1 Mne litsuwa Musa hayamalitse kulimitsa wima lihema, tsakalighela mapfuta na kulihimika ili lienzeluke, pfipfila tsakachighela mapfuta na kuchika matsabahu hamwe na pfinu pfake pfose ili pfienzeluke. 2 Kuya pfilongotsi wa Isiraeli, iwakulu wa ghamakabila tsawalapfa nambiko tsao. Awano wawo iwamwapfile Musa ahala iwanu hawapetighwe, 3 wamlapfila IMNDEWA nambiko tsawo, mituka sita ya kukweghighwa ne wanyama ighaghubikighwe na ng'ombe wamale kumi na weli, mtuka ghumwe kwa chila pfilongotsi weli, na ng'ombe yumwe kwa chila chilongotsi yumwe. Hawamalitse kupfilapfa hambele ha lihema, 4 IMNDEWA kamlongela Musa, 5 "Ubokele nambiko tsino ili tsitumike mna sang'ano ya Lihema Lihenzeluke, uweng'e Walawi chila yumwe kwa kulola sang'ano yake." 6 Baho Musa kasola imituka, na wang'ombe wamale kaweng'a walawi. 7 Wagerishoni tsaweng'ighwa mituka mili na ng'ombe wamale wane kwa ajili ya sang'ano tsawo, 8 na Wamelali weng'ighwa mituka mine na ng'ombe wamale wanane ili iwapfile mna sang'ano tsawo tsose. Awo Wagerishoni na Wamelali tsawalongotsighwa na Itamali mwana wa mtambika Aruni. 9 Lekeni Musa ng'aweng'ile chinu chochose Wakohati kwaapfila wao tsawana sang'ano ya kulolesa pfinu pfienzeluke ipfibamighwe kughalighwa mmayegha.

10 Pfilongotsi awo tsawalapfa nambiko tsa kuihimika matsabahu mna litsuwa lila haighelighwe mapfuta, tsawalapfa nambiko tsawo hambele he matsabahu. 11 IMNDEWA kamlongela Musa, "Mna chila tsuwa chilongotsi yumwe yalapfe nambiko yake ya kuihimika matsabahu."

12 Ayula yalapfile nambiko mna litsuwa lya mwanduso tsakakala Nashoni imwana wa Aminadabu wa kabila lya Yuda. 13 Nambiko yake tsa sahani imwe ya fetsa ine utsito wa kilo imwe na nusu, na bakuli imwe ya fetsa ine utsito wa glamu miya nane ka pfapfikighwe ipfinu pfa kulingila ipfili hane Lihema Lienzeluke, sahani na bilika alyo tsapfimema usaghe utighinike ghendo iuhanganyighwe na mapfuta iwe nambiko ya usaghe. 14 Chisahani chimwe cha nzahabu chine utsito wa glamu miya imwe na kumi, ichimemile upfumba, 15 ng'ombe mmale yumwe iyali mdodo, ng'olo mmale yumwe, na mwanang'olo yumwe mmale wa mwaka ghumwe yawe wa nambiko ya kulakatsighwa, 16 mvulati yumwe wa nambiko ya kuleghusa nzambi, 17 na ng'ombe weli wamale, ng'olo wamale watano, mvulati watano na wanang'olo watano wamale wa mwaka ghumwe. Awo watsakuwa wa nambiko ya kukala tseghamba. Ayo tsaikala iyo inambiko ya Nashoni mwana wa Aminadabu.

18 Ayula iyalapfile nambiko mna litsuwa lya keli tsa Netaneli mwana wa Suari, yeye tsakakala chilongotsi wa kabila lya Isakari, 19 naye pfipfila tsakalapfa nambiko tsino, Sahani imwe ya fetsa ine utsito wa kilo imwe na nusu, bakuli lya fetsa lya glamu miya nane, ka pfapfikighwe ipfinu pfa kulingila ipfili hane Lihema Lienzeluke, isahani ne ibakuli ayo tsapfimema usaghe utighinike ghendo uihanganyighwe na mapfuta kwaajili ya nambiko ya usaghe, 20 chisahani chimwe cha nzahabu cha glamu miya imwe na kumi ichimemile upfumba, 21 ng'ombe mmale yumwe iyali mdodo ng'olo mmale yumwe na mwana we ng'olo mmale wa mwaka ghumwe, awo tsawalapfighwa wawe wa nambiko ya kulakatsighwa. 22 Mvulati yumwe wa nambiko ya kuleghusa nzambi, 23 ng'ombe wamale weli, ng'olo wamale watano, mvulati watano na wanang'olo wamale watano wa mwaka ghumwe, awo tsawalapfighwa wawe wa nambiko ya kukala tseghamba. Ayo tsaikala nambiko ya Netaneli mwana wa Suari.

24 Mne litsuwa lya kadatu yalapfile nambiko tsa Eliabu mwana wa Heloni iyakalile chilongotsi wa kabila lya Zebuluni. 25 Yeye tsakalapfa nambiko tsino, sahani imwe ya fetsa ya kilo imwe na nusu, bakuli imwe ya fetsa ya glamu miya nane ka pfapfikighwe ipfinu pfa kulingila ipfili hane Lihema Lienzeluke, tsisahani na bakuli atso tsatsimema usaghe utighinike ghendo uhanganyighwe na mapfuta. Apfo tsapfilapfighwa kwaajili ya nambiko ya tse ipfijo, 26 chisahani chimwe cha nzahabu cha glamu miya imwe na kumi ichimemile upfumba, 27 ng'ombe mmale yumwe iyali mdodo, ng'olo mmale yumwe na mwana we ng'olo yumwe wa mwaka ghumwe, awo tsawalapfighwa wawe nambiko ya kulakatsighwa, 28 mvulati yumwe wa nambiko ya kuleghusa nzambi, 29 ng'ombe wamale weli, ng'olo wamale watano, mvulati watano, na wanang'olo wamale watano wa mwaka ghumwe wawe wa nambiko tsa kukala tseghamba. Aino tsakikala nambiko ya Eliabu mwana wa Heloni.

30 Mne litsuwa lya kane yalapfile nambiko tsa Elisuri mwana wa Shedeuri, ayuno tsa chilongotsi wa kabila lya Rubeni. 31 Yeye tsakalapfa nambiko ino, sahani imwe ya fetsa ya kilo imwe na nusu na bakuli imwe ya fetsa ya glamu miya nane, ka pfapfikighwe ipfinu pfa kulingila ipfili hane Lihema Lienzeluke, sahani na bakuli ino tsapfimema usaghe utighinike uhanganyighwe na mapfuta, apfo tsapfilapfighwa kwaajili ya nambiko ya tse ipfijo, 32 chisahani chimwe cha nzahabu cha glamu miya imwe na kumi ichimemile upfumba, 33 ng'ombe mmale yumwe iyali mdodo, ng'olo mmale yumwe na mwana we ng'olo yumwe wa mwaka ghumwe, awo walapfighwa wawe wa nambiko ya kulakatsighwa, 34 mvulati yumwe wa nambiko ya kuleghusa nzambi, 35 ng'ombe wamale weli, ng'olo wamale watano, mvulati watano, na wanang'olo wamale watano wa mwaka ghumwe wawe wa nambiko ya kukala tseghamba. Aino tsaikala nambiko ya Elisuri mwana wa Shedeuri.

36 Yalapfile nambiko mna litsuwa lya tano, tsa Shelumieli mwana wa Surishadai, chilongotsi wa likabila lya Simioni. 37 Aino iyo nambiko iyalapfile, sahani imwe ya fetsa ya kilo imwe na nusu na bakuli imwe ya fetsa lya glamu miya nane, ka pfapfikighwe ipfinu pfa kulingila ipfili hane Lihema Lienzeluke, sahani na bakuli tsatsimema usaghe utighinike ghendo uhanganyighwe na mapfuta, tsapfilapfighwa pfiwe pfa nambiko ya tse pfijo, 38 chisahani chimwe cha nzahabu cha glamu miya imwe na kumi ichimemile upfumba, 39 ng'ombe mmale yumwe iyali mdodo, ng'olo yumwe mmale na mwana we ng'olo yumwe yane mwaka ghumwe, awo watsakuwa wa nambiko ya kulakatsighwa, 40 mvulati yumwe wa nambiko ya kuleghusa nzambi, 41 na ng'ombe wamale weli, ng'olo wamale watano, mvulati watano na wanang'olo wamale watano wa mwaka ghumwe wawe wa nambiko ya kukala tseghamba. Aino tsaikala nambiko ya Shelumieli mwana wa Surishadai.

42 Iyalapfile nambiko mna litsuwa lya sita tsa Eliasafu mwana wa Deueli, iyakalile chilongotsi wa likabila lya Gadi. 43 Nambiko yake iyalapfile aino hano, sahani imwe ya fetsa kilo imwe na nusu na bakuli imwe ya fetsa ya glamu miya nane ka pfapfikighwe ipfinu pfa kulingila ipfili hane Lihema Lienzeluke, sahani na bakuli tsapfimema usaghe utighinike ghendo uhanganyighwe na mapfuta, apfino pfilapfighwa ili pfiwe pfa nambiko ye chijo, 44 chisahani chimwe cha nzahabu cha glamu miya imwe na kumi ipfimemile upfumba, 45 ng'ombe mmale yumwe iyali mdodo, ing'olo yumwe wa mwaka ghumwe, awo wawe nambiko yakulakatsighwa, 46 na mvulati yumwe yawe nambiko ya kuleghusa nzambi, 47 wang'ombe weli wamale, ng'olo wamale watano, mvulati watano, na wanang'olo wamale watano wa mwaka ghumwe, awo wawe nambiko tsa kukala tseghamba. Atsino tsiso nambiko tsayalapfile Eliasafu mwana wa Deueli.

48 Tsuwa lya saba tsa lya Elishama, imwana wa Amihudi, chilongotsi wa likabila lya Efulemu. 49 Yeye tsakalapfa pfinu pfino, sahani imwe ya fetsa, tsaina kilo imwe na nusu na ibakuli imwe ya fetsa, nayo tsaina glamu miya nane, kwa kulola ipfinu pfa kulingila ipfili mna Lihema Lihenzeluke. Isahani na ibakuli tsaimema usaghe utighinike ghendo na une ghamapfuta, uwe nambiko ya usaghe. 50 Chisahani chimwe cha nzahabu chine glamu miya na kumi tsachimema upfumba, 51 ng'ombe mmale yumwe iyali mdodo, na ng'olo yumwe mmale, ne mwana yumwe we ng'olo wa mwaka ghumwe yawe nambiko yakulakatsighwa, 52 na mvulati yumwe yawe wa kuleghusa nzambi, 53 wang'ombe wamale weli, ng'olo wamale watano, mvulati watano, na wanang'olo wamale watano wa mwaka ghumwe, awo wawe nambiko ya kukala tseghamba. Atsino tsiso nambiko tsayalapfile Elishama mwana wa Amihudi.

54 Tsuwa lya nane tsa lya Gamalieli, mwana wa Pedasuli, chilongotsi wa likabila lya Manase. 55 Yeye tsakalapfa pfinu pfino, sahani imwe ya fetsa, tsaina kilo imwe na nusu na ibakuli imwe ya fetsa, nayo tsaina glamu miya nane, kwa kulola ipfinu pfa kulingila ipfili mna Lihema Lihenzeluke. Isahani na ibakuli tsapfimema usaghe utighinike ghendo na une ghamapfuta, uwe wa nambiko ya usaghe. 56 Chisahani chimwe cha nzahabu chine gilamu miya imwe na kumi ichimemile upfumba, 57 ng'ombe mmale yumwe iyali mdodo, na ng'olo yumwe mmale, ne mwana yumwe we ng'olo wa mwaka ghumwe, wawe nambiko ya kulakatsighwa. 58 Mvulati yumwe yawe nambiko ya kuleghusa nzambi, 59 wang'ombe weli wamale, ng'olo wamale watano, mvulati watano, na wanang'olo wamale watano wa mwaka ghumwe, awo wawe nambiko ya kukala tseghamba. Atsino tsiso nambiko tsayalapfile Gamalieli mwanaghe Pedasuli.

60 Tsuwa lya tisa tsa lya Abidani mwana wa Gidioni, chilongotsi wa likabila lya Benjamini. 61 Yeye tsakalapfa nambiko tsino, sahani imwe ya fetsa, tsaina kilo imwe na nusu na ibakuli imwe ya fetsa, nayo tsaina gilami miya nane, kwa kulola ipfinu pfakulingila ipfili mna Lihema Lihenzeluke. Isahani na ibakuli tsaimema usaghe utighinike ghendo na une ghamapfuta, uwe nambiko ya usaghe. 62 Chisahani chimwe cha nzahabu chine gilamu miya imwe na kumi ichimemile upfumba, 63 ng'ombe mmale yumwe iyali mdodo, na ng'olo yumwe mmale, ne mwana yumwe we ng'olo wa mwaka ghumwe, wawe nambiko ya kulakatsighwa. 64 Mvulati yumwe yawe wa nambiko ya kuleghusa nzambi, 65 wang'ombe weli wamale, ng'olo wamale watano, mvulati watano, na wanang'olo wamale watano wa mwaka ghumwe, awo wawe nambiko ya kukala tseghamba. Atsino tsiso nambiko tsayalapfile.

66 Tsuwa lya kumi tsa lya Ahiezeli mwana wa Amishadai, chilongotsi wa likabila lya Dani. 67 Yeye tsakalapfa nambiko tsino, sahani imwe ya fetsa, tsaina kilo imwe na nusu na ibakuli imwe ya fetsa, nayo tsaina glamu miya nane, kwa kulola ipfinu pfa kulingila ipfili mna Lihema Lienzeluke. Isahani na ibakuli tsaimema usaghe utighinike ghendo na une ghamapfuta, uwe nambiko ya usaghe. 68 Chisahani chimwe cha nzahabu chine glamu miya imwe na kumi ichimemile upfumba, 69 ng'ombe mmale yumwe iyali mdodo, na ng'olo yumwe mmale, ne mwana yumwe we ng'olo wa mwaka ghumwe, awo wawe nambiko ya kulakatsighwa. 70 Mvulati yumwe yawe wa kuleghusa nzambi, 71 wang'ombe weli wamale, ng'olo wamale watano, mvulati watano, na wanang'olo wamale watano wa mwaka ghumwe, awo wawe wa nambiko ya kukala tseghamba. Atsino tsiso nambiko tsayalapfile Ahiezeli mwana wa Amishadai.

72 Tsuwa lya kumi na imwe tsa lya Pagieli mwana wa Okilani, chilongotsi wa likabila la Asheli. 73 Yeye tsakalapfa nambiko tsino, sahani imwe ya fetsa, tsaina kilo imwe na nusu na ibakuli imwe ya fetsa, nayo tsaina glamu miya nane, kwa kulola ipfinu pfa kulingila ipfili mna Lihema Lienzeluke. Isahani na ibakuli tsaimema usaghe utighinike ghendo na une ghamapfuta, uwe nambiko ya usaghe. 74 Chisahani chimwe cha nzahabu chine gilamu miya imwe na kumi ichimemile upfumba, 75 ng'ombe mmale yumwe iyali mdodo, na ng'olo yumwe mmale, ne mwana yumwe we ng'olo wa mwaka ghumwe, wawe nambiko yakulakatsighwa, 76 Mvulati yumwe yawe wa nambiko ya kuleghusa nzambi, 77 wang'ombe weli wamale, ng'olo wamale watano, mvulati watano, na wang'olo wa male watano wa mwaka ghumwe, awo wawe wa nambiko ya kukala tseghamba. Atsino tsiso nambiko tsayalapfile Pagieli mwana wa Okilani.

78 Tsuwa lya kumi na mbili tsa lya Ahila mwana wa Enani, chilongotsi wa likabila lya Nafutali, 79 yeye tsakalapfa nambiko tsino, sahani imwe ya fetsa, tsaina kilo imwe na nusu na ibakuli imwe ya shaba, nayo tsaina glamu miya nane, kwa kulola ipfinu pfakulingila ipfili mna Lihema Lihenzeluke. Isahani na ibakuli tsaimema usaghe utighinike ghendo na une ghamapfuta, uwe nambiko ya usaghe. 80 Chisahani chimwe cha nzahabu chine gilamu miya imwe na kumi ichimemile upfumba 81 ng'ombe mmale yumwe iyali mdodo, na ng'olo yumwe mmale, na mwana yumwe we ng'olo wa mwaka ghumwe, wawe nambiko ya kulakatsighwa, 82 mvulati yumwe yawe nambiko ya kuleghusa nzambi, 83 wang'ombe weli wamale, wang'olo wamale watano, mvulati watano, na wanang'olo watano wa mwaka ghumwe, awo wawe nambiko ya kukala tseghamba. Atsino tsiso nambiko tsayalapfile Ahila mwanaghe Enamu. 84 Ipfinu pfose pfawalapfile pfilongotsi wa Waisiraeli litsuwa lya ukwihimikighwa I matsabahu tsa sahani tsa fetsa kumi na mbili, na tsibakuli tsa fetsa kumi na mbili na pfisahani pfa nzahabu kumi na mbili. 85 Chila isahani ya fetsa tsaina kilo imwe na nusu, na chila bakuli tsaina gilamu miya nane, apfo tsisahani na tsibakuli tsa tsina kilo ishilini na saba na gilamu miya sita kwa kulola ipfinu pfa kulingila ipfili mna Lihema Lienzeluke. 86 Pfisahani pfila pfa nzahabu kumi na mbili ipfimemile upfumba, chila chimwe tsa china gilamu miya na kumi, apfo pfose tsapfina kilo imwe na glamu miya ndatu na ishilini, kwa kulola ipfinu pfa kulingila ipfili mna Lihema Lienzeluke. 87 Iwanyama wose iwalapfighwe wawe nambiko ya kulakatsighwa tsawapfika ng'ombe wamale kumi na weli, na ng'olo wamale tsa kumi na weli, na iwana we ng'olo wamale wane ghumwaka ghumwe tsa kumi na weli, hamwe na nambiko ya usaghe, na mvulati kumi na weli wa nambiko ya kuleghusa nzambi. 88 Iwanyama wose iwalapfighwe wawe nambiko yakukala tseghamba tsa ng'ombe wamale ishilini na nne, na wang'olo wamale tsa sitini, na wavulati tsa sitini, na wana we ng'olo wamale wa mwaka ghumwe tsa sitini. Apfo pfipfo pfinu ipfilapfighwe pfiwe nambiko ahala haihimikighwe matsabahu na haighelighwe ghamapfuta.

89 Musa hayengile mghati mwe Lihema Lienzeluke yakalonge na IMNDEWA, kahulika litsi lyolonga mchanya mwe chighubiko cha lisanduku lya laghano, ichikalile mchanya mwa Lisanduku lye laghano, ichikemighwe hanu ha libatsi, lilawa hala hane pfilumbe weli iwakemighwe Makelubi.