1 Kuya IMNDEWA kalonga na Musa, kamlongela, 2 "Uwalongele apfino wana wa Isiraeli, Imunu yang'elaha kumlapfila IMNDEWA munu yamsang'anile, lekeni ka imunu ayo ng'odaha baye kumlapfila imunu, yalapfe apfino tsisendi, 3 Immale wa miyaka ishilini mbaka miyaka sitini katsokombolighwa kwa sendi shekeli hamsini ka chipimo cha hanu haenzeluka. 4 Ipinga katsokombolighwa kwa pfihande pfa fetsa salasini. 5 Imunu ayo ka kana miyaka mitano mbaka ishilini, yang'awa msongolo katsokombolighwa kwa pfihande pfa fetsa ishilini, na mwali katsokombolighwa kwa pfihande pfa fetsa kumi. 6 Imwana wa mwetsi ghumwe mbaka miyaka mitano katsokombolighwa kwa pfihande pfitano pfa fetsa ka imwana msongolo, na pfihande pfa fetsa pfidatu ka imwana ayo chindele. 7 Ka imunu ayo kana miyaka kubita sitini kuya mmale, bei yake itsakuwa pfihande kumi na tano pfa fetsa, ka pinga bei yake itsakuwa pfihande kumi pfa fetsa. 8 Lekeni munu iyelahile ka kamhingwa na ng'odaha baye kuliha, yamghale imunu ayo kwa mtambika. Naye imtambika katsomlola imunu yalihighwe bei yachi."

9 Ka natsili ayo, ya mnyama iwomlapfagha iwanu ka nambiko kwa Imulungu, imnyama ayo katsakuwa mwenzeluka, 10 na kuduhu imunu iyalapfile natsili kumghalusa mnyama ayo kwa mnyama wowose yungi, yanoghile kwa yehile au yehile kwa yanoghile. Yang'amghalusa kwa mnyama yungi, wose weli watsakuwa waenzeluka.

11 "Na natsili ayo ka ya mnyama yehile, ayula ng'apfinoghile kumlapfila IMNDEWA, imunu iyamlapfile katsomghala kwa mtambika, 12 naye mtambika katsolamla bei yake kulingana na ukunogha na ukwiha kwake. Ka pfayolamla mtambika, pfipfo pfaitsakuwa. 13 Lekeni ka imwenyegho kobama kumkombola, katsakongetsa asilimia ishilini ya bei ya mnyama ayo."

14 "Imunu yang'eka wakifu ing'anda yake iwe ihenzeluka kwe IMNDEWA, mtambika katsolamla bei yake kulingana na ukunogha au ukwiha kwake. Ka pfayolamla mtambika, pfipfo pfaitsakuwa. 15 Ka imunu ayo iyaikile wakifu yang'abama kuikombola ing'anda ayo, katsakongetsa asilimia ishilini ya bei yake, nayo itsakuwa yake."

16 "Imunu yang'alapfa ndeu ya mghunda ghwake kwa IMNDEWA, bei yake itsopimighwa kwa kulingana na tsimbeghu itsitumika kuhanda mghunda aghwo, kwa chila pishi ishilini tsa shayili bei yake itsakuwa pfihande hamsini pfa fetsa. 17 Yang'alapfa mghunda ghwake mna ghumwaka ghwa kukumbuka miyaka hamsini, bei yake ilingane na pfipimo pfenu. 18 Lekeni yang'alapfa hambele ha ghumwaka aghwo, mtambika katsolamla bei yake kulingana na miyaka iisighale kupfikila ghumwaka ghwa kukumbuka miyaka hamsini na bei yake ihungutsighwe. 19 Imwenyegho yang'abama kulikombola, yongetse asilimia ishilini ya bei ya mghunda, na baho ghutsakuwa ghwake. 20 Lekeni ka ng'obama kughukombola baye, au ka imtambika kamuutsila munu yungi, mghunda aghwo ghuleke kukombolighwa keli. 21 Mna ghumwaka ghwa kukumbuka miyaka hamsini mghunda aghwo ghutsolekelighwa na kuwa ghwa IMNDEWA ghamatsuwa ghose. Kuya ghutsakuwa ghwa mtambika."

22 "Imunu yang'alapfa kwe IMNDEWA Imulungu mghunda ghwayaghughulile, aghula si ghwake kwa ukuhala, 23 mtambika katsolamla bei ya mghunda aghwo kwa kulingana na miyaka iisighale kupfikila ghumwaka ghwa ukukumbuka miyaka hamsini na munu ayo katsoliha bei yake ka chinu chihenzeluka kwa IMNDEWA. 24 Lekeni mna ghumwaka ghwa ukukumbuka miyaka Hamsini, mghunda aghwo ghuitsighwe kwe imunu ayula iyaghuutsile. 25 Chila bei itsolingighwa kwa chipimo cha utito cha pfihande pfa fetsa kulingana na chipimo cha hanu haenzeluka, utito wa gera ishilini utsakuwa chihande cha fetsa imwe."

26 "Ng'aibamighwa baye kumlapfa mwelekighwa wa mwanduso we imnyama kwe IMNDEWA Imulungu, kwaapfila ayo ma we IMNDEWA, yawe ng'ombe au ing'olo. 27 Lekeni mwelekighwa wa mwanduso wa imnyama yehile, mwenyegho katsomghula kwa kulingana na pfamumpima na katsakongetsa asilimia ishilini ya bei mnyama ayo. Ka ng'okombolighwa, katsoutsighwa kulingana na pfipimo pfenu."

28 "Lekeni chinu chochose ichilapfighwe lumwe kwe IMNDEWA, yawe imunu au mnyama au chinu ichipatikane kwa uhala, ng'achitsoutsighwa wala kukombolighwa baye. Chochose ichilapfighwe kwa IMNDEWA acho chienzeluka ghendo. 29 Imunu wowose iyahighighwe kukomighwa, ayo yakomighwe ghendo, yaleke kukombolighwa."

30 "Hanu ha kumi ya izaka ha matsawo, iwe mbeghu au ghamatunda gha mibiki, yose itsakuwa mali ya IMNDEWA, ayo ihenzeluka kwa IMNDEWA. 31 Na imunu yang'abama kukombola chinu chochose cha ingoto yake, katsakongetsa hanu ha tano. 32 Kuya tsaka ya iwanyama haipetighwa, mna chila wanyama kumi yumwe we IMNDEWA. 33 Imunu wowose ng'obamighwa kughutsa ka mnyama ayo kanogha au keha wala mnyama ayo ng'atsoghalusighwa kwa mnyama yungi, ka katsoghalusighwa kwa mnyama yungi, wanyama wose weli watsakuwa waenzeluka, ng'awatsokombolighwa."

34 Aghano ghagho ghamalaghitso IMNDEWA ghayamlaghitse Musa yawalongele Waisiraeli mchidunda Sinai.