1 IMNDEWA kamlongela Musa, 2 "Walongele Waisiraeli wamlapfe kunze kwe ndalo chila munu yane utamu wa ngotsi, yolawa udusi na iyehile hambele he Imulungu kwa kukinda mauti. 3 Iwanu wose wano, iwamale ne wapinga mtsowalapfa kunze kwe ndalo, ili waleke kuitenda indalo yangu yanikala ihe." 4 Waisiraeli tsawatenda pfipfila ka IMNDEWA pfayawalaghitse, wawalapfa waweka kunze kwe ndalo ka Imulungu pfayalongile na Musa.

5 Kuya IMNDEWA kamlongela Musa, 6 "Walongele Waisiraeli pfino, munu wowose, mmale au pinga yang'amtendela pfihile miyaghe, imunu'yo kakuwa katenda nzambi kwe IMNDEWA. 7 Pfipfila kobamighwa yalonge inzambi yake yaitendile na yamlihe chinu chose na yongetse asilimiya ishilini kwe munu yula yamtendele pfihile. 8 Lekeni ka imunu'yo kafa na kahela ndughu wa habei wa kusola maliho agho, maliho agho ghatsolapfighwa kwe IMNDEWA ghawe gha mtambika. Maliho agho ighatsolapfighwa ghawe na ng'unzu wa kumleghusila nzambi yake iyaitendile. 9 Chila Waisiraeli chawalapfile kwe Mtwatsa Imulungu, chitsakuwa cha mtambika. 10 Na chila chinu chochose imunu chayomwing'a mtambika chitsakuwa chake."

11 IMNDEWA kamlongela Musa, 12 Walongele Waisiraeli pfino, ka mwehe we munu kawasa na mmale yungi, 13 katenda ughoni bila mmale wake kumanya, ipinga ayo kakuwa keha hambele he IMNDEWA, na wala kuduhu munu yamwonile kwaapfila ng'aghoghighwe baye. 14 Lekeni mmale wake yang'amwalangula pfihile mwehe wake iyehile hambele he Imulungu au ka komwonela chepfu hela mwehe wake hata ka ng'ehile baye, 15 baho wose weli watsoghenda kwa mtambika, na waghale nambiko iibamighwa, nambiko ayo itsakuwa kimbo limwe lya usaghe wa shayili, lekeni waleke kughuma mapfuta au upfumba kwaapfila ayo nambiko ya usaghe ya mmale yane chepfu kwa mwehe wake, ili yoneke ka pinga katotsa au ng'atotsile baye. 16 Naye mtambika katsomsoghetsa ipinga ayo hambele ha IMNDEWA. 17 Kuya mtambika katsosola matsi ighaenzeluke mna chia, katsoghela mghati timbwisi lyatsosola hasi ha lihema ili ghawe ghosungu. 18 Naye mtambika katsomwika ipinga ayo hambele he IMNDEWA na kumdohola tsimvili tsake, kuya katsomwing'a inambiko ayo ya usaghe iilapfighwa kwa konelighwa chepfu na mmale wake. Na mna ghumwoko ghwake katsokinda ghamatsi ighali usungu ighoghala lana. 19 Kuya mtambika katsomlighita ipinga ayo kolonga, Ka ng'uwasile na mmale yungi baye, na ghweghwe kwa mwehe wa munu, ghamatsi ghano ighali usungu ghaleke kukulagha. 20 Lekeni ka kwiha kwa kuwasa na mmale yungi aku kuna immale wako, 21 IMNDEWA yakulighite kune wanu wako, uleke kweleka na lida lyako lipfuhumke. 22 Ghamatsi ghano ighokutenda ulighitighwe ghatsakwingila munda mwako ghakutende uleke kweleka na lida lyako lipfuhumke, Naye ipinga katsakwidika, "Amina, Amina."

23 Kuya mtambika katsakwandika ghamalighito agho mna chitabu na katsotsifuta kwa ghamatsi ighali usungu, 24 hambele katsomnwesa ipinga ayo ghamatsi ighali usungu ighoghala malighito, nagho ghatsakwingila munda mwake kuya ghatsomtenda munda mwake mtame ghendo, ka kaghatenda. 25 Imtambika katsosola inambiko ila ya usaghe ya chepfu mna ghumoko ghwe ipinga yula, na kuinula hambele he IMNDEWA, kuya katsoighala mchanya mwe matsabahu. 26 Pfipfila katsodegha ghao limwe lya nambiko ayo ya usaghe, iwe ya kukumbukagha na katsoilakatsa mna matsabahu, kuya katsomnwesa ghamatsi agho. 27 Hayatsakunwa ghamatsi agho, na haitsakwoneka ka kawasa na mmale yungi, ghamatsi agho ighoghala malighito ghatsomtenda munda mwake mtame, na lukuli lwake lutsohumka na ng'atsokinda keli inda baye. Ipinga ayo katsakuwa kana lana kwe wanu wake. 28 Lekeni ka ng'awasile na mmale yungi baye, kuya kela hambele he Imulungu, katsakoneka ng'atotsile baye, apfo ng'atsoghaya baye na katsakweleka wana.

29 Alino lilyo laghitso lya chepfu, aho imwehe iyali na mmale wake yang'awasa na mmale yungi na kwitenda yehe hambele he Imulungu, 30 au immale yang'amwonela chepfu imwehe wake na kompfikitsa pfihile. Katsomghala ipinga ayo yeme hambele he IMNDEWA, na mtambika katsotenda ghose kwa kuwinza laghitso lino. 31 Na mmale ayo katsakuwa ng'atotsile baye, lekeni ka katotsa ipinga ayo ighatsompata agho ghake.