1 Waisiraeli hawang'ali wokala ako Shitimu, iwamale tsa wanza ukutenda ughoni na wapinga wa Moabu. 2 Iwapinga awo tsawawakema Waisiraeli wehangile kuitambikila imulungu yawo, nawo Waisiraeli waja ichijo chao, wainamila milungu yawo. 3 Apfo Waisiraeli tsawelunga wenyegho na mulungu Baali wa Peoli, na IMNDEWA kawonela maya Waisiraeli. 4 Kuya IMNDEWA kamlongela Musa, "Wasole pfilongotsi wose we iwanu wano, uwakome mna lutsuwa lukali, ili imaya yangu imale." 5 Musa kawalongela pfilongotsi wa Isiraeli, "Chila yumwe wenu yamkome munu wowose iyelungile mna ukumtambikila imulungu Baali wa Peoli." 6 Lola, munu yumwe Muisiraeli kamghala pinga yumwe Mmidiani kune chibumbulika chake, aku Musa na Waisiraeli wose wang'ali wodomboketsa hane lghumlango ghwa Lihema Lienzeluke. 7 Baho Finehasi, mwanaghe Eliazali, mtsukulu wa mtambika Aruni, hayonile apfo koka aho hane mtingano, kaghenda kusola ghumghoha, 8 kamkoleletsa imunu yula Muisiraeli mbaka mghati mwe chibumbulika chake, kawahoma wose weli kwa ghumgoha ghwake munda mwao. Kwa kutenda apfo, utamu wihile iung'ali uwatenda Waisiraeli wafe tsaumala. 9 Lekeni utamu awo ma tsauwakoma wanu iwopfika elufu ishilini na nne.

10 IMNDEWA kamlongela Musa, 11 "Finehasi imwana wa Eliazali, mtsukulu wa mtambika Aruni, kaikinga imaya yangu ileke kuwa mchanya mwa iwanu wa Isiraeli. Yeye yaliyeka kulawa mna mwemwe iyonile chepfu ka chepfu chanikona nene. Apfo nene siwakomile baye Waisiraeli kwa imaya yangu. 12 Lelo mlongele pfino, ‘Nene nakwika laghano lya ukukala naye tseghamba.’ 13 Lilaghano lyo kumtenda yeye na lweleko lwake lwose wawe watambika wa ghamatsuwa ghose, kwaapfila yeye tsakona chepfu kwaajili yangu nene Imulungu wake, na kawatenda Waisiraeli welamlitse na nene." 14 Muisiraeli ayo iyakomighwe hamwe na pinga wa Midiani tsakakemighwa Simuri, mwana wa Salu, chilongotsi wa lweleko lumwe mna likabila lya Simeoni. 15 Na taghwa lya ipinga ayo Mmidiani iyakomighwe tsakakemighwa Kozibi neghe Suri, naye Suri tsachilongotsi wa lukolo lumwe ako Midiani. 16 Kuya IMNDEWA kamlongela Musa, 17 "Uwaghobole Wamidiani na uwakome, 18 kwaapfila wao wawaghobola mwemwe kwa ughutsu wao, wawabugha mwemwe akula Peoli, na ayula kozibi, neghe wa chilongotsi yumwe wa Midiani, iyakomighwe ahala utamu wihile haulawile akula Peoli."