1 IMNDEWA kalonga na Musa akula kunyika ya Sinai, mng'anda mwa Lihema Lienzeluke, mna litsuwa lya mwanduso lya ghumwetsi ghwa kabili, ghumwaka ghwa kabili kulawa hawalawile mna isi ya Misiri, kalonga, 2 "Ghweghwe na Aruni muwapete Waisiraeli wose kwa kulola tsikolo tsawo, tsikaye tsawo na mataghwa ghawo gha chila mmale, 3 Awala wose iwodaha ukughenda kwing'ondo mna, wane miyaka ishilini no ukughendelela awo ghweghwe na Aruni muwapete kwa kulola ghamakingili ghao. 4 Nimsaghula munu yumwe iyali chilongotsi wa kaye kulawa chila kabila yakwapfile mna ukupeta."

5 Na aghano igho ghamataghwa ghe iwanu walume iwatsokwapfila ing'onde.

Kulawa kabila lya Rubeni, kasaghulighwa Elisuli imwana wa Shedeuri.

6 Kulawa kabila lya Simeoni, kasaghulighwa Shelumaeli mwana wa Shumshadai,

7 Kulawa kabila lya Yuda, kasaghulighwa Nashoni mwana wa Aminadabu,

8 Kulawa kabila lya Isakari, kasaghulighwa Nasanaeli mwana wa Zuari,

9 Kulawa kabila lya Zebuloni, kasaghulighwa Eliabu imwana na Heloni,

10 Kulawa, kabila lya Efuraimu, kasaghulighwa Elishama imwana wa Amihudi,

Kulawa kabila lya Manase, kasaghulighwa Gamalieli mwana Pedazuri,

11 Kulawa kabila lya Benjamini, kasaghulighwa Abidani mwana wa Gidioni,

12 Kulawa kabila lya Dani, kasaghulighwa Ahazeri mwana wa Amishadai,

13 Kulawa kabila lya Asheri, kasaghulighwa Pagieli mwana wa Okirani,

14 Kulawa kabila lya Gadi, kasaghulighwa Eliasafu mwana wa Danieli,

15 Kulawa kabila lya Nafutari, kasaghulighwa Ahira mwana wa Emani.

16 Awano wawo iwasaghulighwe mna ghumtingano, iwakulu wa ghamakabila gha aba tsao, tsawawalongotsa iwanu wose wa Isiraeli. 17 Musa na Aruni wawasola iwanu wano kwa ghamataghwa ghao, 18 wawalongela iwanu wose wetingane hamwe mna litsuwa lya mwanduso lya ghumwetsi ghwa kabili. Nao wandikighwa yumweyumwe ka kolo tsao pfatsili na tsikaye tsa aba tsao, kwandusila wane miyaka ishilini na kughendelela, 19 ka IMNDEWA pfamlaghitse Musa. Apfo kawapeta kune inyika ya Sinai. 20 Na wana wa Rubeni, chaudele wa Yakobu, ipfeleko pfao na tsikolo tsao, ka tsikaye tsa aba tsao pfatsili, awala iwapetighwe kwa mataghwa ghao, chila mmale kwandusila miyaka ishilini no ukughendelela, 21 awala wose iwodaha ukughenda kung'ondo, awala iwandikighwe na kabila lya Rubeni tsa elufu alubaini na sita na miya tano. 22 Kune iwana wa Simeoni, kolo tsao, na pfeleko, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale yane miyaka ishilini no ukughendelela, wose iwang'ali wodaha kughenda kung'ondo, 23 Awala iwapetighwe mna likabila lya Simeoni tsawapfika elufu hamsini na tisa na miya ndatu. 24 Kune iwana wa Gadi, kolo tsao, na pfeleko pfao kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale yane miyaka ishilini no ukughendelela, wose iwang'ali wodaha kughenda kung'ondo, 25 awala iwapetighwe mna iwana wa Gadi tsawapfika elufu alubaini na tano, miya sita na hamsini. 26 Na iwana wa Yuda, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 27 wala iwapetighwe mna iwana wa Yuda tsa elufu sabini na nne na miya sita. 28 Na wana wa Isakari, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 29 awala iwapetighwe mna iwana wa Isakari tsa elufu hamsini na nne na miya nne. 30 Mne iwana wa Zabuloni, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 31 awala iwapetighwe mna likabila lya Zebuloni tsawakala elufu hamsini na saba na miya nne. 32 Mne iwana wa Yosefu, iwana wa Efuraimu, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 33 awala iwapetighwe mna likabila lya Efuraimu tsawakala elufu alubaini na miya tano. 34 Kabila lya Manase mwana wa Yosefu, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 35 awala iwapetighwe mna likabila lya Manase tsa wakala elufu selasini na mbili na miya mbili. 36 Mne iwana wa Benjamini, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 37 awala iwapetighwe mna likabila lya Benjamini tsa wakala elufu selasini na tano na miya nne. 38 Mne iwana wa Dani, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 39 awala iwapetighwe mna likabila lya Dani tsawakala elufu sitini na mbili na miya saba. 40 Mne iwana wa Asheri, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale yane miyaka ishilini no ukughendelela, wose iwang'ali wodaha kughenda kung'ondo, 41 awala iwapetighwe mna iwana wa Asheri tsawakala elufu alubaini na yumwe na miya tano. 42 Mne iwana wa Naftari, ipfeleko pfao, kwa tsikolo tsao, kwa tsikaye tsao, kwa mataghwa gha aba tsao, awala iwapetighwe kwa ghamataghwa, chila mmale kwandusila miyaka ishilini no ukughendelela, wose iwang'ali wodaha kughenda kung'ondo, 43 awala iwapetighwe mna iwana wa Naftari tsa elufu hamsini na ndatu na miya nne. 44 Awano wawo iwapetighwe na Musa na Aruni, no ukwapfilighwa ne iwakulu wa Isiraeli, wana kumi na weli ka tsikaye tsa aba tsao pfatsili. 45 Apfo awala wose iwapetighwe mna iwana wa Isiraeli, kwa tsikaye tsa aba tsawo, kwandusila wane imiyaka ishilini no ukughendelela, wose iwang'ali wodaha kughenda kung'ondo mna Isirael, 46 wose tsawapfika laki sita, elufu ndatu, miya tano hamsini. 47 Lekeni Walawi wao ng'awapetighwe baye hamwe na wayao. 48 Kwaapfila IMNDEWA tsa kalonga na Musa, kalonga, 49 "Uleke kuwapeta iwanu wa lukolo lwa Lawi hamwe na iwanu wa kolo tsa Isiraeli. 50 Lekeni uweke Walawi mna isang'ano ya kulilolesa lihema lya ukwitinganila na mna ipfombo pfose ipfili mghati na ipfinu pfake pfose. Watsolighala lihema ne ipfinu pfake pfose, kuya watsolilolesa, na kwika indalo walitsunguluke lihema alyo lya kwitinganila. 51 Lihema alyo haling'olighwa lyuke, Walawi watsolibomola, na halitsohimikighwa, Walawi watsolitsenga, na imunu yali si mlawi iyatsoliseghelela, ayo yakomighwe yafe. 52 Na iwana wa Isiraeli wose watsotsenga chila imunu chibumbulika chake, hane indalo yake, na hane ibendela yake, ka pfaghali ghamakingili ghao ghe ing'ondo. 53 Lekeni Walawi watsotsenga kutsunguluka Lihema lya Kwitinganila walilolese ili maya yangu ng'ulu ileke kuwapfikila Waisiraeli." 54 Kuya Waisiraeli watenda ghose ka IMNDEWA ghayamlaghitse Musa, apfo pfipfo pfawatendile.