1 IMNDEWA kamlongela Musa, 2 "Mlongele Aruni na iwanaghe na uwalongele iwanu wose wa Isiraeli. IMNDEWA kolaghitsa apfino, 3 munu wowose yang'amsubutula nambiko ya ng'ombe au ya ng'olo au ya mene mna ndalo yenu au kunze kwa ndalo yenu, 4 naye ng'amghalile baye mnyama ayo hana ghumlango ghwa Lihema lya ukwitinganila ili kumlapfila IMNDEWA hambele ha Lihema Lienzeluke, imunu ayo katotsa kwa kuimwagha idamu hela, naye katsobaghulighwa na iwanu wake. 5 Kwaapfila laghitso lino lyowalongotsa Waisiraeli waleke kuwasubutula iwanyama wawo mna mighunda. Wobamighwa wawaghale kwa Imtambika hana ghumlango ghwa Lihema lya ukwitinganila, naye katsowasubutula na kumlapfila Imulungu ka nambiko tsa ukukala tseghamba ne IMNDEWA. 6 Apfo mtambika katsomitsa idamu mna matsabahu ya IMNDEWA iili habei na ghumlango ghwa Lihema lya ukwitinganila, naye koghalakatsa ghamapfuta ghawo ghamnung'ile ghoya IMNDEWA. 7 Apfo Waisiraeli watsoleka ghendo kuitambikila milungu ingi ya ughutsu iighala na wamene, chinu ichiwatendile waleke kuniwinza. Laghitso lino walikinde matsuwa ghose ghawokala, kulawa mweleko ghumwe mbaka mweleko ghungi."

8 "Uwalongele keli apfino, munu wowose iyali Muisiraeli au mgheni wowose ayula iyokala nawo, iyolapfa nambiko ya mnyama wa ukulakatsighwa au komlapfila chinu chingi, 9 lekeni ng'oighala baye hana ghumlango ghwa Lihema lya ukwitinganila ili kumlapfila IMNDEWA, imunu ayo yabaghulighwe ghendo na iwanu wake."

10 "Munu wowose ayula iyali Muisiraeli au mgheni wowose ayula iyokala nawo, ka kakuja idamu, nene nitsomghudubukila imunu ayo iyakuja idamu na nombaghula yakale kutali na iwanu wake. 11 Kwaapfila ughima wa chila chiumbe wa mna idamu. Na nene nimlaghitseni kuilapfa idamu mna imatsabahu ili kuulamlitsa ughima wenu na Imulungu, kwaapfila idamu iyo ighala ulamlitsi, na ughima wenu wa mna idamu. 12 Apfo tsaniwalaghitsa Waisiraeli apfino, munu wowose ayula iyali Muisiraeli au mgheni wowose ayula iyokala nawo yaleke ukuja idamu."

13 "Munu wowose iyali Muisiraeli au mgheni wowose iyokala namwe yang'aghenda kwibagho kuwinga imnyama au kutowa chideghe wa ukuja, kobamighwa yaimwaghe hasi idamu yake na yasole msanga yasile hasi. 14 Kwaapfila ughima wa chila chiumbe wa mna idamu. Apfo nene tsaniwalaghitsa Waisiraeli waleke kuja idamu ya chiumbe chochose achila kwaapfila ughima wa chiumbe chochose achila wa mna idamu yake. Na imunu wowose iyakuja idamu katsobaghuliwa."

15 "Munu wowose ayula yawe kwoneka mna isi ya Isiraeli au ka mgheni, naye kakuja ichinu ichifile chenyegho au kakuja ichinu ichikomighwa na mnyama wa kumuhulo, ayo kobamighwa yatsapfe ghamaghwanda ghake na yoghe, naye katsakwoneka keha mbaka nemihe haipfika. Kuya katsakuwa kela. 16 Lekeni ka ng'atsapfile baye maghwanda ghake na ng'oghile baye, ilitsompata alyo lyake."