1 Pfilongotsi wangi iwolawila mna tsikolo tsa Gilieadi, mwana wa Makili, naye Makili tsamwana wa Manase, naye Manase tsa mwana ya Yosefu, awo wasoghela hambele ha Musa na hambele ha pfilingotsi wa tsikolo tsa Isiraeli 2 Walonga, "IMNDEWA kowalaghitsa muwagholele Waisiraeli isi kwa kwasa tsisimbi mchanya tsilamle. Pfipfila kowalaghitsa uweng'e neghe Zelofehadi iyali ndughu yetu, isi ya aba wao. 3 Lekeni ka wang'akwelighwa na wamale iwolawila mna ghamakabila ghangi gha Isiraeli, isi yaweng'ighwe iwahenga wa likabila letu itsosolighwa na makabila ghe wamale wao, apfo isi yawapatile iwahenga wa likabila letu itsohunguka. 4 Hachipfika chihungo cha miyaka hamsini, ahala tsimali itsihutsighwe hatsikuhitsighwa, isi ya neghe Zelofehadi itsosolighwa na likabila lye wamale wala iwatsowakwela na isi ya ulisi yaweng'ighwe iwahenga wa likabila lyetu itsohunguka." 5 Apfo Musa kaweng'a Waisiraeli laghitso lino kulawa kwe IMNDEWA, kawalongela, "Iwanu wa lukolo lwa Yusufu wolongesa ghengo." 6 Apfi pfipfo IMNDEWA pfayolaghitsa mna lighomba lya neghe tsake Zelofehadi, kalonga, "Wakwelighwe na munu wowose iwombama, lekeni wakwelighwe na munu wa tsikolo tsa aba tsao, 7 wang'atenda apfo, isi ya Waisiraeli ng'aitsohamila baye kune likabila lingi, kwaapfila chila Muisiraeli katsokala mna isi ya lukolo lwa aba wake. 8 Chila mwana ipinga iyosola isi iwe ulisi wake mna likabila lya Isiraeli kobamighwa yakwelighwe na mmale iyolawa mna likabila lya aba wake, ili chila Muisiraeli yakale mna isi ya ulisi wa aba wake. 9 Apfo kutsakuwa kuduhu isi itsolawa likabila limwe na ighende likabila lingi, kwaapfila chila likabila lya wanu wa Isiraeli litsokala kune isi yake." 10 Apfo neghe tsake Zelofehadi tsawatenda ka IMNDEWA pfayamlaghitse Musa. 11 Apfo wose Mala, Tilisa, Hogila, Milika na Noa tsawakwelighwa na wana wa aba tsao wadodo na wakulu. 12 Tsawakwelighwa mna lukolo lwa likabila lya Manase, imwana wa Yosefu, na isi yawo ighendelela kukala mna likabila lya aba wao. 13 IMNDEWA tsakawalaghitsa Waisiraeli ghamalaghitso ghano na imiko ino kubitila Musa mna chiwala cha Moabu, kumwambu kwa ghumto Yoridani habehi na Yeriko.