1 Musa kaghendelela ukulonga, "Ukubalikighwa na ukulighitighwa kwose hakutsowatsila ka pfaniwalongele, mtsoghakumbuka agho ghose ahala IMNDEWA Imulungu wenu hayatsowapwililisa mna tsiisi tsingi, 2 mwemwe na wanenu hamtsomuyila IMNDEWA wenu na kumtegheletsa yeye kwa ghumoyo ghwenu ghwose na kwa ghumuhe ghwenu ghwose mna aghala ghose ghaniwalaghitsa leloli, 3 kuya IMNDEWA wenu katsowoyitsila aghala ghose ighanoghile ighali ghenu, na katsowonela libatsi na katsoweka keli hamwe kulawa mna isi tsose tsa kutali tsampwililikile. 4 Hata ka tsakawapfilisa mna isi ili kutali ghendo, kulawa ako kutali Imulungu wenu katsowatinganitsa hamwe na kuwoyitsa, 5 na katsowaghala mna isi yawakalile wahenga wenu, namwe mtsoisola keli isi ayo iwe yenu, naye katsowatendela ghanoghile, na katsowatenda mwongetseke muwe wengi kubita wahenga wenu. 6 IMNDEWA Imulungu wenu katsowatenda mwemwe na watsukulu wenu muwe na mimoyo ya kutegheletsa, ili mumkunde yeye kwa ghumoyo ghwenu ghwose, na ghumuhe ghwenu ghose ili muwe wagima mna isi ayo. 7 IMNDEWA Imulungu wenu katsogheka malighito ghose mchanya mwa iwanu iwowehila, awala iwawadununze. 8 Namwe mtsomtegheletsa chayolonga IMNDEWA, kughakinda malaghitso ghake ghose ghanimlaghitsani leloli. 9 Na IMNDEWA Imulungu wenu katsowatenda mwemwe mbwede kwa chila ng'onde ya ghamoko ghenu yomsang'ana, mtsakweleka wana wengi, na mtsakuwa na ng'ombe wengi na mighuda yenu itsakweleka pfijo pfingi. Kwaapfila Imulungu katsowadeng'elela keli, na kuwatenda mbwede ka apfila Imulungu pfayadeng'elele kuwatenda iwahenga wenu wabwede. 10 Mng'amtegheletsa IMNDEWA, Imulungu wenu kwa kughakinda malaghitso ghake ghose ghandikighwe mna chitabu cha malaghitso na kumuyila yeye kwa ghumoyo ghwenu ghwose na mbutsi tsenu tsose. 11 Kwaapfila ghamalaghitso ghaniwalaghitsa leloli si makomu ng'ani kuna mwemwe baye, wala ng'aghali kutali ng'ani baye na mwemwe. 12 Ng'aghali kulanga baye mbaka mlonge, ‘Yuhi yatsodina kulanga yatughalile, ili tughahulike na kughakinda?’ 13 Wala ng'aghali kumwambu mwa ibahali baye, mbaka mlonge, ‘Yuhi yatsoloka kumwambu yatughalile twetwe ili tughahulike na tughakinde?’ 14 Lekeni ghamalaghitso ghahabehi na mwemwe ghendo, ghamumlomo mwenu na mmoyo mwenu ili mdahe kughakinda.

15 "Mlole, leloli nowabama msaghule ghanoghile au ghehile, ugima au ukufa. 16 Kwaapfila nowalaghitsa leloli mumkunde IMNDEWA, Imulungu wenu, mtende aghala ghayobama, mkinde imiko yake yose, amri na ghamalaghitso ghake ghose, mtsokala wagima na kongetseka, na IMNDEWA wenu katsowatenda mweme mbalikighwe mna isi yamghenda kuisola iwe yenu. 17 Lekeni ka ghumoyo ghwako ghoghalambuka, gholema kumtegheletsa yeye, na ghokweghighwa kutambikila milungu ingi na kuitumikila, 18 leloli nowalongelani ghendo mtsokomighwa. Ng'amtsokala baye matsuwa mengi mna isi yamloka kughenda kuisola iwe yenu, kumwambu mwa ghumto Yoridani. 19 Leloli aino nokema lilanga lyone na isi yone pfaniwabama mwemwe msaghule, ughima au ukufa, ukubalikighwa au ukulighitwa. Lelo msaghule ughima ili mwemwe na watsukulu wenu muwe wagima. 20 Mkundeni IMNDEWA Imulungu wenu, mtegheletseni yeye, mumkindilise yeye. Kwaapfila Imulungu yuyo yana ugima wenu, naye katsomwikani mkale miyaka mingi mna isi iyelahile kuweng'a wahenga wenu, Abrahamu, Isaka na Yakobu."