1 Musa kawalongela keli, "Tegheletseni mwemwe Waisiraeli, muikinde imiko na ghamalaghitso ghose ghaniwalangulitsa. Ghakindeni namwe mtsakuwa waghima na mtsoisola isi aila iyatsoweng'a IMNDEWA, Imulungu wa iwahenga wenu. 2 Mleke kongetsa wala kuhungutsa mbuli yoyose mna aghano ghaniwalaghitsa. Lekeni mghakinde ghamalaghitso gha IMNDEWA, Imulungu wenu ghaniwalaghitsa. 3 Mwemwe mwona kwa tsinenge tsenu chayatendile IMNDEWA kwa Baali Peori, IMNDEWA, Imulungu wenu kamkoma chila munu kulawa mna mwemwe, iyamuwinzile Baali Peori. 4 Lekeni mwemwe yamwikindilise na IMNDEWA, Imulungu wenu, mwawaghima mbaka leloli aino."

5 "Mlole! Niwafunda imiko na ghamalaghitso ka pfayanilaghitse IMNDEWA, Imulungu wangu ili mkaghakinde hamtsakwingila na kuisola isi ayo iwe yenu. 6 Mng'aghakinda agho pfinoghile, wanu wa isi tsingi hawatsohulika ghamalaghitso agho, watsomanya ka mwemwe mkengela na mna mbutsi, nawo wotsolonga, ‘Iwanu wa isi ino ng'ulu wakengela na wana mbutsi’ ".

7 "Haduhu isi yoyose aila, hata iwe ng'ulu pfihi, ine Imulungu iyali habehi nawo ka IMNDEWA, lmulungu wetu pfayali habehi na twetwe, iyotwidika chila hatumkema yatwapfile. 8 Wala haduhu isi yoyose aila, hata iwe ng'ulu pfihi, ina ghamalaghitso ghanoghile na igholongesa ka aghano ghaniwalangulitse leloli."

9 "Lekeni mwalangitse mleke kwisemwa aghala ghose ghamwonile kwa nenge tsenu wenyegho. Ileke kulawila mwemwe kughasemwa mmoyo mwenu agho ghose mna ughima wenu. Muwapetele iwanenu na iwatsukulu wenu. 10 Mlikumbuke litsuwa alila hamwimile hambele ha IMNDEWA, Imulungu wenu ako Horebu, hayanongele, ‘Muwatinganitse hamwe iwanu awano hambele hangu, wahulike malonga ghangu, ili welangulitse kunipfuka nene matsuwa ghose gha ughima wawo muisi, nawo wadahe kuwalangulitsa iwana wawo.’ "

11 Mseghela habei na mwima hasi ha ichidunda achila iching'ali chikwaka ghumoto ighupfikile mbaka kulanga, ichighubikighwe na ichisi na libingu. 12 Kuya IMNDEWA kalonga namwe kulawa mna ghumoto aghula. Muhulika ghamalonga ghayalongile lekeni ng'ammwonile baye umbo lyake lili pfihi, ila muhulika litsi liliyeka. 13 Kawapetelani laghano lyake, kawalaghitsa mlikinde, ghamalaghitso aghala kumi, ghayandike mna mabamba meli gha ghamabwe. 14 Na IMNDEWA kandaghitsa mna ghamatsuwa aghala niwalangulitse ghamalaghitso ghose ghambamighwa kughakinda mna isi yamghenda kuisola iwe yenu.

15 "Lelo mwalangitse, kwaapfila ng'amwonile lumbo lyolyose baye akula Horebu, IMNDEWA hayalongile namwe kulawa mna ghumoto, 16 ili mleke kutenda nzambi, kwa kwitendela wenyegho chinyagho cha lumbo lyolyose, liwe lya mmale au lya pinga, 17 au liwe lya mnyama yali muisi wala lya chideghe iyoghuluka mlanga, 18 au lilumbo ilighala na chiumbe ichitambala muisi, wala isomba yali mmatsi. 19 Na hamlola kulanga na kwona litsuwa, ilwetsi, na tsinondo na pfose pfili kuko, mwalangitse, mleke kunoghelwa napfo na kupfitamanila wala kupfitumikila, kwaapfila IMNDEWA, Imulungu wenu kapfiumba pfiwe pfa wanu wose iwali hasi ha lilanga. 20 Lekeni IMNDEWA kawasolani mna litanulu lya chuma akula Misiri ili muwe wanu wake, ka apfino pfamli leloli. 21 IMNDEWA tsakanighudubukila nene kwajili yenu, naye tsakelaha ghendo ka nene sitsoloka baye ghumto ghwa Yoridani na kwingila mna isi inoghile iyomwing'ani IMNDEWA, Imulungu wenu muisole iwe yenu. 22 Nene nitsakufila mna isi ino, sitsoloka baye ghumto, lekeni mwemwe mloke na muisole isi ayo inoghile iwe yenu. 23 Mwalangitse, mleke kwisemwa lilaghano IMNDEWA wenu lyayekile na mwemwe. Mleke kusongola chinyagho chochose ichighala na lumbo lyolyose lyawaghomile IMNDEWA, Imulungu wenu. 24 Kwaapfila IMNDEWA, Imulungu wenu ka lilambi ililakatsa, na Imulungu yane wipfu."

25 "Hamtsokala matsuwa mengi mna isi ayo, na kweleka wana na kupata watsukulu, mng'anza ukwagha na kusongola chinyagho cha lumbo lyolyose, na kutenda ghehile hambele he IMNDEWA, Imulungu wenu na kumtenda yone maya, 26 nene leloli nokema lilanga lyone na isi yone pfamtsosumka kuhupa mna isi ili kumwambu kwa ghumto ghwa Yoridani yamloka mkaisole. Ng'amtsokala baye matsuwa mengi, lekeni mtsokomighwa ghendo. 27 Na IMNDEWA, Imulungu katsowapwililisa mna isi tsingi, na iwatsokala waghima ako watsakuwa chidogho, kuna tsiisi IMNDEWA, Imulungu tsayatsowawingila."

28 Ako mtsotumikila milungu ya mibiki na ghamabwe, isongolighwe na ghamoko gha iwanu, nayo ng'aidaha baye kwona, wala kuhulika, wala kuja, wala kunusa. 29 Lekeni ako, mng'ambama IMNDEWA, Imulungu wenu mtsomwona ka mtsombama kwa ghumoyo ghwenu ghwose, na kwa ghumuhe ghwenu ghwose. 30 Hamtsoghanzika, na agho ghose ma ghang'awalawila, mtsomhundukila IMNDEWA, Imulungu wenu na kumhulikitsa chayolonga. 31 Kwaapfila IMNDEWA, Imulungu wenu, ka Imulungu wa libatsi, ng'atsowaleka baye au kuwalagha au kwisemwa lilaghano lyayekile na iwahenga wenu kwa ukwilaha. 32 "Lelo mghutse ipfinu pfilawile ghumwande, matsuwa aghala mwemwe ng'ana mwelekighwe baye, tangia litsuwa alila Imulungu hayaumbile imunu mna isi, muighutse isi yose kulawa membe imwe mbaka membe ingi, ka kulawila chinu chochose chikulu ka achino, au ka chihulikighwa chinu ka achino. 33 Angu hana wanu wangi iwahulike litsi lya Imulungu kolonga kulawa mmoto, ka mwemwe pfamuhulike, na waghendelela kuwa waghima? 34 Angu hana mulungu wowose iyaghetsile kughenda kusola iwanu wa isi imwe kulawa mna isi ingi kwa kuwaghetsa, kwa pfitango, kwa pfihulo, au kwa ng'ondo au kwa ghumoko ghuna ingupfu, au kwa ghumoko ighugholoke, au kwa pfinu ipfighuma wogha, ka apfila IMNDEWA, Imulungu wenu pfayawatendele ako Misiri, aku mwakwona kwa tsinenge tsenu? 35 Namwe mlangusighwa aghano ghose ili mmanye ghendo ka IMNDEWA yuyo Imulungu, yeye kayeka na haduhu yungi ka yeye. 36 Kawatenda muhulikitse litsi lyake kulawa kulanga ili yawafunde. Mne isi yeye kawalangusa ghumoto ghwake mkulu, na muhulika chayalongile kulawa mmoto. 37 Kwaapfila yeye kawakunda iwahenga wenu, na kawasaghula iwatsukulu wawo, kamlapfani kulawa isi ya Misiri kwa kughenda hamwe namwe na kwa ngupfu yake ili ng'ulu, 38 ili kuwawinga hambele henu iwanu wa isi ng'ulu na tsina ingupfu kubita mwemwe, na kawaghala mkakale mna isi tsawo, na kamwing'ani tsiwe tsenu, ka pfaili leloli. 39 Apfo mtange ghendo na mwike mna imimoyo yenu, ka IMNDEWA yuyo Imulungu iyali uchanya kulanga na iyali hasi kuisi. Kuduhu yungi. 40 Apfo mkinde imiko na ghamalaghitso ghake ghanimwing'ani leloli, ili mbwede, mwemwe na iwatsukulu wenu iwatsakwoneka, na ili mkale matsuwa mengi mna isi iyomwing'ani IMNDEWA, Imulungu wenu iwe yenu matsuwa ghose."

41 Kuya Musa kabaghula miji midatu ili kumwambu mwa ghumto Yoridani ubali wa kwalilawila litsuwa, 42 ili munu wowose yadahe kutsumila ako ka kakoma imunu bila kumanya wala ng'amwihile baye. Imunu ka ayo katsotsumila mji ghwoghwose mna imiji ayo ili yahone kwa kukala mumo. 43 Imiji yenyegho iyo aino, Beseri ili mna ichiwala cha nyika, wekilighwa Warubeni, na Ramoti ili Gileadi, wekilighwa Wagadi, na Golani ili Bashani wekilighwa Wamanase.

44 Aghano ghagho ghamalaghitso Musa ghayaweng'ile Waisiraeli. 45 Aino iyo imiko, malaghitso, na mahigho, Musa ghayaweng'ile hawalawile Misiri, 46 hawang'ali wa kumwambu kwa ghumto ghwa Yoridani, mna lwanda iluli hambele ha Beti Peori, mna isi ya Waamori ya mfalume Sihoni, iyatawale ghumji ghwa Heshboni, iyatowighwe na Musa na Waisiraeli hawalawile Misiri. 47 Waisola isi ayo iwa yawo, na isi ya Ogi mfalume wa Bashani, wawo iwafalume weli iwang'ali wokala kumwambu kwa ghumto ghwa Yoridani, ubali wa kwalilawila litsuwa. 48 Isi aino yenela kulawa mmbalimbali mwa ghumto ghwa Arinoni mbaka mna chidunda cha Sirioni, sambi yomanyika Herimoni. 49 Pfipfila na isi ili kumwambu kwa ghumto ghwa Yoridani ubali wa kwalilawila litsuwa, ibakane na Bahari ya Munyu, ili mna imihulumko ya Pisiga.