongele Waisiraeli, munu wowose iyomlighita Imulungu ilitsompata alyo lyake. 16 Munu wowose iyomligha Imulungu, yawe Muisiraeli au yawe mgheni, ayo yakomighwe na wanu wose kwa kutowighwa na mabwe."

17 "Munu wowose iyomkoma munu yungi naye yakomighwe. 18 Munu wowose iyomkoma imnyama wa miyaghe, ayo yamuitsile mnyama iyali mghima, kwa ayula iyamkomile."

19 "Munu wowose iyomlagha miyaghe, naye yalaghighwe pfipfila ka pfayamlaghile miyaghe, 20 ka kambena ghumpate naye katsobenighwa ghumpate, nenge kwa nenge, tsino kwa tsino. Pfipfila pfayamlaghile miyaghe naye yalaghighwe pfipfo. 21 Wowose iyomkoma mnyama wa miyaghe katsakuitsa mnyama iyali mghima, lekeni ayula iyomkoma munu yungi naye yakomighwe. 22 Malaghitso ghano ghakindighwe na Muisiraeli na iyali mhenza. Nene yuyo IMNDEWA, Imulungu wenu."

23 "Musa kalonga na Waisiraeli, nawo wamghala kunze kwe ndalo imsongolo ayula iyamlighite IMNDEWA, wamkoma kwa kumtowa na ghamabwe. Apfo pfipfo Waisiraeli pfawatendile ka IMNDEWA pfayamlaghitse Musa."