1 "Kuya tuhunduka, na tugheluka kubitila nzila ighenda Bashani, na mfalume wa Bashani na wanu wake watutsila wetowe na twetwe habehi na ghumji ghwa Edirei. 2 IMNDEWA kanongela, ‘Mleke kumpfuka, kwaapfila nimwika mna ghamoko ghenu, yeye na iwanu wake wose na isi yake. Mtoweni ka pfamumtowile Sihoni, imfalume wa Waamori, iyang'ali yokala mna isi ya Heshiboni.’ "

3 "Apfo IMNDEWA Imulungu wetu katwapfila tumtowa Ogi mfalume wa Bashani na iwanu wake, tuwadughadugha, na ng'atulekile munu baye. 4 Baho tumboka imiji yake, na kuduhu hata ghumwe ghwatughulekile mna imiji yose sitini ili mna isi ya Arigobu, isi iyaitawale mfalume Ogu wa Bashani. 5 Imiji yose ayo tsaitsungulusighwa mibanda mitali, na milango mikulu ine tsikufuli, pfipfila tsatuboka pfijiji pfilihela imibanda. 6 Tuihinya imiji ayo na kukoma chila munu, wamale, wapinga na wana wadowado ka pfatutendile mna isi ya Heshboni ya mfalume Sihoni. 7 Tuwaboka iwanyama na tsimali itsili mna imiji yawo."

8 "Matsuwa agho tuisola isi ayo ya wafalume weli wa Waamori iwang'ali wokala kumwambu mwa ghumto Yoridani, haghati ha ghumto Arinoni na chidunda cha Herimoni. 9 Iwanu wa Sidoni wochikema ichidunda cha Herimoni Sirioni, na iwanu wa Amori wochikema Seniri. 10 Tuboka imiji yose ikalile mpfidunda, na isi yose ya Gileadi mbaka Saleka na Edirei na imiji ya Ogi, mfalume wa Bashani. 11 (Ogi mfalume wa Bashani yuyo iyakalile yaliyeka mna iwanu wa Refai, lusatsi lwake tsa lwa chuma, na tsaluna utali wa futi kumi na ndatu na nusu, na ughatsi wake tsa futi sita, na lung'ali lwabaho mna ghumji ghwa Raba mna isi ya Waamori.)"

12 "Hatuibokile isi ayo iwe yetu, niweng'a Warubeni na Wagadi isi ilawa Aroeli ili mmbalimbali mwa chiwala cha Arinoni, na nusu isi ya pfidunda pfa Gileadi, na imiji yose ili mumo. 13 Kuya niweng'a nusu ya likabila lya Manase isi ikalile ya Gileadi, Bashani yose iyaitawale mfalume Ogu, isi yose ya Arigobu ayo yose ing'ali ikemighwa Bashani. Isi yose ya Bashani ing'ali imanyika ka isi ya wanu wa Refai." 14 Yaili, munu wa likabila lya Manasse kasola isi yose ya Argobu mbaka hatsibakane isi tsa Geshuli na Maaka Katsikema isi atso kwa taghwa lyake mwenyegho, mbaka leloli isi ya Bashani yokemighwa Pfijiji pfa Yaili.

15 "Wanu wa lukolo lwa Makini iwolawila mna likabila lya Manase niwenng'a isi ya Gileadi. 16 Lekeni likabila lya Rubeni na lya Gadi niweng'a isi yose ya Gileadi mbaka kune ghumto ghwa Arnoni, aghati mwa lwanda lwa ghumto Anoni tsakuna ghumbaka ghwa kusini, na ghumbaka ghwa mashaliki tsa ghumto Yaboki, ghubakane na isi ya wanu wa Amori. 17 Na ubali wa maghalibi kuna ghumto Yoridani, kulawa tsiwa Galilaya na ghuhulumka mbaka bahali ya Araba, bahali ya munyu, mbaka kuhisi kwa Pisiga, ubali wa mashaliki."

18 "Matsuwa aghala niwalaghitsani, ‘IMNDEWA Imulungu wenu kamwing'ani isi ino iwe yenu. Lelo mwemwe mna bapfu, msole tsisilaha tsenu mkaloke ghumto Yoridani aku muwalongolele Waisiraeli. 19 Lekeni wehe tsenu, wanenu na wanyama wenu, na nomanya mna wanyama wengi, watsokala mna imiji yaniweng'ile. 20 Muwapfile Wasiraeli wayenu mbaka wabwihile ka mwemwe pfambwihile, nawo wabokele isi iyoweng'a IMNDEWA, Imulungu wenu iwe yawo, isi ili kumwambu mwa ghumto Yoridani. Mng'atenda apfo mwodaha kuya mna isi ino yaniweng'ile iwe yenu.’ "

21 "Kuya nimlaghitsa Yoshua, ‘Ghweghwe tsakona kwa nenge tsako mwenyegho aghala ghose ghayatendile IMNDEWA Imulungu wenu kwa wafalume awano weli, naye katsowatendela pfipfo wafalume wose wa chila isi yamtsoiboka iwe yenu. 22 Mleke kuwapfuka kwaapfila, IMNDEWA Imulungu wenu katsowatowelani mwemwe.’ "

23 "Matsuwa agho nimdedetsa IMNDEWA, nilomba, 24 ‘Ghwee IMNDEWA Mulungu, tsakwanza kunangusa nene mtumighwa wako, ukulu wako na ghumoko ghwako ghuna ngupfu. Kwaapfila kuna mulungu wachi yali kulanga au muisi iyodaha kutenda pfinu pfikulu pfakukangawatsa ka pfautendile ghweghwe? 25 Undeke niloke ghumto Yoridani, ndole isi ayo inoghile ili kumwambu mwa ghumto Yoridani, isi ine pfidunda pfinoghile na pfidunda pfa Lebanoni.’ "

26 "Lekeni mwemwe mumtenda IMNDEWA Imulungu yambonele maya, kalema kunitegheletsa, kanongela, ‘Imala! Leka kunongela keli imbuli aino. 27 Ughende hane hanu ha ukutambikila cha chidunda Pisiga na ulole ghoya maghalibi, kasikazini, kusini na mashaliki. Lola pfinoghile achila chaukona, kwaapfila ng'autsoloka baye ghumto Yoridani. 28 Ummlaghitse Yoshua, umghume ghumoyo na ingupfu, kwaapfila yeye yuyo iyatsowalongotsa iwanu awano waloke ghumto, na kuisola isi yamuyona.’ "

29 "Apfo tukala mna chiwala chili babehi na ghumji ghwa Beti Peori."