1 Kuya IMNDEWA kamlongela Musa, 2 "Mlongele Aruni na iwanaghe, wapfalangitse ipfinu pfenzeluke pfawolapfa Waisiraeli kuna nene, ili taghwa lyangu lihenzeluke lileke kulighighwa. Nene yuyo IMNDEWA."

3 "Pfipfila walongele apfino, mna pfeleko pfenu pfose, mtsukulu wowose wa lukolo lwenu yang'apfisoghelela habehi pfinu pfihenzeluke Waisiraeli pfawondapfila nene IMNDEWA aku mwenyegho keha, imunu ayo yabaghulighwe yakale kutali na nene. Nene yuyo IMNDEWA. 4 Mtsukulu wowose wa lukolo lwa Aruni yang'awa na ukoma au yang'alawa na udusi yaleke kuja pfinu ipfihenzeluke mbaka hayakuwa kela. Pfipfila yeye kakuwa keha ka yang'amkinda imunu iyetendile keha kwa kukinda ghamauti au kwa kumkinda imunu iyalawilighwe na shahawa, 5 au yang'achikinda chiumbe chochose ichitambala ichimtenda munu yehe au yang'amkinda imunu ayula iyomtenda yehe, kwa chinu chochose achila ichimtenda yehe. 6 Mtambika wowose iyokinda ipfinu apfo kakuwa keha mbaka nemihe na yaleke ukuja pfijo pfienzeluka mbaka hayakogha. 7 Litsuwa halikuswa, yeye kakuwa kela, na baho kodaha ukuja ipfijo pfihenzeluke kwaapfila acho chicho chijo chake. 8 Mtambika yaleke kumja imnyama iyafile imwenyegho au iyakomighwe na mnyama wa kumuhulo, kwaapfila yang'amja, ketenda mwenyegho yehe. Nene yuyo IMNDEWA."

9 "Iwatambika waikinde imiko yangu, ili waleke kutenda nzambi na kukomighwa kwa kulema kunihulikitsa. Nene na IMNDEWA yaniwatenda wele."

10 "Imunu wowose iyali si wa lukolo lwa watambika, ng'odaha baye ukuja chijo chienzeluke. Hata imunu mgheni au imtumwa iyakemighwe yamsang'anile imtambika, wose ng'awobamighwa baye ukuja chijo acho. 11 Lekeni ka imtambika kamghula imtumwa kwa sendi tsake yawe wake, au ka imtumwa kwoneka ukaye yake, ayo kodaha ukuja ichijo acho. 12 Ka mwana wa mtambika kakwelighwa na imunu yali si mtambika baye, ayo yaleke ukuja ipfijo ipfihenzeluke. 13 Ka imwana pinga we mtambika ka mghane au kalekighwa na mmale wake na kahela imwana, naye koya na kokala kwa aba wake ka pfayakalile mwali, ayo kodaha ukuja ichijo cha aba wake, lekeni mgheni wowose yaleke ukuja ichijo acho."

14 "Ka munu yungi kakuja ichijo chienzeluke aku ng'omanya baye chayotenda, imunu ayo yoitse ichijo chayajile na yongetse asilimia ishilini ya ichinu acho, na yamwing'e imtambika. 15 Iwatambika waleke kupfitenda pfihe ipfijo apfila pfenzeluke Waisiraeli pfawondapfila nene IMNDEWA, 16 kwa kuwalekelela iwanu wangi wapfije ipfijo apfo. Wang'atenda apfo, wakuwa watotsa ghendo na wobamighwa kuitsa ipfijo pfenzeluke pfawajile. Nene na IMNDEWA yanipfitenda ipfijo apfo pfezeluke."

17 Kuya IMNDEWA tsakamlaghitsa Musa, 18 "Mlongele apfino Aruni na iwanaghe na Wisiraeli wose, imunu wowose ayula yawe Muisiraeli au yawe imgheni yamkala naye yang'alapfa imnyama wa ukulakatsighwa, yawe wa kulawila laghano lyayekile, au yawe wa kumlapfila hela Imulungu, 19 kobamighwa yaghale ing'ombe mmale au ing'unzu au mvulati iyenelele ili yatogholighwe. 20 Mwiko ukumlapfa imnyama yang'enelele, kwaapfila hamtsomlapfa nene sitsomtoghola baye. 21 Imunu wowose iyomlapfila IMNDEWA imnyama kulawa kwa iwang'ombe wake au kulawa kwa iwamene wake wa ukukala tseghamba na yeye. 22 Uleke kumlapfila IMNDEWA mnyama wowose iyali chifita, au iyali chimbete, iyabeneke, au iyolawa udusi, au yane pfilonda, uleke kuwalapfa awo wawe wa kulakatsighwa kwa ghumoto mna imatsabahu IMNDEWA. 23 Kodaha kundapfila hela Ing'ombe au imwana we ing'olo yane mghulu mtali au yane mghulu mghuhi, lekeni mleke kundapfila imnyama ka ayo yawe wa kutimitsa laghano lyanyikile. 24 Mleke kumlapfila IMNDEWA imnyama iyahondighwe, au iyaghanighwe au iyatulighwe tsimbeghu tsake. Mwiko ukutenda apfi muisi mwenu."

25 "Kuya mleke kubokela iwanyama ka awo kulawa kwe iwagheni na kundapfila nene wawe chijo changu. Hamtsondapfila awo, nene sitsowatoghola baye kwaapfila wawo watsilapfa tsimumbu tsawo, apfo wana chilema."

26 Kuya IMNDEWA kamlongela Musa, 27 "Imwana we ng'ombe au imwana ng'olo au imwana we mene yang'oneka, kobamighwa yakale na mai wake kwa ghamatsuwa saba. Haghomala ghamatsuwa agho, kodaha kumlapfila IMNDEWA yawe wa kulakatsighwa kwa ghumoto. 28 Lekeni uleke kumsubutula ing'ombe au ing'olo mna litsua limwe hamwe na imwanaghe."

29 "Haundapfila nene IMNDEWA imnyama wa kunongela mighede, umlapfe ka apfila pfaibamighwa ili utogholighwe. 30 Muije inyama yake mna litsua lilyo hayolapfighwa, inyama yake ileke kukala mbaka hamitondo. Nene yuyo IMNDEWA."

31 "Apfo mghakinde na mghatende ghamalaghitso ghangu. Nene yuyo IMNDEWA. 32 Mleke kuliligha taghwa lyangu henzeluka, iwanu wose wa Isiraeli wobamighwa wamanye ka nene namwenzeluka. Nene IMNDEWA yuyo yaniwatenda mwemwe mwenzeluke, 33 yaniwalapfile Misiri ili niwe Imulungu wenu. Nene yuyo IMNDEWA."