1 Musa kagheluka kuchidunda cha Nebo kulawa mna ichiwala cha Moabu, mbaka kuna ichidando cha ichidunda cha Pisiga, ubali wa mashaliki iching'ali chilolesa na Yeriko. Aho IMNDEWA kamlangusa isi yose kulawa Gileadi mbaka Dani, 2 na isi yose ya Nafutali, na ya Efuremu na Manase, na isi yose ya Yuda mbaka ibahari ya Mediterania, 3 na isi ya Negebu, na ichiwala cha ulwanda wa Yeriko, ighukemighwa ghumji ghuna imibiki ya mitende, mbaka Soari.

4 Kuya IMNDEWA kamlongela Musa, "Aino iyo isi yanilahile na Aburahamu, Isaka, na Yakobu, hanilongile, ‘Nitsoweng'a watsukulu wenu.’ Nikulangusa wone kwa nenge tsako ghumwenyegho, lekeni ng'utsoloka upfike ako baye." 5 Na Musa imtumighwa wa IMNDEWA kafa mna isi ya Moabu, ka IMNDEWA pfayalongile. 6 IMNDEWA kamtsika mlwanda, mna isi ya Moabu, ing'ali ilolesa na Beti Peori, lekeni mbaka leloli aino kuduhu munu yamanyile hanu halili likabuli lyake. 7 Musa tsakafa aku kana miyaka miya imwe na ishilini, lekeni nenge tsake ng'atsibofuke baye, wala ilukuli lwake ng'alulalile baye. 8 Waisiraeli wamlilila Musa mna ulwanda wa Moabu kwa matsuwa selasini, walila mbaka ghamatsuwa gha ukudomboketsa haghamalile.

9 Yoshua mwana Nuni tsakamema na iloho ya ukukengela, kwaapfila Musa tsakamwikila ghamoko ghake. Apfo iwanu wa Isiraeli tsawamtegheletsa na watenda ka apfila IMNDEWA pfayamlaghitse Musa. 10 Ng'ana yalawile baye nabii yungi mna isi ya Isiraeli ka Musa, iyalongile na IMNDEWA chihanga kwa chihanga. 11 Kuduhu nabii yungi iyatendile pfitango na pfinu pfa kukangawatsa ka apfila IMNDEWA pfayamtumile Musa yatende kwa Farao na iwatumwa wake wose, na kwa isi yake yose. 12 Kuduhu ghendo inabii yungi iyatendile pfinu pfikulu na ipfighuma wogha ka apfila pfayatendile Musa hambele ha Waisiraeli wose.