1 Apfino pfipfo ipfeleko pfa Aruni na Musa, ahala IMNDEWA hayalongile na Musa kune chidunda Sinai. 2 Aruni tsakana wana wane na mataghwa ghawo aghano hano, mwanaghe chaudele tsakakemighwa Nadabu, wakeli Abihu, na wakadatu Eliazali na wakane Tamali. 3 Awano tsawasaghulighwa kwa kughelighwa mapfuta ili wawe watambika. 4 Lekeni Nadabu na Abihu tsawafa hambele ha IMNDEWA ahala hawalapfile ghumoto ing'aghubamighwe mna nyika Sinai, na tsawakala ng'aweleke wana wamale baye. Apfo Eleazari na Itamali wang'ali wosang'ana ka watambika ahala aba wawo Aruni hayakalile mghima.

5 IMNDEWA kamlongela Musa, 6 "Waghale iwanu wa kabila lya Lawi habehi, uweke hambele ha Aruni ili wamsang'anile. 7 Watsomsang'anila Aruni ne iwanu wose wa Isiraeli mna Lihema Lienzeluke. 8 Watsololesa ipfinu pfose pfa Lihema Lienzeluke na kuwapfila Waisiraeli, ahala hawosang'ana mna Lihema Lienzeluke. 9 Walawi awo kutsomwing'a Aruni ne wanaghe ili wawasang'anile. 10 Wasaghule Aruni ne Wanaghe ili waitende sang'ano yao ya utambika, na munu wowose iyali muhenza yatsosoghela habehi na Lihema Lienzeluke yakomighwe."

11 IMNDEWA kaghendelela kumlongela Musa, 12 "Lola, niwaleka iwana chaudele wamale wose wa Waisiraeli, na niwasaghula Walawi ili wanisang'anille. Walawi watsakuwa wakwangu nene. 13 Kwaapfila chila mwana mmale chaudele wa Waisiraeli wangu nene. Ahala haniwakomile iwana chaudele wose wa Misiri tsaniwabaghula awano wanisang'anile nene. Chila mwana chaudele we iwanu hata we iwanyama watsakuwa wangu. Nene yuyo IMNDEWA."

14 Kuya IMNDEWA kamlongela Musa mna nyika ya Sinai, kalonga, 15 "Uwapete iwana wa Lawi kwa kulola kolo tsao, na pfeleko pfao, iwanu wamale kwandusila iwana wadowado wa mwetsi ghumwe na kughendelela." 16 Apfo Musa kawapeta Walawi ka IMNDEWA pfayamlongele.

17 Awano wawo iwana wa Lawi, Gerishoni, Kohati, na Melali. 18 Gerishoni tsakana wana weli Libini na Shimei. 19 Kohati tsakana wana wane wamale, Amurani, Ishari, Heburoni na Uzieli. 20 Naye Melali tsakana wana weli, Mahili na Mushi. Apfino tsa pfipfo ipfeleko pfa Lawi kwa tsikolo tsao.

21 Lweleko lwa Walibini na Washimei tsawalawa mna lukolo lwa Gerishoni. 22 Iwamale wose iwapetighwe kulawa wane mwetsi ghumwe na kughendelela tsawapfikila elufu saba na miya tano. 23 Wagerishoni tsaweka indalo ubali wa kwalikuswela litsua wa Lihema Lienzeluke, 24 naye Eliasafu mwana wa Laeli tsa chilongotsi wa Wagerishoni. 25 Sang'ano yao tsaikala kulilolesa Lihema Lihenzeluke na chighubiko chake, matsabahu, na panzia lya ghumlango ghwa Lihema Lienzeluke, 26 mapanziya ghe luwa ighotsunguluka Lihema Lienzeluke, lisanduku, panziya lye ghumlango ghwe luwa na mitsabi yake.

27 Pfeleko pfa Kohati tsa Waamrani, Waishali, Waheburoni na Wauzieli. 28 Mna pfeleko apfo pfose, iwamale wose iwapetighwe kulawa wane mwetsi ghumwe na kughendelela tsawapfikila elufu nane na miya sita, wose tsawasang'ana mna Lihema Lienzeluke. 29 Awano tsawakala ubali wa kusini wa Lihema Lienzeluke, 30 na chilongotsi wa iwanu wa Kohati tsa Elisafani. 31 Isang'ano yao tsaikala kulilolesa lisanduku lya laghano, imetsa ya kwikila pfighate, chighutso cho kwikila ipfitasa, matsabahu, ipfinu pfawang'ali wotumila watambika, na lipanziya ilibaghula hanu haenzeluke na hanu haenzeluke ng'ani. 32 Naye imwana wa mtambika Aruni yakemighwe Eliazari yuyo yatsakuwa mkulu wa iwakulu wa Walawi, naye katsowalolesa awala wose iwasang'ane ka wabetetsi mna Lihema Lihenzeluke. 33 Melali tsakana pfeleko pfili, Wamahili na Wamushi. 34 Kulawa mna ipfeleko apfo pfili, iwamale wose iwapetighwe kulawa wane mwetsi ghumwe na kughendelela tsawapfikila elufu sita na miya mbili. 35 Chilongotsi wawo tsa Surieli mwana wa Abihaili. Awano tsaweka ndalo yao ubali wa kasikazini wa Lihema Lienzeluke. 36 Tsaweng'ighwa sang'ano ya ukulolesa tsifulemu tsa Lihema, mifumbati, tsingutso tsake, pfikalilo pfake, ipfinu pfake pfose na sang'ano tsake tsose. 37 Pfipfila tsawalolesa tsingutso tse luwa mtsunguluko ghose, pfikalilo pfake, pfighingi pfake, ne mitsabi yake.

38 Musa na Aruni ne wana wawo watsakwika ndalo hambele ha Lihema Lienzeluke ubali wa kwalilawila litsua. Ing'onde yawo tsaikala ukusang'ana mna Lihema Lienzeluke kwa ajili ya Waisiraeli. Na imunu wowose yatsosoghela habei tsakakomighwa. 39 Iwamale wose wa Walawi iwapetighwe na Musa na Aruni kulawa wane mwetsi ghumwe na kughendelela tsa elufu ishilini na mbili.

40 Kuya IMNDEWA kamlongela Musa, "Uwapete kwa ghamataghwa iwana wamale chaudele wose wa Isiraeli kulawa wane mwetsi ghumwe na kughendelela. 41 Uwabaghule Walawi wawe wangu nene IMNDEWA hanu ha pfaudele wose wa wana wa Isiraeli, pfipfila uwasole iwanyama wa walawi hanu ha welekighwa wa mwanduso we iwanyama wa Isiraeli." 42 Apfo Musa kawapeta iwana chaudele wa Waisiraeli ka IMNDEWA pfayamlaghitse. 43 Wose iwapetighwe kwandusila wane ghumwaka ghumwe na kughendelela tsawapfikila elufu ishilini na mbili miya mbili na sabini na tatu.

44 IMNDEWA kamlongela Musa, 45 "Lelo uwasole Walawi wakinde hanu he imwana chaudele wa chila Muisiraeli, kwaapfila Walawi wose wangu. Pfipfila uwasole iwanyama wa Walawi wakinde hanu he welekighwa wa mwanduso we iwanyama wa Isiraeli. Nene yuyo IMNDEWA. 46 Hana wana chaudele miya mbili sabini na tatu wa Waisiraeli iwongetseke mna Walawi waubamighwa kuwakombola. 47 Kwa chila yumwe kutsosola pfihande pfitano pfa fetsa ka pfaikighwe mna Lihema lienzeluke, 48 na tsifetsa atso tsa kuwakombola iwongetseke, kutsomwing'a Aruni ne wanaghe." 49 Apfo Musa kasola fetsa ya ukombola ya awala iwongetseke kubita Walawi, 50 kasola ifetsa ayo kwa iwana chaudele wa Isiraeli pfihande pfa fetsa elufu imwe, miya ndatu, na sitini na tano ka pfapfili ipfinu pfa kulingila mna Lihema Lienzeluke, 51 kaweng'a Aruni ne wanaghe ka IMNDEWA pfayamlaghitse.