1 Kuya IMNDEWA kamlongela Musa mna chidunda cha Sinai, kamlongela, 2 "Walongele apfino Waisiraeli, hamtsopfika mna isi yanimwing'ani nene IMNDEWA iwe yenu chila mwaka ghwa saba mulileke lidongo libwihile, lileke kulimighwa. Aghwo mwaka ghwe lidongo kubwihila kwa IMNDEWA. 3 Kwa miyaka sita mtsolima, na mtsohanda na mtsosangulila mitsabibu yenu na mtsopfuna nzabibu tsenu. 4 Lekeni mna ghumwaka ghwa saba mlileke lidongo libwihile, aghwo mwaka ghwa kubwihila kwe IMNDEWA. Mleke kuhanda chochose wala kusangulila imighunda yenu ya mitsabibu. 5 Chinu chochose ichikota chenyegho mleke kuchipfuna wala mleke kubawa nzabibu kulawa mna minzabibu ila ng'ana isangulighwe baye. Aghwo ghutsakuwa mwaka ghwa kulileka lidongo libwihile ghendo."

6 "Lekeni mwodaha ukuja ipfijo pfose ipfikota pfenyegho mna ghumwaka aghwo ghwa kubwihila, mtsakuja mwemwe wenyegho, iwatumwa wenu, na iwanu yamuwakemile watse kumsang'anilani na iwagheni wamkala nawo. 7 Pfipfila iwanyama wenu wamfugha na awala wa kumuhulo iwali mna isi yenu, nawo watsakuja ipfijo apfo pfa ghumwaka aghwo."

8 "Mtsopeta Sabato saba tse miyaka, miyaka saba mala saba, yoseyose itsakuwa miyaka alubaini na tisa. 9 Kuya mna litsuwa lya kumi lya ghumwetsi ghwa saba, mna litsuwa lya nene Imulungu kwilamlitsa ne iwanu, mtume munu yatoe malati muisi mwose. 10 Mghubaghule ghumwaka ghwa hamsini ghuwe mwaka ghwa ukulekelighwa kwe watumwa. Ghumwaka aghwo ghuwe ghwa ukudeng'elela Jubilei. Chila munu katsakuitsilighwa imali yake iutsighwe, na chila munu iyautsighwe yawe mtumwa katsakuya kwe wanu wake. 11 Ghumwaka aghwo ghwa hamsini ghutsakuwa ghwa Jubilei kuna mwemwe, mghukumbuke na mghudeng'elele. Apfo mleke kuhanda mbeghu, wala kupfuna chochose achila ichimela chenyegho, wala kubawa nzabibu mna minzabibu ng'ana isangulighwe. 12 Kwaapfila ghutsakuwa mwaka ghwa ukudeng'elela Jubilei, ghutsakuwa mwaka mwenzeluka kuna mwemwe. Apfo mtsakuja ipfijo ipfimela pfenyegho mmighunda. 13 Mna ghumwaka aghwo chila munu iyautsile mali au mghunda ghwake katsakuitsilighwa. 14 Ka koghula mghunda au ka komuutsila mghunda Muisiraeli miyagho, mleke kwibunza. 15 Imunu iyoghula ghumghunda kobamighwa yapete ibei ilingane ne miyaka ibitile kulawa jubilei, na ayula iyoutsa ghumghunda aghwo kobamighwa yapete ibei ilingane ne miyaka ya ghamapfuno ng'ana ghumghunda ghuitsighwe kuna imwenyegho mna ghumwaka ghwa jubilei. 16 Miyaka ayo ing'awa mingi kutsakongetsa ibei, na ka miyaka ayo midodo kutsohungutsa ibei, kwaapfila ibei yake itsakwikighwa kulingana ne ipfijo pfayokuutsila. 17 Mleke kwibunza, ila mumpfuke Imulungu wenu. Nene yuyo IMNDEWA, Imulungu wenu."

18 "Apfo muikinde imiko yangu na mghakinde ghamalaghitso ghangu na mghatende, namwe mtsokala tseghamba muisi. 19 Nayo isi itsomela ipfijo, namwe mtsakuja na ukwighuta na mtsokala tseghamba muisi."

20 "Na ka mtsakwalangula mwolonga, ‘Lelo tutsakuja choni mna ghumwaka ghwa saba ka ng'atuhanda wala ng'atupfuna ipfijo pfetu baye?’ 21 Nene nitsoibaliki isi mna ghumwaka ghwa sita, nayo itsomela ipfijo bwelele, napfo pfitsowenela kwa miyaka midatu. 22 Hamuhanda mna ghumwaka ghwa nane, mwemwe mtsakuja ipfijo pfampfunile ghumwande. Namwe mtsoghendelela ukuja ipfijo apfo mbaka hampfuna keli mna ghumwaka ghwa tisa."

23 "Mwiko ghendo kuutsa mghunda lumwe kwa lumwe, kwaapfila isi mali yangu namwe mwa wahenza na wabita nzila muisi mwangu. 24 Mghunda haghuutsighwa, imunu youtsa yawe na haki ya kughukombola. 25 Ka ndughu yako ka muhingwa, na kautsa mghunda ghwake, ndughu yake wa habehi ghendo kodaha kughukombola mghunda aghula ghwautsile ndughu yake. 26 Lekeni ka imunu ayo kahela ndughu wa habei iyodaha kughukombola, lekeni hambele kapata mali keli na kodaha kughukombola mghunda ghwake, 27 katsopeta miyaka kulawa hayaghuutsile na kuliha ichibamighwa, na imunu ayula iyaghughulile mghunda kobamighwa yoyitse mghunda aghwo. 28 Lekeni ka ng'odaha kughukombola, itsosighala mna ghamoko gha ayula iyaighulile mbaka ghumwaka ghwa chihungo cha ukumbusho wa miyaka hamsini. Mna ghumwaka aghwo imali ayo ilekelighwe na iyuitsighwe ayula iyautsile."

29 "Imunu yang'autsa ng'anda yake iili mghati mwa ghumji ighutsungulusighwe ubanda, kodaha kuikombola mna chipindi cha ghumwaka ghumwe kulawa hayaiutsile. Kwa ghumwaka aghwo mghima katsakuwa na haki ya kuikombola. 30 Ka ing'anda iili mghati mwa ghumji iitsungulutsighwe ubanda ng'aikombolighwe baye kwa ghumwaka ghumwe, itsakuwa mali ya ayula iyaighulile kwa matsuwa ghose mna pfeleko pfawo pfose, wala ng'aitsoyutsighwa mna ghumwaka wa chihungo cha ukumbusho wa miyaka hamsini. 31 Lekeni ng'anda itsili mna pfijiji ing'apfitsungulusighwe ubanda tsitsakuwa hasi mwe malaghitso ghaghala gha isi, tsing'anda atso tsodaha kukombolighwa kwa ghumwaka ghumwe lekeni tsiyuitsighwe mna ghumwaka ghwa chihungo cha ukumbusho wa miyaka hamsini. 32 Hata apfo, ng'anda itsili mna mibululu ya Walawi tsodaha kukombolighwa chipindi chochose. 33 Ka ing'anda ya Mlawi iusighwa na ng'ayuitsighwe baye, yobamighwa yuitsighwe mna ghumwaka ghwa chihungo cha kukumbuka miyaka hamsini, kwaapfila tsing'anda itsili mna mibululu ya Walawi iweng'ighwe iwe yawo kulawa kwa Waisiraeli. 34 Lekeni mighunda ya kudimila iiwatsunguluka Walawi ilekighwe kuutsighwa, kwaapfila awo uhatsi wawo ghamatsuwa ghose."

35 "Ka miyagho kawa muhingwa mbaka ng'odaha baye kwitunza imwenyegho yang'awa hamwe naghwe, umtunze yaghendelele kukala naghwe, mtendele ka mhenza iyali ukaye yako. 36 Uleke kubama liba au faida kulawa kuna yeye. Ila mpfuke Imulungu, naye ndughu yako yakale hamwe naghwe. 37 Uleke kukopesa kwa liba au kumwing'a ichijo ili yakulihe faida. 38 Nene yuyo IMNDEWA, Imulungu wako yanikulapfile mna isi ya Misiri ili kukwing'a isi ya Kanaani, kuya nene niwe Imulungu wako."

39 "Ka ndughu yako iyokala habehi naghwe kawa muhingwa, yang'eutsa kuna ghweghwe, uleke kumtenda yakusang'anile ka mtumwa. 40 Katsokala naghwe ka mtumwa iyolihighwa sendi au ka munu iyali mna ghumwanza. Katsokusang'anila mbaka ghumwaka ghwa chihungo cha miyaka hamsini. 41 Ghumwaka aghwo umleke yoke kwa ndughu tsake na ulisi we iwabala wake umlekele, hamwe ne iwanaghe. 42 Kwaapfila Waisiraeli watumighwa wangu yaniwalapfile Misiri, lelo waleke kuutsighwa ka watumwa. 43 Uleke kumtawala ndughu yako kwa ukali, ila umpfuke Imulungu wako. 44 Ka kobama watumwa, kodaha kuwaghula kulawa mna isi tsingi tsa habehi. 45 Kuya kodaha kughula iwatumwa kulawa kwa wahenza iwokala hamwe naghwe na iwanu wawo iwelekighwe muisi mwenu, nawo watsakuwa uhala wenu. 46 Iwatumwa awo kodaha kuweng'a iwanagho wawe uhala wawo ghamatsuwa ghose. Hawo kodaha kuwatenda watumwa wako, lekeni ndughu yako Mwisiraeli uleke kumtawala kwa ukali."

47 "Ka muhenza iyokala namwe kawa na mali na ndughu yako kawa mhingwa na kwiutsa kwe imunu mayo au kwe ndughu we imunu ayo, 48 kodaha kukombolighwa. Yumwe wa ndughu tsake kodaha kumkombola, 49 au mtumba wake, au binamu yake, au ndughu yake wa habehi mna lukolo lwake kodaha kumkombola, pfipfila yang'awa na mali kodaha kwikombola mwenyegho. 50 Yeye na ayula iyamghulile watsopeta miyaka kulawa hayeutsile mbaka ghumwaka wa kukumbuka miyaka hamsini. Bei ya kulekelelighwa kwake itsolingana na miyaka ila iyamtumikile. Ghamatsuwa ghayakalile mtumwa wa imtwatsa wake ghatsopimighwa ka ghamatsuwa gha mtumwa wa kulihighwa sendi. 51 Ka miyaka iisighale mbaka ghumwaka ghwa ukumbusho wa miyaka hamsini ing'ali mingi, katsoyuitsa sendi nyingi ka bei iyaghulilighwe nayo. 52 Ka miyaka ihunguka ng'ana ichipfike chihungo cha ukukumbuka miyaka hamsini, katsopeta sendi ya bei iisighale kulingana ne miyaka ayo na kumliha fidia ayo. 53 Ghamatsuwa ghose hayokala kwa imtwatsa wake yatendelighwe ka mtumwa wa kulihighwa sendi chila mwaka. Ayo iyamghulile yaleke kumtendela kwa ukali. 54 Lekeni ka imunu ayo na kaye yake ng'awakombolighwe kwa tsinzila atso tsose, yalekelelighwe mna ghumwaka ghwa ukukumbuka miyaka hamsini. 55 Waisiraeli watumishi wangu, kwaapfila tsaniwalapfa mna isi ya Misiri. Nene yuyo IMNDEWA, Imulungu wenu."