1 IMNDEWA kamlongela Musa, 2 "Walongele Waisiraeli apfino, mna pfihungo pfangu nene IMNDEWA iyanipfisaghule mtsakuwa na mtingano mwenzeluka. Apfino pfipfo ipfihungo pfangu."

3 "Mtsosang'ana ghamatsuwa sita. Lekeni litsuwa lya saba litsakuwa lya Sabato, tsuwa lya kubwihila ghendo, ng'amtsosang'ana baye na mtsakuwa na mtingano mwenzeluka, mleke kutenda sang'ano yoyose, alyo litsuwa lya kubwihila kuna nene IMNDEWA hohose hamkala."

4 "Pfihungo pfangu pfingi nene IMNDEWA Pfipfo apfino, mtsakuwa na mitingano mienzeluka yamtsoitowela malati mna pfipindi pfake."

5 "Ghumwetsi ghwa mwanduso, tsuwa lya kumi na nne nemihe, litsakuwa litsuwa lya Pasaka kuna nene IMNDEWA. 6 Tsuwa lya kumi na tano lya ghumwetsi ghugho litsakuwa tsuwa lya Chihungo lya IMNDEWA lya pfighate ipfilihela hamila, mtsopfija pfighate apfo kwa ghamatsuwa saba. 7 Mne litsuwa lya mwanduso mtsakuwa na mtingano mwenzeluka. Mleke kusang'ana. 8 Mna ghamatsuwa ghose saba, chila tsuwa mtsondapfila nene IMNDEWA inambiko ya kulakatsighwa kwa ghumoto. Mne litsuwa lya saba mtsotenda mtingano mwenzeluka. Mleke kusang'ana."

9 Kuya IMNDEWA kamlongela Musa, 10 "Walongele keli Waisiraeli apfino, hamtsakwingila mna isi yanimwing'ani na hampfuna ipfijo ipfili mumo, mghalileni imtambika kinza limwe lye pfijo pfamlimbula. 11 Litsuwa lya Sabato halimala, mna tsuwa lya keli, lmtambika yalinule mchanya na yalihighise hambele hangu ili liwe chitango cha kundapfila nene. 12 Mna litsuwa lilo lyamkwinula mchanya likinza, mwobamighwa mndapfile imwana mmale we ng'olo yane ghumwaka ghumwe yenelele yawe nambiko ya ukulakatsighwa. 13 Pfipfila mndapfile makimbo meli gha usaghe utighinike ghendo na une ghamapfuta gha nzeituni, mtsondapfila kwa kuulakatsa mna ghumoto, na ukulakala kwake kutsoninung'ila ghoya nene. Kuya mndapfile kimbo limwe lya dipfai, ayo itsakuwa nambiko ya chokunwa iilapfighwa kwa IMNDEWA. 14 Namwe mleke ghendo ukuja chighate wala ingano itsingighwe wala ingano ing'aikomale baye mbaka halipfika litsuwa alyo, aho hamtsoghala na kundapfila nene ipfinu apfo. Mlikinde laghitso lino mna pfeleko pfenu pfose na kwokwose kula kwamkala."

15 Mtsopeta majuma saba kulawa mna litsuwa alila lyakeli halimala litsuwa lya Sabato, litsuwa hamnighalile likinza lye ngano na kundapfila nene IMNDEWA. 16 Mtsopeta matsuwa hamsini mbaka mna litsuwa lya kabili lya litsuwa lya Sabato ya saba, namwe mndapfile nambiko ya usaghe wa sambi. 17 Mwobamighwa kumghalila imtambika pfighate pfili kulawa mna tsikaye tsenu ili yakapfinule mchanya. Chila chighate mchambike kwa makimbo meli gha usaghe iughumighwe hamila, napfo mtsondapfila nene IMNDEWA kulawa mna ingano yamlimbula. 18 Hamtsolapfa ipfighate apfo, pfipfila mlapfe wana saba we ng'olo wane ghumwaka ghumwe na wenelele, na mlapfe ng'ombe yumwe mmale, na ng'unzu weli, wose wawe wahela chilema wala chilonda. Wanyama awo wose watsakuwa nambiko ya kulakatsighwa hamwe na nambiko ya usaghe na idipfai ipfilapfighwe kuna nene. Ukulakala kwa ipfinu apfo koninung'ila ghoya nene IMNDEWA. 19 Pfipfila mumsubutule mvulati yumwe, ayo yawe nambiko ya ukuleghusa nzambi tsenu na msubutule iwana weli we ng'olo wane ghumwaka ghumwe, awo wawe nambiko ya ukukala tseghamba na nene. 20 Mtambika katsowenula yawahighise iwana awo weli we ng'olo kulangusa ka walapfighwa kuna nene, hamwe na pfighate pfili ipfilapfighwa kuna nene kulawa mna ingano yamlimbule. Ipfinu apfo pfenzeluka ghendo kuna nene, na pfitsakujighwa na imtambika yaliyeka. 21 Mna litsuwa alyo mleke kusang'ana ng'onde yoyose ila, lekeni mwitingane mnitamanile nene. Pfeleko pfenu pfose pfikinde malaghitso ghano ghamatsuwa ghose, hohose hamkala.

22 "Hambeta ipfijo ipfili mna isi yenu, mwiko kubawa mbaka mna imibaka ya mighunda yenu, wala mleke kuya kuchughu kusalalitsa ipfijo ipfilekighwe. Ipfijo apfo muwalekele iwahingwa na iwahenza. Nene yuyo IMNDEWA, Imulugu wenu."

23 Kuya IMNDEWA kamlongela Musa, 24 "Walongele Waisiraeli apfino, mlibaghule litsuwa lya mwanduso mna ghumwetsi ghwa saba, liwe tsuwa lya kubwihila, na mlikumbukeghe kwa kutowa tsimalati, namwe muwe na mtingano mwenzeluka mnitambikile mna litsuwa alyo. 25 Mleke kusang'ana ng'onde yoyose mna litsuwa alyo, namwe mtsondapfila nene IMNDEWA wenu nambiko ya ukulakatsighwa."

26 "IMNDEWA kamlongela Musa, 27 Mlibaghule litsuwa lya kumi mna ghumwetsi ghugho ghwa saba liwe Tsuwa lya Ulamlitsi. Mna litsuwa alyo msinde ne nzala, mwitingane hamwe na mndafile nene IMNDEWA nambiko tsa kulakatsighwa. 28 Mleke kusang'ana ng'onde yoyose mna litsuwa alyo, kwaapfila mna litsuwa alyo lya ulamlitsi nzambi tsenu tsileghusighwe hambele he Imulungu. 29 Munu wowose iyang'osinda ne nzala mna litsuwa alyo, yabaghulighwe yakale kutali ne iwanu wake. 30 Munu wowose iyosang'ana mna litsuwa alyo yakomighwe. 31 Mleke kusang'ana ng'onde yoyose, mlikinde laghitso lino mna ghamatsuwa ghenu ghose ghamkala, na kokose akula kwamkala. 32 Mna litsuwa alyo mwemwe mtsobwihila ghendo na mtsosinda ne nzala. Litsuwa alyo litsakwanza nemihe mna litsuwa lya tisa lya ghumwetsi aghwo na litsomala nemihe mna litsuwa lya kumi."

33 Kuya IMNDEWA kamlongela Musa, 34 "Walongele Waisiraeli apfino, mna litsuwa lya kumi na tano lya ghumwetsi ghugho ghwa saba mwanze kumtendela IMNDEWA chihungo cha pfibumbulika. Mchitende chihungo acho kwa matsuwa saba. 35 Mna litsuwa lya mwanduso mwemwe mwitingane hamwe mnitambikile nene, na mleke kusang'ana ng'onde yoyose. 36 Chila tsuwa mna ghamatsuwa agho saba mtsondapfila nambiko tsa ukulakatsighwa mna ghumoto. Mna litsuwa lya nane mwitingane keli hamwe mnitambikile nene na mndapfile nambiko tsa ukulakatsighwa. Agho mtingano mwenzeluka, mghwalangitse na mleke kusang'ana mna litsuwa alyo."

37 "Apfino pfipfo pfihungo pfa IMNDEWA pfayapfisaghule, namwe mtsowakema iwanu wetingane hamwe na wanitambikile nene. Nawo watsondapfila nambiko tse wanyama tsa ukulakatsighwa na watsondapfila ipfijo pfawo na idipfai, ka pfaibamighwa mna chila tsuwa. 38 Tsinambiko atso tsamndapfila nene, atso tsa nyongetsa mna tsinambiko atsila tsamndapfila mna Litsuwa lya Sabato, na tsamlapfa matsuwa ghose, na tsa nyongetsa mna tsinambiko atsila tsamndapfila ka pfamwilahile, na atsila tsamndapfila nene IMNDEWA kwa ukubama wenyegho."

39 "Hammalitsa kubeta ipfijo mna imighunda yenu, mtende chihungo kwa matsuwa saba, mwandusile litsuwa lya kumi na tano mna ghumwetsi ghwa saba. Litsuwa lya mwanduso litsakuwa lya kubwihila, pfipfila na litsuwa lya nane. 40 Mna litsuwa lya mwanduso mghondole ghamatunda kulawa mna mibiki inoghile, mghane maputila ghe mitende, maputila ghe mibiki ine mitsani mingi, na maputila gha imibiki iikota mmbalimbali mwe mito, namwe mtsenge pfibumbulika. Kuya mchideng'elele chihungo acho kwa matsuwa saba hambele he IMNDEWA, Imulungu wenu. 41 Chila mwaka mumtendele IMNDEWA chihungo chino kwa matsuwa saba. Alino laghitso lya kukindighwa na pfeleko pfenu ghamatsuwa ghose. Mchitende mna ghumwetsi ghwa saba. 42 Kwa matsuwa saba mtsokala mna pfibumbulika. Iwanu wose wa Isiraeli watsokala mna pfibumbulika matsuwa agho, 43 ili pfeleko pfenu pfimanye ka haniwalapfile iwabala wenu mna isi ya Misiri, tsaniweka wakale mna pfibumbulika. Nene yuyo IMNDEWA, Imulungu wenu."

44 Naye Musa kawalongela Waisiraeli ipfihungo apfo pfe IMNDEWA.