1 IMNDEWA tsakamlongela Musa, 2 "Ulonge ne iwanu wose wa Isiraeli, walongele apfino, muwe wenzeluka kwaapfila nene IMNDEWA wenu na Mwenzeluka."

3 "Chila munu mna mwemwe yamtegheletse mai wake na aba wake, namwe mwiikinde imiko yangu mna ghamatsuwa ghangu gha ukubwihila. Nene na IMNDEWA, Imulungu wenu."

4 "Mleke kuhunduka na kupfitambikila pfinyagho pfe milungu, wala mleke kwitendela milungu ya chuma. Nene na IMNDEWA, Imulungu wenu."

5 "Hamnilapfila nene IMNDEWA nambiko tse wanyama ili mkale tseghamba na nene, mnilapfile ka pfaibamighwa ili namwe mtogholighwe. 6 Inyama ya nambiko ayo ijighwe mna tsuwa lilila imnyama hayosubutulighwa au ijighwe mna tsuwa lya keli. Inyama yoyose ikala mbaka tsuwa lya kadatu ilakatsighwe mna ghumoto. 7 Ka inyama yake chidogho ijighwa mna tsuwa lya kadatu, ukutenda apfo kodesa, na imnyama ayo iyalapfighwe sitsomtoghola baye, 8 na imunu wowose iyakuja inyama ayo, alyo lwake, kwaapfila kachitenda chinu chienzeluke cha IMNDEWA chihe. Imunu ayo katsobaghulighwa yakale kutali ne iwanu wake."

9 "Hampfuna ipfijo pfenu ipfili mna isi yenu, mleke kupfuna ghendo mbaka hana ghumbaka ghwa mghunda ghwako, na mleke kuya kuchughu kutsalalitsa ipfijo pfamlekile. 10 Hampfuna nzabibu mna mighunda yenu, mleke kuya lwakeli kutsalalitsa nzabibu tsamlekile na mleke kudondola nzabibu itsilaghale hasi, tsinzabibu atso muwalekele iwahingwa ne iwagheni wamkala nawo. Nene na IMNDEWA, Imulungu wenu."

11 "Mleke kwiba."

"Mleke kulonga ughutsu."

"Mala kumbugha miyagho."

12 "Mleke kwilaha kwa litaghwa lyangu kwa ughutsu, mng'atenda apfo mwoliligha litaghwa lye Imulungu wenu. Nene na IMNDEWA, Imulungu wenu."

13 "Uleke kumbunza miyagho wala kumboka."

"Uleke kukala ne isendi ye munu iyakusang'anile ing'onde yako chilo chose mbaka nemitondo."

14 "Uleke kumlighita chitsiwi, wala uleke kwika chinu chochose ichimtenda munu chifita yekwale, lekeni mpfuke Imulungu wako. Nene yuyo IMNDEWA."

15 "Hamuhigha maghomba muhighe pfinoghile, mleke kumwonela libatsi imunu muhingwa wala kumpfuka iyali mkulu."

16 "Uleke kwanga akuno na akuno aku kwakwenetsa ung'enye kwe iwanu iwali hakaye yako."

"Uleke kumhonza miyagho yafe kwa kulonga mbuli tsako tsa ung'enye. Nene yuyo IMNDEWA."

17 "Uleke kumuhila ndughu yako mmoyo mwako, kobamighwa ummanile miyagho ili hayototsa totso lyenu lileke kuwa limwe."

18 "Uleke kumuitsila chihile chayokutendela miyagho, na uleke kukala na fondogholo na yumwe we iwanu wako, lekeni umkunde miyagho ka pfawikunda ghumwenyegho. Nene na IMNDEWA, Imulungu wako."

19 "Mghakinde malaghitso ghangu. Uleke kumleka mnyama wako imnyama wa aina ingi yambebese. Mumghunda mwako uleke kuhanda mbeghu tsa aina mbili. Uleke kupfala ghwanda ilidadatsighwe kwe tsinyutsi tsa aina mbili."

20 "Immale yang'awasa na pinga iyali mtumwa, naye kalapfighwa tsengele na mmale yungi lekeni yang'ali kukombolighwa na mmale wake iyamlapfile tsengele wala yang'ali kulekelighwa yoke, Immale iyawasile naye na yeye wose watsohighighwa, lekeni waleke kukomighwa kwaapfila ipinga ayo yang'ali kulekelighwa yoke. 21 Immale ayo katsongalila ing'unzu habei na Lihema lya ukwitinganila, kolapfighwa ka nambiko ya nzambi ili yawe wa kuleghusa nzambi tsayatendile. 22 Mtambika katsomsubutula ing'olo ayo na kondapfila nene Imulungu, na nene nomleghusila inzambi iyatendile."

23 "Hamtsopfika isi ya Kanani na kuhanda mibiki yoyose ya ghamatunda, mghomighwa kughaja ghamatunda ghawo kwa miyaka midatu. 24 Lekeni mna ghumwaka wa kane ghamatunda ghake ghakuwa ghaenzeluka, ghatsolapfighwa kwe Imulungu ghawe gha kumlongela mighede. 25 Mna ghumwaka ghwa tano mwodaha kughaja ghamatunda agho, na mibiki yenu itsakweleka ghamatunda mengi. Nene yuyo IMNDEWA, Imulungu wenu."

26 "Mleke ukuja inyama yoyose ine idamu. Mleke kulaghula wala kutenda uhawi."

27 "Mleke kugheta tsivili tsenu mmbalimbali mwa litwi, wala kugheta ndepfu tsenu."

28 "Mleke kwisanza sale mlukuli mwenu ili mwoneke mwowadomboketsela iwanu wafile au kwika pfitango mlukuli mwenu. Nene yuyo IMNDEWA."

29 "Uleke kumghuma chinyala neghe wako kwa kumtenda yawe pinga chiweghe, ung'atenda apfo isi yose itsomema uweghe we wanu na ghehile ghe wanu."

30 "Mghakinde ghamatsuwa ghangu gha kubwihila na mlipfuke Lihema lyangu Lienzeluke. Nene yuyo IMNDEWA."

31 "Mleke kwitenda mwiha kwa kuwaghendela wane mitsimu au iwahawi na kuwalomba wawalaghulile. Nene yuyo IMNDEWA, Imulungu wenu."

32 "Wime wima haukala ne iwanu wabala na uwahulikitse iwanu iwakubitile imiyaka, na mnipfuke, nene yuyo IMNDEWA."

33 "Ka kokala na munu mgheni mna isi yako, uleke kumtendela pfihile. 34 Kobamighwa kumtendela imunu mgheni ka pfaumtendela Muisiraeli miyagho, umkunde ka pfawikunda mwenyegho kwaapfila mwemwe namwe tsamwawagheni mna isi ya Misiri. Nene na Imulungu wenu."

35 "Mlamle pfinoghile ahala hamlinga utali, hampima utsito na hampima ukumema kwe pfinu. 36 Na mtumile mizani ya haki. Nene yuyo IMNDEWA, Imulungu wenu, iyaniwalapfile mna isi ya Misiri. 37 Mghakinde na kughatenda ghamalaghitso ghangu. Nene yuyo IMNDEWA."