1 Halipfikile tsuwa lya nane lya ukutendighwa Aruni ne wanaghe wawe watambika, Musa kamkema Aruni na iwanaghe na iwabala wa Isiraeli. 2 Kamlongela Aruni, "Usole mwana wa ng'ombe iyali mmale, ayo katsolapfighwa kwa Imulungu yaleghuse nzambi tsako, na usole ing'unzu, ayo katsolapfighwa yalakatsighwe, iwanyama wose wenelele. Kuya umlapfile IMNDEWA. 3 Walongele Waisiraeli wasole mvulati yumwe, ayo yawe wa nambiko ya ukuleghusa tsinzambi tsawo, na mwana yumwe wa ng'ombe na mwana yumwe wa ng'olo, wose wawe na ghumwaka ghumwe na wenelele, awo wolapfighwa wawe nambiko ya ukulakatsighwa. 4 Kuya usole ng'ombe mmale na ng'unzu, walapfighwe kwa IMNDEWA ili iwanu wakale tseghamba na yeye, wamlapfile hamwe na usaghe iuhanganyighwe na ghamapfuta. Mtende apfi kwaapfila leloli IMNDEWA katsowalawila." 5 Waisiraeli wapfighala pfinu pfose apfo hambele ha Lihema lya ukwitinganila ka pfayalaghitse Musa, na Waisiraeli wose waghenda kwima hambele ha IMNDEWA. 6 Musa kawalongela, "Achino chicho IMNDEWA chayamlaghitseni mchitende ili ukumwelukamweluka kwake kwoneke kuna mwemwe" 7 Kuya Musa kamlongela Aruni, "Ghenda kuna Imatsabahu, ukamlapfile IMNDEWA imwana wa ng'ombe ka nambiko ya ukuleghusa tsinzambi na ng'unzu iyolapfighwa ka nambiko ya ukulakatsighwa. Ung'atenda apfo, Imulungu katsokuleghusila nzambi tsako na nzambi tsa Waisiraeli wose. Utende ka IMNDEWA pfayakulaghitse." 8 Apfo Aruni kaghenda kuna Imatsabahu, kamsubutula imwana ayo wa ing'ombe iyamlapfile ili Imulungu yamleghusile nzambi tsake tsayatendile imwenyegho. 9 Iwanaghe wamghalila idamu yawaikingile, naye kapfabika chidole chake mna idamu ayo, katsibakatsa tsimembe itsili mna Matsabahu. Idamu ikalile kaimwagha hasi ha ghumlango ghwa Matsabahu. 10 Lekeni tsifigho na mapfuta ghake na likini na mapfuta ghake kaghalakatsa mna Imatsabahu ka IMNDEWA pfayamlaghitse Musa. 11 Kuya inyama ila na ngotsi yake kailakatsa kunze kutali na tsindalo tsawo. 12 Kuya Aruni kamsubutula ing'unzu wa nambiko ya ukulakatsighwa. Iwanaghe wamghalila idamu yawaikingile, naye kaimitsa mna Matsabahu chila ubali. 13 Kuya wanaghe wamghalila inyama ya ing'olo ayo ighanighwe mahundemahunde, na litwi lyake, naye kaghalakatsa mna Imatsabahu. 14 Kauhofugha usapi, maghondi keka mna Matsabahu, mahunde aghala gha ing'olo, kuya kaghalakatsa.

15 Kuya Aruni kawaghala iwanyama iwalapfighwe na iwanu. Kamsola na kamsubutula imene ayula iyalapfighwe na wanu ili Imulungu yawaleghusile nzambi tsawo. Kamlapfila Imulungu ka pfayatendile kwa ayula iyalongole. 16 Kuya kamghala imnyama iyalapfighwe yalakatsighwe, kamsubutula na kamlakatsa ka Imulungu pfayamlaghitse. 17 Pfipfila kaghala nambiko ya usaghe, kadegha ghawo limwe lya usaghe na kuulakatsa mchanya mwa Matsabahu hamwe na imnyama ayula iyochinjighwa na kulakatsighwa chila hamitondo. 18 Kuya Aruni kamsubutula ing'ombe mmale na ing'unzu iwalapfighwe na Waisiraeli ili wakale tseghamba na Imulungu. Iwanaghe wamghalila idamu yawaikingile, kaimitsa mna Matsabahu chila ubali. 19 Lekeni kasola ghamapfuta gha ing'ombe na ghe ng'unzu, mapfuta gha mkila na aghala ighaghubike usapi na aghala ighali mna tsifigho na likini, 20 na kagheka ghamapfuta agho mchanya mwe pfidali pfe iwanyama wano, naye kaghalakatsa ghamapfuta mna Matsabahu, 21 lekeni ipfidali pfila, na lihatsa lya mghulu ghwa kujilo, Aruni kapfinula hambele ha IMNDEWA ka Musa pfayalaghitse, Katenda apfo kulangusa ghendo ka iwanyama wose wa kwake yeye Imulungu. 22 Aruni hayamalitse kumsubutula imnyama wa kuleghusa nzambi, na ayula iyolapfighwa ili iwanu wakale tseghamba na Imulungu, na hayamalitse kumsubutula ayula iyolapfighwa yalakatsighwe, kenula ghamoko ghake kawabaliki, kuya kahulumka. 23 Musa na Aruni wengila mghati mwa Lihema lya ukwitinganila, hambele kuya walawa kunze, wawabaliki iwanu, na baho ghumng'alo ghwa IMNDEWA ghwoneka kwe iwanu wose. 24 Ghumoto ghulawile kwa IMNDEWA ghulawila na kulakatsa ipfinu pfose na ghamapfuta ghose ighali mna matsabahu. Iwanu wose hawonile ghumoto aghwo, wadeng'elela na watowa lukenze na wenama mbaka pfihanga pfawo pfidonza hasi.