1 Lelo Balamu hayatangile ka IMNDEWA tsakabama kuwamotetsa Waisiraeli, apfo ng'aghendile keli baye kulaghula. Na chihanga chake ching'ali chilola kunyika. 2 Naye kalola, kawona Waisiraeli weka indalo yao, wakala lukolo kwa lukolo. 3 Katunga ing'ungo aino, kalonga,

"Balamu mwana wa Beoli kolonga pfino,

munu yula iyapfumbulighwe tsinenge kolonga,

4 yeye iyohulika ghamalonga ghe Imulungu yane ngupfu,

yakona ghamaono gha Imtwatsa Imulungu

imunu yula hayofughama, tsinenge tsake tsolola.

5 Lola pfibumbulika pfako pfipfinoghile,

Ghwee Yakobu, ulole ghendo tsikaye tsenu pfatsinoghile,

Mwemwe wanu wa Isiraeli!

6 Ka chiwala ichimwagha ghamatsi, ka konde ilili mmbalimbali mwe ghumto,

ka mishubili iyandighwe ne Imulungu,

ka mieletsi iyotile mmbalimbali mwe ghamatsi.

7 Mabigha ghake ghatsomema ghamatsi,

na tsimbeghu tsao tsitsakota hane ghamatsi mengi.

Mfalume wao katsakuwa mkulu kubita Agagi,

na ufalume wake utsotunyighwa sideke.

8 Imulungu kamsola kulawa Misiri,

ketowa kwaajili ye wanu wake kwa ngupfu ka tsa mbogho,

katsoibenabena mipate yawo, katsowahoma kwa mishale yake.

9 Kenama na kakwembela ka simba, yuhi iyodaha kumlamsa?

Yamotetsighwe ayula iyokumotetsa,

na yalighitighwe ayula iyokulighita."

10 Balaki kamwonela maya Balamu, katowa ghamoko ghake hamwe, Balaki kamlongela Balamu, "Nikukema utse undighitile awano iwonihila, lekeni aluno lwakadatu ghweghwe kowamotetsa. 11 Lelo uke hano. Nene tsanikulongela nitsokuliha pfinu pfingi, lekeni IMNDEWA ng'abamamile baye ghweghwe upate pfinu apfo." 12 Balamu kamwidika Balaki, "Angu siwalongele baye iwanu wala yuwatumile wanitsile, 13 tsaniwalongela hata ung'angaile ing'anda yako imemile fetsa na nzahabu, nene sidaha baye kutenda nzambi kwa kutenda chinu chochose kwa kubama nene mwenyegho, chiwe chinogha au chiha. Achila chayatsolonga IMNDEWA chicho chanitsolonga."

14 Balamu kamlongela Balaki, "Nene nakuya kwe wanu wangu, lekeni tanu nobama ghweghwe umanye achila Waisiraeli chawachowatendela iwanu wako mna ghamatsuwa ighakutsa." 15 Katunga ing'ungo aino, kalonga,

"Balamu mwana wa Beoli kolonga pfino,

imunu yula iyafumbulighwe tsinenge kolonga,

16 yeye iyohulika ghamalonga ghe Imulungu,

yeye iyomanya ighali ghe Imulungu iyali kulanga,

yeye iyakona achila chayakona Imulungu yane ngupfu,

yeye iyakwinama hasi aku tsinenge tsolola.

17 Nomwona iyatsakutsa, lekeni si sambi baye, nomlolesa,

lekeni ng'ali habehi baye.

Inondo itsolawila mna lukolo lwa Yakobu,

na ing'weku ya utalawala itsolawila mna Waisiraeli,

na ing'weku ayo itsowatowa pfilongotsi wa Maobu

na kuwakoma iwana wa Seti.

18 Isi ya Edomu itsosolighwa iwe yake,

na isi ya Seili nayo itsakuwa yake, Isiraeli itsakuwa na ngupfu ng'ulu.

19 Munu yumwe katsolawila mna lukolo lwa Yakobu yawatawale,

naye katsowakoma iwanu wose iwalekighwe waghima mna ghumji."

20 Kuya Balamu kawalola Wamaleki, na kawatungila ing'ungo ino,

"Waamaleki tsa wanu wa mwanduso kuwa na ngupfu kubita wanu wa isi tsose,

lekeni watsohupa kwa ukukomighwa."

21 Kuya Balamu kawalola Wakeni,

na kawatungila ing'ungo ino,

"Ikaye yako ina ngupfu, na chibali chako chitsengighwa mna libambalawe.

22 Lekeni mwemwe Wakeni,

mtsokomighwa ahala Ashuru hayatsowaghogha na kuka namwe kutali."

23 Balamu katunga ing'ungo ino, kalonga,

"Mtsochona! Yuhi iyatsokala mghima ahala Imulungu hayatsotenda aghano?

24 Tsimeli tsitsakutsa kulawa Kitimu na kuitowa isi ya Ashuru na Ebeli.

Lekeni naye pfipfila katsokomighwa ghendo."

25 Apfo Balamu koka, koya ukaye yake, naye Balaki pfipfila koka tsake.