1 IMNDEWA kamlongela Musa, 2 "Walongele apfino Waisiraeli, munu wowose, yawe Muisiraeli au yawe mgheni iyokala namwe, iyomlapfa mwanaghe yamsang'anile mlungu Moleki katsotowighwa na ghamabwe na iwanu mbaka yafe. 3 Nene mwenyegho nitsomwing'a chisogho imunu ayo na nombaghula yakale kutali na wanu wake, kwaapfila tsakamlapfa mwanaghe yamsang'anile imulungu Moleki, apfo kalitenda lihe Lihama lyangu Lienzeluke na kalighuma chinyala taghwa lyangu lienzeluka. 4 Ka iwanu iwali akaye yake ng'awakwalangula baye chayotenda imunu ayo na ng'awomtowa yafe baye, 5 nene mwenyegho nitsomuhigha yakomighwe imunu ayo na iwanu wose iwali akaye yake. Nitsombaghula yakale kutali na wanu wangu, yeye imwenyegho na wose iwandekile nene na kumghendela mlungu Moleki."

6 "Imunu wowose yowaghendela walaghutsi wa mitsimu na iwahawi, nitsomwing'a chisogho imunu ayo na nombaghula yakale kutali na wanu iwali akaye yake. 7 Lelo muwe wenzekuka, kwaapfila nene yuyo IMNDEWA, Imulungu wenu. 8 Mghakinde ghamalaghitso ghangu na kughatenda. Nene yuyo IMNDEWA yanimtendani muwe wenzeluka."

9 "Imunu wowose iyomlighita aba wake au iyomlighita mai wake, ayo yakomighwe. Ayo kehonza mwenyegho ahala idamu yake haitsomwaghika."

10 "Imunu yang'aghoghighwa ughoni na pinga wa miyaghe, wose weli wakomighwe."

11 "Imunu yang'awasa ne pinga yumwe wa aba wake, ayo komghuma chinyala aba wake, wose weli wakomighwe. Awo wehonza wenyegho ahala idamu yawo haitsomwaghika."

12 "Munu wowose yang'awasa na pinga wa imwanaghe, wose weli wakomighwe ghendo. Watenda chinu chihile ghendo. Awo wehonza wenyegho ahala idamu yawo haitsomwaghika."

13 "Munu wowose yang'awasa na mmale miyaghe ka pinga wake, wose weli wakomighwe kwaapfila watenda chinu chihile ghendo. Awo wehonza wenyegho ahala idamu yawo haitsomwaghika."

14 "Imunu yang'amkwela ipinga hamwe na mai wake, ayo katenda chinu chihile ghendo. Wose wadatu walakatsighwe kwa ghumoto kwaapfila chawatendile chiha. Muwatendele apfo ili kuleke kulawila ghehile mna mwemwe."

15 "Immale wowose yang'awasa na immnyama, imunu ayo na imnyama ayo wose wakomighwe."

16 "Ipinga yang'amseghelela imnyama ili yawase naye, ipinga ayo na imnyama ayo wose wakomighwe. Awo wehonza wenyegho ahala idamu yawo haitsomwaghika."

17 "Imunu yang'amkwela lumbu wake, imwana iyelekighwe kunze na aba wake au imwana iyamweleke kunze mai wake, nawo wang'awasa hamwe, acho chinyala ghendo, awo watsowingighwa wakale kutali ne iwanu wawo kwaapfila kawasa na lumbu wake. Immale ayo katsoliha kwa ichinu acho chihile chayatendile."

18 "Immale yang'awasa na ipinga yali mna ghamatsuwa ghake, wose weli watsowingighwa wakale kutali na iwanu wawo, kwaapfila immale ayo kaghubula kuhisi kwake pfakuli na ipinga ayo kalangusa idamu yake pfailawa. 19 Uleke kuwasa na mai wako mdodo, au mai wako mkulu, wala uleke kuwasa na shangatsi yako, kwaapfila awo ndughu tsako ghendo. Wose awo watsoliha kwa ichinu acho chihile chawatendile. 20 Imunu yang'awasa na ipinga wa aba wake mkulu au aba wake mdodo, ayo kamghuma chinyala aba wake mkulu au aba wake mdodo. Wose awo watsoliha kwa chinu acho chihile chawatendile na watsakufa bila ukweleka wana."

21 "Imunu yang'amkwela pinga wa mdodo wake au mkulu wake aku mdodo wake au mkulu wake kamghima, ayo komghela chinyala ndughu yake, wose weli watsakufa aku wahela wana, kwaapfila watenda chinu chihile."

22 "Mghakinde ghamalaghitso ghangu ghose na imiko yangu hela isi yanitsomghalani itsomdekani. 23 Mleke ukwigha pfihendo pfe wanu waniwawinga iwali hambele yenu, kwaapfila wawo tsawatenda agho ghose, na nene nowahila ghendo. 24 Lekeni tsaniwalongela, ‘Mtsosola isi yawo, nene nitsoweng'a isi yawo iwe yenu, isi inoghile kwa ukulima na ukufughila.’ Nene yuyo IMNDEWA, Imulungu wenu yaniwabaghule mkale kutali na wanu wa isi tsingi."

25 "Apfo mwobamighwa mdahe kumtanga imnyama iyanoghile na iyehile na chideghe iyehile na iyanoghile. Mleke kwitenda mwiha kwa ukuja imnyama yehile au chideghe yehile au chiumbe chochose ichitambala muisi, awala waniwalongele mwiko mwemwe kuwaja. 26 Kwaapfila nene IMNDEWA nienzeluka, na nene niwabaghula mwemwe na iwanu wa isi tsingi ili muwe wangu, namwe muwe waenzeluka."

27 "Imunu wowose ayula yawe mmale au yawe ipinga yang'alaghula au yang'awa mhawi, ayo mumkome kwa kumtowa na ghamabwe. Ayo kehonza mwenyegho ahala idamu yake haitsomwaghika."