1 Tsuwa limwe neghe watano wa Selofehadi tsawamghendela Musa. Mataghwa ghao tsa aghano hano, Mala, Noa, Hogila, Milika na Tilisa. Naye Selofehadi tsakakala mwana wa Heferi, mwana wa Gileadi, mwana wa Makili, mwana wa Manase, na mwana wa Yosefu. 2 Nawo tsawema hambele ha Musa na hambele ha mtambika Eliazali na hambele ha pfilongotsi wose na mtingano ghwose, hane ghumlango ghwa Lihema Lienzeluke, walonga, 3 "Aba wetu tsakafila kunyika, na ng'alekile mwana mmale baye. Naye tsa si yumwe baye we iwanu wala wa Kola, iwetingane hamwe wamleme IMNDEWA, lekeni tsimkomile yeye nzambi tsake mwenyegho. 4 Ule lelo taghwa lya aba wetu lyaghe mna lukolo lwake, kwaapfila tsakahela imwana mmale? Utwing'e twetwe ulisi wa aba wetu hamwe na wandughu tsake." 5 Apfo Musa kaghala lighomba lyao hambele he IMNDEWA. 6 IMNDEWA kamlongela Musa, 7 "Neghe tsa Selofehadi wolongesa ghendo, uweng'e ulisi wao wa isi hamwe na wa ndughu tsake aba wao, nawo wasole ulisi wake." 8 Kuya walongele Waisiraeli pfino, "Imunu yang'afa aku ng'alekile baye imwana mmale, ulisi wake katsakwing'ighwa imwana ipinga. 9 Na ka kahela imwana ipinga, ulisi wake watsakwing'ighwa ndughu tsake wamale. 10 Ka kahela ndughu wamale, ulisi wake weng'ighwe aba tsake wakulu au wadodo. 11 Na ka aba wake kahela ndughu tsake wamale, ulisi wake yeng'ighwe imunu wake wahabehi, na yakuwa yake mwenyegho. Alino laghitso kwa Waisiraeli wose, ka apfila nene IMNDEWA pfanikulaghitsa."

12 IMNDEWA kamlongela Musa, "Ugheluke kuchanya mwe chidunda chino cha Abarimu, ulole isi yaniweng'ile Waisiraeli. 13 Na haumalitsa kuilola, naghwe kutsakufa ka pfayafile ndughu yako Aruni. 14 Kwaapfila mwemwe tsamlema kulikinda laghitso lyangu akula kune nyika ya Sini, ahala ghumtingano ghwose haghunising'inikile nene akula Meriba, ng'ambamile baye ukulu wangu woneke hambele hawo ahala hawabamile weng'ighwe ghamatsi wanwe." Meriba tsa mbwibwi ya ghamatsi ako Kadeshi kune nyika ya Sini. 15 Musa kamlongela IMNDEWA, 16 "Ghwe IMNDEWA, ghwe kwa Mulungu yuweng'a iwanu ughima, umsaghule munu yungi yawe chilongotsi we ghumtingano ghuno. 17 Yeye katsowalongolela na kuwalongotsa ahala hawolawa na ahala hawakuya mkaye, hela waleke koneka ka wang'olo walihela mdimi." 18 IMNDEWA kamlongela Musa, "Umsole Yoshua mwana wa Nuni imunu yane ghomoyo ghunoghile, kuya umwikile ghamoko, 19 na umwike yeme hambele ha mtambika Eliazali na mtingano ghwose ghwa Isiraeli, kuya umwing'e ing'onde ayo aku wolola kwa tsinenge tsao. 20 Naghwe umwing'e chidogho ukulu wako, ili Waisiraeli wose wamtegheletse. 21 Yeye katsakwima hambele ha mtambika Eliazari, mtambika katsomghutsa IMNDEWA yeye yobama choni kwa kutumila libwe lya Urimu na Sumimu. Kwa kutenda pfino Eleazari katsomlongotsa Yoshua na Waisiraeli wose ahala hawolawa na hawakwingila." 22 Musa katenda ka IMNDEWA pfayamlaghitse. Tsakamsola Yoshua kamwika yeme hambele ya mtambika Eleazari na hane iwanu wose wa Isiraeli. 23 Kuya kamwikila ghamoko mwitwi na kumwing'a ukulu wa kuwalongotsa iwanu ka IMNDEWA pfayamlaghitse.