1 Kuya IMNDEWA tsakalonga na Musa kune chiwala cha Moabu, kumwambu kwa ghumto Yoridani, habehi na Yeriko, kamlongela, 2 "Uwalaghitse Waisiraeli waweng'e Walawi imjiji yo kukala, na mighunda ya kudimila imifugho yawo, iili mmbambali mwe imiji yao, waweng'e kulawa mna isi yaweng'ighwe iwe yao. 3 Nawo watsopata imiji yo kukala na mighunda yo kudimila iwang'ombe na mifugho yao na iwanyama wangi. 4 Imighuda ya kudimila imifugho yao itsunguluka imiji yao itsakuwa na utali wa futi elufu imwe na miya tano chila ubali kulawa hane ubanda we ghumji. 5 Apfo isi ayo ya kudimila itsakuwa na utali wa futi elufu ndatu chila ubali we ghumji, na ghumji ghwenyegho ghutsokala haghati ghati, na isi ayo yakuwa ya kudimila na yokala mmbalimbali mwe ghumji. 6 Pfipfila muweng'e Walawi imiji sita yo kutsumila, ahala imunu yang'amkoma miyaghe gila, Muwongetse imiji alubaini na mili. 7 Apfo imiji yoseyose yamtsoweng'a Walawi itsopfika alubaini na minane, mtsoweng'a imiji ayo hamwe na mighunda ya kudimila mifugho yao. 8 Imjiji yamtsoweng'a Walawi kulawa mna isi yamwing'ighwe ilingane na ukulu wa ghamakabila, likabila line wanu wengi lutsolapfa imiji mingi, na likabila line wanu chidogho litsolapfa imiji chidogho. Chila kabila litsolapfa imiji iwe ya Walawi, kwa kulola ukulu we isi iweng'ighwe pfauli."

9 IMNDEWA kamlongela Musa, 10 Uwalongele Waisiraeli pfino, "Hawoloka ghumto Yoridani na kwingila mna isi ya Kanaani, 11 msaghule imiji iwe yo kutsumila, imunu yang'amkoma gila miyaghe yadahe kutsumila kuko. 12 Imiji ayo yo kutsumila iwe yakumkinga imunu iyamkomile miyaghe ili naye yaleke kukomingwa na ndugu tsake imunu yula iyakomighwe, ng'ana lighomba lyake lihighighwe baye na Waisiraeli. 13 Muibaghule imiji ayo sita yo kutsumila. 14 Kulawa mna ayo sita, imiji midatu yamtsoweng'a iwe kumwambu kwa Yoridani, na imiji ingi midatu iwe mna isi ya Kanaani. Ayo iwe ya kutsumila. 15 Imiji ayo sita iwe ya kutsumila iwanu wa Isiraeli na iwagheni wamkala nawo, ili chila munu iyomkoma miyaghe aku ng'abamile kumkoma baye yatsumile kuko." 16 Lekeni ka imunu komtowa miyaghe kwa chuma mbaka kakufa, ayo kakoma, naye pfipfila yakomighwe. 17 Imunu yang'amtowa miyaghe kwa libwe mbaka kakufa, ayo kakoma, naye pfipfila yakomighwe 18 Na ka kamtowa miyaghe kwa libiki ilili mmoko mwake mbaka kakufa, ayo kakoma, naye pfipfila yakomighwe 19 Ndughu yake wa habehi kobamighwa kumkoma imunu ayo, indughu yake yang'etingana naye, katsomkoma. 20 Pfipfila ka imunu komwihila miyaghe kuya komkunughitsa, au komwasila chinu aku komwembela, mbaka kakufa, 21 au komtowa kwa ghumoko ghwake mbaka kakufa, ayo iyamtowile miyaghe yakomighwe. Indughu we imunu ayo iyakomighwe katsomkoma ahala hayatsetingana naye. 22 Lekeni ka imunu kamkunughitsa miyaghe kwa kwidukitsa aku ng'omwihila baye au komwasila chinu, 23 au imunu yang'asa ilibwe ilidaha kumkoma, naye ng'amwihile baye wala ng'abamile baye kumlagha, 24 aho wanu wa Isiraeli watsohigha lighomba lya imunu yula iyakomile na ayula iyobama kumkoma iyamkomile ndughu yake kwa kulola ghamalaghitso ghano. 25 Ghumtingano ghutsomkombola imunu ayo iyakomile kulawa mna ghamoko ghe ndughu wa imunu yula iyakomighwe, wamuyitse mna ghumji ghwa kutsumila, kwayang'ali yotsumila. Katsokala kuko mbaka hayakufa imtambika iyasaghulighwe kwa kughelighwa ghamapfuta. 26 Lekeni ayo iyakomile yang'alawa kunze kwe ghumji agho ghwayatsumilile, 27 na ndughu we munu iyakomighwe yang'etingana naye kunze kwe imibaka ye ghumji agho, na yang'amkoma, indughu ayo kahela totso lyo kukoma. 28 Kwaapfila imunu iyakomile tsakabamighwa yakale mna ghumji ghwayatsumilile mbaka hayakufa mtambika mkulu, lekeni mtambika mkulu yang'afa aho imunu yula iyakomile miyaghe kodaha kuya kune isi iyeng'ighwe iwe ulisi wake. 29 Mghakinde ghamalaghitso ghano mna ipfeleko pfenu pfose na kwokwose kula kwa mtsokala.

30 "Imunu wowose iyakomile imunu, naye katsokomighwa ka iwanu weli au wengi tsawona chinu acho, munu wowose yaleke kuihighighwa yafe kwa kumtegheletsa munu yumwe. 31 Mleke kubokela maliho ghoghose kuukombola ughima we munu iyoneke kakoma miyaghe, ayo kobamighwa yakomighwe. 32 Mleke kubokela wala kutoghola maliho ghoghose ghala kulawa kwa munu iyatsumile mna ghumji gho kutsumila, ili yoye mna isi yake aku mtambika mkulu ng'ana yafe baye. 33 Mng'atenda apfo namwe mtsoitenda isi yamkala ihe. Ukwikoma koitenda isi ihe, na kuduhu inambiko ilapfighwa iwe ya kuileghusila inzambi isi kwa kumwaghika idamu ila kwa kumkoma imunu ayula iyakomile. 34 Nene na IMNDEWA, na nokala mna Waisiraeli, apfo mleke kuitenda isi ihe kwa ukwikoma."