1 Aghano ghagho ghamalonga Musa ghayawalongele Wasiraeli wose kumwambu kwa ghumto ghwa Yoridani hawakalile kunyika, mna isi ing'ali ilolesa na Sufu, haghati ha imiji ya Palani, Tofeli, Labani, Hazeloti na Dizahabu. 2 Kulawa Holebu, ihomanyika ka chidunda Sinai, mbaka kupfika Kadeshi Barinea mwanza ghwa matsuwa kumi na limwe kwa kwang'ila inzila ili mchidunda Seili. 3 Mna litsuwa lya mwanduso lya ghumwetsi ghwa kumi na ghumwe, mwaka ghwa alubaini tangia hawalawile Misiri, Musa tsakawalongela Waisiraeli wose aghala IMNDEWA ghayamlaghitse yawalongele. 4 Katenda apfo ahala hayamtowile Sihoni mfalume wa Waamori, iyang'ali yokala mna ghumji ghwa Heshiboni, na Ogu mfalume wa Bashani iyang'ali yokala mna ghumji ghwa Ashitaroti na Edirei. 5 Kumwambu mwa Yoridani mna isi ya Moabu kuko Musa kwayanzile kuwalongela ghamalaghitso aghano gholongatse, kalonga, 6 "IMNDEWA Imulungu wetu katulongela twetwe hatukalile akula kuchidunda Horebu, ‘Mkala matsuwa mengi mna ichidunda achino, 7 lelo mhunduke mghendelele na ghumwaza ghwenu, mghende mna isi ili mna ipfidunda pfa wanu wa Amori, na mghende kuna isi tsose itsili habehi na ghumto Yoridani, mna isi ya Araba, isi itsili mpfidunda na itsili mchiwala, na isi ya Negebu na itsili kumwani, mbaka kuna isi ya Wakanani na Lebanoni, mbaka kuna ghumto mkulu ghwa Efurati. 8 Mlole, nomwing'ani isi aino muitawale. Mwingile na msole pfose ipfili mumo ka nene IMNDEWA pfanilahile ka nitsoweng'a iwahenga wenu Aburahamu, Isaka, Yakobu na pfeleko pfawo.’ "

9 Hatung'ali twa kuchidunda, tsaniwalongela, "Nene sidaha baye kughala mtsigho aghuno ghwa kuwalongotsani niliyeka. 10 IMNDEWA, Imulungu wenu, kawongetsa sideke, na sambi mwa wengi ka tsinondo tsa kulanga. 11 IMNDEWA, Imulungu wa iwahenga wenu yawongetse mala elufu kubita pfamli sambi, na yawabaliki ka pfayalongile. 12 Lelo nene niliyeka nitsodahatse kusola mtsigho aghuno mtito ghwa kulamlitsa ukwisonga kwenu na maghomba ghenu? 13 Muwasaghule iwanu iwakengele, iwomanya, na iwotogholighwa na iwanu kulawa mna makabila ghenu, na nene nitsowatenda wawe pfilongotsi wenu." 14 Namwe mnyidika, mlonga, "Chaubama tutende chinogha." 15 Apfo niwasola iwanu wamuwasaghule kulawa mna ghamakabila ghenu, iwakengele, iwomanya, na iwotogholighwa na iwanu niwatenda wawe pfilongotsi wenu, wamwenga walongotse wanu elufu, wangi walongotse wanu miya, wangi walongotse wanu hamsini, na awala iwolongotsa wanu kumikumi, na wemilitsi ka ghamakabila ghenu pfaghali.

16 "Kuko kuchidunda pfipfila niwalaghitsa walamlitsi wenu, niwalongela, ‘Mghategheletse maghomba gha ndughu tsenu na mghahighe pfinoghile, ka lighomba alyo lyolawa kwa Waisiraeli wayenu, au hata ka lyolawa kwe wagheni iwokala na mwemwe. 17 Hamuhigha ghamaghomba, mleke kulola pfihanga pfa iwanu. Muwategheletse iwabala na awala iwakwoneka mbughilambughila. Mleke kumpfuka munu wowose kwaapfila ukuhigha kwamughigha kolawa kwa Imulungu. Ka hana ghomba kulu na ng'amdaha baye kulilamla, ngalileni nene nani nitsolitegheletsa.’ 18 Matsuwa ghagho tsaniwalongela chila chinu cha ukutenda."

19 "Ka IMNDEWA Imulungu wetu pfayatulaghitse, twanza ghumwanza ghwetu kulawa kuchidunda Horebu, twang'a mna inyika aila ng'ulu ighuma wogha yamuimanyile, tuwinza nzila ighenda mna isi ya ipfidunda pfa wanu wa Amori, na hatupfikile Kadeshi Barinea, 20 nene niwalongelani, ‘Lelo mpfika mna isi ya ipfidunda ya wanu wa Amori, iyotwing'a IMNDEWA Imulungu wetu tuitawale. 21 Mlole, IMNDEWA Imulungu wenu kamwing'ani isi. Mgheluke na muisole, ka IMNDEWA Imulungu wa iwahenga wenu pfayawalongele. Mleke kupfuka wala kutenyuka ghumoyo.’ "

22 "Lekeni mnyitsila na mnongela, ‘Tanu tuwatume wanu walongole muisi, ili wakaipelembe isi na watulongele inzila inoghile ya ukughenda ako, na imiji yake pfaili.’ 23 Chamlongile choneka chinogha kuna nene, apfo niwasaghula wanu kumi na weli, munu yumwe kulawa chila kabila. 24 Awo woka na wagheluka mna isi ili mchidunda, na waghendelela mbaka wapfika mna lwanda lwa Eshikoli na waipelemba na wayona apfila pfaili. 25 Waghondola ghamatunda ghawapatile ako na watughalila watulongela apfino, ‘Isi iyatwing'ile IMNDEWA Imulungu wetu inogha sideke.’ 26 Lekeni mwemwe ng'ambamile ukugheluka ako baye, na mlema kukinda lilaghitso lya IMNDEWA Imulungu wenu. 27 Mlongeleka mna ipfibumbulika pfenu mlonga, ‘IMNDEWA kotuhila, katulapfa mna isi ya Misiri katughala akuno mna ghamoko gha Waamori ili watukome.’ 28 Lelo tughenda kwani? Ndughu tsetu watutenyula imimoyo yetu, watulongela, ‘Matsinu ighali ako ghana bapfu na matali kubita twetwe, imiji yawo mikulu na mibanda yawo mitali mbaka kulanga. Tughona matsinu makulu, gha ilweleko lwa Anaki.’ " 29 "Lekeni nene niwalongelani, ‘Mleke kutenyuka ghumoyo, wala mleke kuwapfuka.’ 30 IMNDEWA, Imulungu wenu, iyowalongolela hambele, katsowatowelani ka pfamwonile pfayawatendele akula Misiri, 31 na ka pfayatendile akula kunyika. Ako mmwona IMNDEWA Imulungu wenu pfayawabapile mna ghumwanza ghose ka aba pfayombapa imwanaghe mbaka mpfika hanu ahano." 32 Lekeni hamwenga na aghano ghose ghayatendile, mwemwe ng'amumtoghole baye IMNDEWA, Imulungu wenu, 33 iyawalongolele mna ghumwanza ghwenu kuwabamila hanu ha ukwika tsindalo tsenu. Nechilo kawalongolela kwa ngutso ya ghumoto na nemisi kawalongolela kwa ngutso ya libingu kuwalangusa inzila.

34 "IMNDEWA hayahulike ukulongeleka kwenu, tsakona maya, kelaha, na kalonga, 35 ‘Kududu hata yumwe wenu mna lweleko aluno lwihile iyatsoyona isi inoghile yanilahile kuweng'a iwahenga wenu. 36 Lekeni Kalebu mwana wa Yefune, ayo katsoyona, na nitsomwing'a yeye na lweleko lwake isi iyaikanyaghe, kwaapfila yeye kanitegheletsa kwa ghumoyo ghwake ghwose.’ 37 IMNDEWA kambonela maya nene kwaajili yenu, na kalonga, ‘Wala ghweghwe pfipfila ng'ukwingila ako baye. 38 Lekeni Yoshua mwana wa Nuni, iyali mtumighwa wako, yeye katsakwingila ako, mghume ghumoyo kwaapfila yeye katsowagholela Waisiraeli isi ayo.’ "

39 "Kuya wadodo wenu, wamlongile watsoghoghighwa, iwana wenu ing'awomanya baye ghanoghile na ighehile awo wawo iwatsakwingila ako, nitsoweng'a isi ayo iwe yawo. 40 Lekeni mwemwe, mhunduke na mke kunyika kwa kwang'ila inzila ya Bahali ya Shamu."

41 "Lekeni mnyidika, ‘Twetwe tumtotsela IMNDEWA, tutsogheluka kwitowa nawo ka IMNDEWA pfayatulaghitse.’ Apfo chila munu kakinda ipfinu pfake pfa kwitowa ing'ondo, kwaapfila tsampfikitsa mwodaha kuisola isi ayo ya ipfidunda."

42 "Naye IMNDEWA kanongela, Walongele, ‘Mleke kughenda kwitowa kwaapfila nene sitsakuwa namwe baye, hela mtsotowighwa na awala wamghenda kwitowa nawo.’ " 43 Na nene niwalongelani, lekeni ng'amniteghetse baye, mlema kutenda achila chayawalongele IMNDEWA, na mghenda mna isi ya ipfidunda. 44 Na Waamori iwang'ali wokala kupfidunda, wawalawila na wawawingani ka wanu wowingighwa na wanzukwi, mtowighwa kulawa Seiri mbaka Horima. 45 Apfo muya na mlila hambele ha IMNDEWA, lekeni yeye ng'ategheletse baye ichililo chenu, na ghamaghutwi ghake kadiwa.

46 "Apfo mkala Kadeshi kwa matsuwa mengi."