1 IMNDEWA tsakamlongela Musa, 2 yawalongele iwanu wa Isiraeli apfino, munu yang'atenda nzambi aku ng'amanyile baye ka chayatendile nzambi, katenda achila ichighomighwe mna ghamalaghitso gha IMNDEWA, ayo yatende apfino.

3 "Ka imtambika mkulu yuyo iyatendile nzambi, naye kowahonza iwanu wose woneke wana nzambi, ayo yaghale mwana mmale wa ing'ombe iyenelele, yakamlapfile IMNDEWA ka nambiko ya ukumleghusila tsinzambi ili yamleghusile inzambi iyatendile. 4 Yamghale ing'ombe ayo habehi na ghumlango ghwa Lihema lya ukwitinganila, naye yeke ghumoko ghwake mwitwi mwa imwana mmale wa ing'ombe ayo na kumsubutula hambele ha IMNDEWA. 5 Imtambika mkulu ayo katsosola idamu chidogho na kwingila nayo mghati mwa Lihema lya ukwitinganila. 6 Katsopfabika chidole chake mna idamu ayo na kumitsa mala saba hambele ha IMNDEWA, hambele ha lipanziya ilighola hanu Haenzeluke na ihanu Haenzeluke Ghendo. 7 Imtambika mkulu ayo katsosola idamu chidogho yabake mna tsimembe itsisomoke tsa imatsabahu ya ukudusulila upfumba iunung'ila ghoya, baho hambele ha IMNDEWA, ili mghati mwa Lihema lya ukwitinganila. Idamu ikalile yaikutule hasi ha Imatsabahu, baho hapfilakatsighwa ipfinu ipfilapfighwa kwa Imulungu, haghuli ghumlango ghwa Lihema lya ukwitinganila. 8 Kuya yalapfe ghamapfuta ghose gha ing'ombe ayo, na ghamapfuta ighaghubike usapi, 9 tsifigho mbili na ghamapfuta ghake na ghamapfuta aghala ighali mchighudi, na ghamapfuta ghose ighaghubike likini. 10 Imtambika mkulu yasole ghamapfuta agho yaghalakatse mchanya mwa Imatsabahu. Yatende ka apfila pfayalapfile ghamapfuta kulawa kuna imnyama ayula iyalapfighwe ili imunu yakale tseghamba na IMNDEWA. 11 Lekeni yasole ingotsi ya ing'ombe ayo, inyama yake yose, litwi lyake, maghondi ghake, usapi wake na mipfi yake, 12 yakapfase kunze kutali na indalo yawo, hanu hayobama Imulungu, kuko kwalikwasighwa lipfu, yapfilakatse kwa ghumoto ghwa tsingodi."

13 "Ka iwanu wose wa Isiraeli watenda nzambi aku ng'awamanyile baye ka chawatendile nzambi, watenda chinu achila ichighomighwe mna ghamalaghitso gha IMNDEWA. Awo wose watotsa ghendo hata ka ng'awotanga baye ka watenda nzambi. 14 Hawotanga ka chawatendile nzambi, iwanu wose wamlapfile Imulungu mwana mmale wa ng'ombe, ili IMNDEWA yawaleghusile inzambi yawo. Wamghale mna Lihema lya ukwitinganila. 15 Iwakulu wawo weke ghamoko ghawo mwitwi mwa ing'ombe ayo, kuya wamsubutule hambele ha IMNDEWA. 16 Kuya Mtambika Mkulu ayo yasole idamu chidogho ya imwana mmale wa ing'ombe yaghale mghati mna Lihema lya ukwitinganila. 17 Katsopfabika chidole chake mna idamu ayo, kuya katsomitsa mala saba hambele ha IMNDEWA, hambele ha lipanzia ilighola Hanu Haenzeluke na Hanu Haenzeluke Ghendo. 18 Imtambika mkulu ayo katsosola idamu chidogho yabake mna tsimembe tsili mna imamtsabahu ya ukudusulila upfumba iunung'ila ghoya, hambele he IMNDEWA mghati mwa Lihema lya kwitinganila. Idamu ikalile yaikutule hasi ha imatsabahu ya ukulakatsila tsinambiko, hana ghumlango ghwa Lihema lya ukwitinganila. 19 Kuya katsolapfa ghamapfuta ghose ighali mna imnyama ayo yaghalakatse mchanya mwa Imatsabahu. 20 Apfo yamtende ing'ombe ayo ka pfayamtendile ing'ombe ayula immale iyalapfighwe kwa Imulungu kwa nzambi tsake tsayatendile. Ahala mtambika mkulu hayatsomalitsa kuwalamla na Imulungu na kuwatenda iwanu wele keli, baho Imulungu naye katsowaleghusila iwanu nzambi tsawo. 21 Kuya katsosola inyama ikalile ya ing'ombe ayo yakailakatse kunze kutali na indalo yawo, ka pfayamlakatse ing'ombe iyalapfighwe kwa nzambi tsake tsayatendile, ukulapfigwa kwa imnyama ayuno kowaleghusila Waisiraeli wose tsinzambi tsawatendile."

22 "Ka ichilongotsi wa Waisiraeli katenda nzambi aku ng'amanyile baye ka katenda nzambi, katenda ichinu ichighomighwe mna ghamalaghitso gha IMNDEWA, naye katotsa ghendo. 23 Na baho hayotanga ka katenda nzambi, yamghalile IMNDEWA mvulati iyenelele. 24 Yeke ghumoko ghwake mwitwi mwa imvulati ayo na yamsubutule hanu hawosubutulila iwanyama iwolakatsighwa. Yang'atenda apfo inzambi yake yoleghusighwa. 25 Imtambika Mkulu ayo katsopfabika ichidole chake mna idamu ikingighwe ya imnyama ayo kuya katsobakatsa mna tsimembe tsili ka tsa mnyama, itsisomoke mchanya mwa Imatsabahu ya ukulakatsila tsinambiko. Idamu ikalile yaikutule hasi ha Imatsabahu ayo. 26 Ghamapfuta ghose gha imvulati ayo yaghalakatse mchanya mwa Imatsabahu, ka pfayaghalakatse ghamapfuta gha imnyama ayula iyalapfighwe ili yakale tseghamba na Imulungu. Mtambika yang'atenda apfi, mtambika katsomlamlitsa na Imulungu na ichilongotsi kakuwa kahela nzambi."

27 "Imunu yungi wowose yang'atenda nzambi aku ngamanyile baye ka chayatendile nzambi, katenda chinu ichighomighwe mna malaghitso gha IMNDEWA, ayo katotsa ghendo. 28 Baho hayotanga ka chayatendile nzambi, yaghale mene mbughuma iyenelele, yakamlapfile Imulungu ili yamleghusile inzambi iyatendile. 29 Yeke ghumoko ghwake mwitwi mwa imene ayo na yamsubutule hanu ahala hawosubutulila wanyama iwolapfighwa walakatsighwe. 30 Imtambika katsopfabika chidole chake mna idamu ya imnyama na katsobakatsa mna tsimembe itsisomoke itsili ka tsa mnyama mchanya mwa Imatsabahu. Idamu ikalile katsoikutula hasi ha Imatsabahu. 31 Katsoghalapfa ghamapfuta ghose ighali mna imbughuma ayo ka pfayaghalapfile ghamapfuta gha imnyama ayula iyalapfighwe na imunu ili yakale tseghamba na Imulungu, naye Imtambika katsoghalakatsa mchanya mwa Imatsabahu, na kunung'ila kwake ghoya kutsomnoghelesa IMNDEWA. Imtambika yang'atenda apfo, komlamlitsa na Imulungu, imunu ayo kakuwa kahela keli nzambi, na baho inzambi yake ileghusighwa."

32 "Imunu ayo yang'amlapfila Imulungu imwana wa ng'olo kwa inzambi aila iyatendile, yamghalile ing'olo mbughuma iyenelele. 33 Kuya katsakwika ghumoko ghwake mwitwi mwa imwana wa ing'olo ayo na yamsubutule hanu hawosubutulila iwanyama iwolakatsighwa. 34 Imtambika katsopfabika chidole chake mna idamu ya imwana wa ing'olo ayo na katsobakatsa mna tsimembe itsisomoke itsili ka tsa mnyama mchanya mwa Imatsabahu. Idamu ikalile katsoikutula hasi ha Imatsabahu. 35 Kuya katsoghalapfa ghamapfuta ghose ighali mna imwana wa ing'olo ayo ka pfayaghalapfile ghamapfuta gha ing'olo ayula iyalapfighwe ili yakale tseghamba na Imulungu, naye Mtambika katsoghalakatsa mchanya mwa Imatsabahu ka nambiko ya chijo iilapfighwa kwa IMNDEWA. Mtambika yang'atenda apfo, komlamlitsa na Imulungu, na baho nzambi yake yakuwa ileghusighwa."