1 Mtwatsa Imulungu kamlongela Musa, 2 "Utengenetse malati mbili kwa fetsa ihondighwe. Tsimalati atso kutsotsitumila ahala hautsowakema iwanu na hautsomwagha indalo iwanu woke. 3 Tsimalati atso mbili tsing'atowighwa hamwe, iwanu wose watsetingana hamwe habei na ghweghwe hambele ha ghumlango ghwa Lihema Lienzeluke. 4 Lekeni ing'atowighwa malati imwe, pfilongotsi waliheka wa kabila lya Isiraeli wawo iwatsetingana hamwe habei na ghweghwe. 5 Malati ayo imwe ing'atowighwa ng'ani, itsolangusa chitango cho kuka, iwokala mna tsindalo tsa ubali wa kwalilawila litsuwa wakwandusa ghumwanza. 6 Malati ayo imwe ing'atowighwa mala mbili, awala iwokala mna tsindalo tsa ubali wa kusini wakwandusa kuka. Malati ayo haitowighwa, ghumwanza ghwakwandusighwa. 7 Lekeni hauwakema iwanu wetingane hamwe tsimalati tsitsotowighwa chidogho. 8 Tsimalati atso tsitowighwe na iwana wa Aruni iwali watambika. Mtsotenda apfo mna pfeleko pfenu pfose ipfikutsa. 9 Hamtsakuwa ne ng'ondo mna isi yenu, mtsotsitowa ng'ani tsimalati tsino ili IMNDEWA wenu yawapfile na yawakombole na iwanu iwowehila. 10 Pfipfila mna matsuwa gha kudeng'elela, ka ghumwetsi haghulawila sambi, na pfihungo pfingi, mtsotowa malati tsino ahala hamtsolapfa nambiko tsenu tsa kulakatsighwa na nambiko tsenu tsa kukala tseghamba ne Imulungu. Aho nene Imulungu wenu nitsowakumbuka mwemwe. Nene yuyo IMNDEWA, Mulungu wenu."

11 Mna litsuwa lya ishilini lya mwetsi ghwa keli, mwaka ghwa keli kulawa Waisiraeli hawalawile Misiri, libingu ilikalile mna Lihema Lienzeluke halinulighwe, 12 Waisiraeli wandusa ghumwanza kulawa nyika ya Sinai. Libingu alyo tsalinuka lighenda kwima kune nyika ya Parani. 13 Nawo tsa wanza kuka kwa laghitso lye IMNDEWA kubitila Musa. 14 Iwanu wa kingili lya kabila lya Yuda wawo iwalongole aku wakinda bendela yawo, na chilongotsi wawo tsa imwana wa Aminadabu iyakemighwe Nashoni. 15 Netaneli imwana wa Suari tsakawalongotsa iwanu wa kingili lya kabila lya Isakari. 16 Naye Eliabu imwana wa Heloni tsakawalongotsa iwanu wa kabila lya Zebuluni. 17 Iwanu wa lukolo lwa Gerishoni na Merari iwalighalile lihema, walihulumsa, kuya wandusa kuka. 18 Kuya kingili liwinzile hachisogho aku wakinda bendela yawo tsa lya kabila lya Rubeni, chilongotsi wawo tsa imwana wa Shedeuri yakemighwe Elisuri. 19 Shelumieli imwana wa Surishadai tsakalilongatsa kingili lya kabila lya Simioni. 20 Naye Eliasafu mwana wa Deueli, kalilongotsa kingili lya kabila lya Gadi. 21 Kuya iwawinzile keli, iwanu wa lukolo lwa Kohati aku waghala pfinu pfienzeluke. Awo hawapfikile Lihema ma tsalitsengighwa na wayao. 22 Hawalawile awo, wawinza iwanu wa kingili lya kabila lya Efulemu aku wakinda bandela yawo, wawo tsawalongotsighwa na Elishama imwana na Amihudi. 23 Imwana wa Pedasuri yakemighwe Gamalieli tsakalilongotsa kabila lya Manase, 24 naye Abidani imwana wa Gideoni kalilongotsa kabila lya Benyamini. 25 Awala wa utsighilo tsa kingili lya kabila lya Dani. Awano wang'ali wowabetetsa wayawo wose. Nawo tsawalongotsighwa na Ahiezeri imwana wa Amishadai. 26 Pagieli imwana wa Okilani tsakaliliongotsa kabila lya Asheri. 27 Naye imwana wa Enani yakemighwe Ahira tsakalilongotsa kabila lya Nafutali. 28 Apfino pfipfo Waisiraeli pfawatendile ahala hawamwaghile indalo na kwandusa ghumwanza keli kingili kwa kingili.

29 Musa kamlongela mlamu wake Hobabu imwana wa Reueli, wa kabila lya Wamidiani, iyali mkwe wake, "Twetwe twoghenda hanu hayalongile IMNDEWA ‘Nitsomwing'ani’. Lelo utse tughende hamwe, kwaapfila tutsokutendela ghanoghile, kwaapfila IMNDEWA kelaghana natwe ka katsotwing'a ipfinu pfinoghile." 30 Lekeni Hobabu kedika, "Nene sighenda namwe baye, nitsakuya kune isi yangu na kwa iwanu wangu." 31 Musa kamlongela, "Twokulomba uleke kutuleka, kwaapfila ghweghwe kohamanya hanu hatutsakwika indalo kunyika, na kodaha kuwa mlangulitsi wetu. 32 Pfipfila ung'aghenda na twetwe, chochose chinoghile IMNDEWA chayotutendela twetwe, na ghweghwe pfipfila katsokutendela."

33 Iwanu woka kulawa Sinai, chidunda che IMNDEWA, kwa ghumwanza ghwa matsuwa madatu. Sanduku lya laghano lye IMNDEWA tsaliwalongolela kwa mwanza ghwa matsuwa madatu ili liwabamile hanu ho kwika indalo. 34 Chila hawaghendile kulawa ndalo imwe mbaka ndalo ingi, libingu lye IMNDEWA Imunngu tsalikala mchanya mwao misi yose. 35 Aho Lisanduku halighendile hambele, Musa kalonga, "Winuke ghwee IMNDEWA uwapwililise iwehile wako, yang'awokubama uwatende watsume hambele yako." 36 Na chila halimile, Musa kalonga, "Ghwee IMNDEWA uwoyile Waisiraeli wano wengi sideke."