1 IMNDEWA tsakamlongela Musa, 2 "Walongele apfino iwanu wa Isiraeli, Nene na IMNDEWA, Imulungu wenu. 3 Mleke ukutenda ka pfawotenda iwanu wa Misiri ako kwamkalile, wala mleke ukutenda ka pfawotenda iwanu wa Kanani ako kwanimghalani. Mwiko ghendo ukutenda aghala ghawotenda wawo. 4 Mwemwe mwobamighwa kughakinda malaghitso ghangu na imiko yose yaniwalongele. Nene na IMNDEWA, Imulungu wenu. 5 Mwobamighwa mghakinde malaghitso na imiko yangu. Imunu yang'akinda ghamalaghitso ghangu na imiko yangu, katsoukombola ughima wake. Nene na IMNDEWA."

6 "Munu wowose yaleke kuwasa na ndughu yake wa habehi. Nene IMNDEWA yanilaghitsa apfo. 7 Uleke kumghela chinyala aba wako kwa ukuwasa na mai wako. Ayo mai wako, uleke kuwasa naye."

8 "Uleke kumghela chinyala aba wako kwa ukuwasa na pinga wake wowose ayula, awo mai tsako."

9 "Uleke kuwasa na lumbu wako, yawe lumbu wako ghendo, au yawe mwana wa aba wako au yawe mwana wa mai wako, yawe kwoneka ukaye yenu au kwoneka kuna kaye ingi."

10 "Mwiko kuwasa na mtsukulu wako, yawe mwana wa mwanagho mmale au yawe mwana wa mwanagho ipinga, kwa ukutenda apfo kweghela chinyala ghumwenyegho."

11 "Mwiko kuwasa na mwana pinga wa aba wako, iyelekighwe na aba wako kwe pinga yungi, ayo ka lumbu wako."

12 "Mwiko kuwasa na shangatsi yako, kwaapfila ayo na aba wako wong'a tombo limwe."

13 "Mwiko kuwasa na mai wako mdodo au mai wako mkulu, kwaapfila awo wose wong'a tombo limwe na mai wako."

14 "Mwiko kuwasa na ipinga wa aba wako mkulu au aba wako mdodo, ayo mai wako."

15 "Mwiko kuwasa na pinga we imwanagho, ayo mkwe yako ghendo, uleke kuwasa naye."

16 "Mwiko kuwasa na pinga wa mdodo wako au mkulu wako, ayo mlamu wako, kutsomghela chinyala ndughu yako. 17 Ung'awasa na ipinga, mwiko kuwasa na imwanaghe wala na mtsukulu wake. Awo wose ndughu, ung'awahanganya kotenda chinu chihile ghendo. 18 Ipinga wako ka yang'ali mghima, mwiko kumkwela na imdodo wake au imkulu wake, ung'atenda apfo kutsowatenda wesonge."

19 "Mwiko kuwasa na ipinga iyali mna ghamatsuwa ghake."

20 "Mwiko kuwasa na ipinga wa miyagho, ukutenda apfo kutsokutenda wihe."

21 "Uleke kumlapfa imwanagho wowose yakalapfighwe kwa mlungu Moleki kwaapfila mng'atenda apfo, mwolighela chinyala taghwa lyangu nene Imulungu wako. Nene yuyo IMNDEWA."

22 "Mwiko kuwasa na mmale miyagho ka pfauwasa na ipinga. Imulungu kochihila ng'ani ichinu acho."

23 "Mwiko munu mmale au pinga kuwasa na imnyama. Pfiha ng'ani ukutenda apfo."

24 "Mleke kwitenda wenyegho mwiha kwa kughatenda agha ghose, kwaapfila iwanu yaniwawinga woke hambele henu tsawetenda wenyegho wehe kwa kughatenda agho ghose. 25 Apfo waitenda isi yawo ihe, na nene IMNDEWA niitowa kwa tsinzambi tsawo tsawatendile, nayo isi yowawinga iwanu wake woke. 26 Lekeni mwemwe imli Wasiraeli au imli wagheni, mkinde malaghitso ghangu na imiko yangu, na mleke ukutenda aghala ighonyihila nene IMNDEWA. 27 Aghano ghose ighonyihila nene IMNDEWA tsawaghatenda iwanu iwakalile mna isi ya Kanani ahala mwemwe ng'ana mtse baye, nawo tsawaitenda isi ihe. 28 Lelo mwemwe mleke ukughatenda agho, hela isi ayo itsowawingani ka pfaiwawingile iwanu iwakalile ahano ng'ana mwemwe mtse."

29 "Iwanu wose iwatsotenda pfinu apfo ipfinyihila, watsobaghulighwa kutali ne iwanu wawo."

30 "Apfo mghakindise ghose ghaniwalaghitse, mleke kughawinza aghala ghose ighonyihila ghawatendile iwanu wala iwakalile muisi amwo ahala ng'ana mwemwe mpfike baye, mleke kwitenda mwiha kwa agho. Nene yuyo IMNDEWA, Imulungu wenu."