1 Ung'amwona ing'ombe au ing'olo wa Mwisiraeli miyagho kakwagha, uleke kumleka yaghe, umuyitse kwa ndughu yako. 2 Lekeni ka ukaye kwa ndughu yako kutali au ng'aumanyile baye wa nani, umsole uke naye ukaye yako, na yakale kuko mbaka imwenyegho hayatsakutsa kumbama, naghwe umuyitsile. 3 Utende pfipfo ka ndughu yako kaghisa ipunda wake au ghwanda lyake au chinu chochose ichili chake, uleke kuleka kumwapfila.

4 "Ung'amwona ichihongwe au ing'ombe wa ndughu yako kaghwa mnzila, uleke kwibalaghutsa ka ng'umwonile baye, umwapfile ing'ombe wa miyagho yenuke."

5 "Ipinga yaleke kupfala maghwanda gha iwamale, na immale yaleke kupfala maghwanda ghe wapinga, kwaapfila IMNDEWA, Imulungu wenu komuhila imunu iyotenda apfo."

6 "Ung'achona chibali cha chideghe mna mbiki au hasi mnzila, na ichideghe ayo kawasila iwanaghe au mapfinga ghake, uleke kumsola ichideghe ayo. 7 Uwasole iwanaghe lekeni umleke ichideghe ayo yoke. Ung'atenda apfo kutsobweda na kutsokala muisi matsuwa mengi."

8 "Hautsenga ng'anda ingi, wike kingamitsi ahala hauhaghala ili imunu yang'aghwa na ukufa uleke kwoneka ka yumuhonzile ghweghwe."

9 "Uleke kuhanda mbeghu tsiingi mna ghumghunda ghwako ghwa mitsabibu, ung'atenda apfo, tsinzabibu tsako hamwe na ghamatunda gha tsimbeghu tsingi pfitsakuwa pfiha hambele ha IMNDEWA."

10 "Uleke kuwaleka ing'ombe na ichihongwe walime aku wokwegha ghembe limwe."

11 "Uleke kupfala maghwanda ighafumighwe kwa imighala ya ng'olo hamwe na nyutsi nzelu tsinoghile."

12 "Wohe ipfifundo pfa nyutsi mna tsimembe nne tsa ghamaghwanda ghako."

13 "Mmale yang'akwela ipinga, na kukala naye kuya hambele kobama kumleka, 14 na kombangitsila ka katenda pfinu pfa chinyala na kumwing'a taghwa lihile kolonga, ‘Nimkwela ipinga ayuno, lekeni haniwasile naye, nene sonile baye ka tsakana bikila.’ "

15 "Kuya aba na mai we pinga ayo wasole ligholole lyayawasile ililangusa ka imwana wawo tsakana bikila, kuya walighale kwe iwabala wa ghumji aghwo. 16 Aba wake ipinga ayo yawalongele iwabala awo apfino, ‘Nimwing'a imwanangu munu ayuno yamkwele, lekeni sambi komlema.’ 17 Mlole kambangitsila maghomba gha chinyala mwanangu, kalonga, ‘Somwonile baye ka bikila.’ Lekeni ligholole ililangusa ka mwanangu ka bikila alino ahano."

"Kuya waligholose ligholole alyo hambele ha iwabala awo, 18 na iwabala awo wamsole imunu ayo na wamtowe. 19 Wamtotse imunu ayo pfihande pfa fetsa miya imwe, na litobole alyo yeng'ighwe aba wa ipinga ayo, kwaapfila immale ayo kamghuma chinyala imwali wa Isiraeli, na katsoghendelela kuwa mwehe wake, naye ng'atsomleka baye matsuwa ghake ghose ghayokala. 20 Lekeni ka maghomba ghayalongile gholongesa, na ubikila wake ng'awoneke baye, 21 wamsole na wamghale hana ghumlango ghwa ing'anda ya aba wake, na iwamale iwokala mna ghumji aghwo wamtowe na mabwe mbaka yafe. Kwaapfila katenda chinu cha chinyala mna isi ya Isiraeli kwa kuwasa na wamale aku yang'ali yokala ukaye kwa aba wake. Apfi pfipfo pfamtsoghatenda ighehile agho ghamale mna mwemwe."

22 "Imunu yang'aghoghighwa ughoni na mwehe wa munu yungi, wose weli immale na ipinga, wobamighwa wakomighwe. Mng'atenda apfo ghehile ghatsomala mna isi ya Isiraeli."

23 "Ka Immale ketingana na pinga mna ghumji, ipinga iyalapfighwe tsengele ne munu yungi naye kawasa naye, 24 muwasole wose weli mbaka kuna lilango lya ghumji aghwo, muwatowe na mabwe mbaka wafe. Kwaapfila ipinga ayo tsa kambululu na ng'akemelele yapfilighwe baye, na immale ayo kwaapfila kawasa na imwehe wa munu yungi. Mng'atenda apfo ghehile ghatsomala mna mwemwe. 25 Lekeni ka immale ketingana na pinga iyalapfighwe tsengele, kamghogha na kuwasa naye kwa ngupfu, immale yaliyeka yeye iyobamighwa kukomighwa. 26 Mleke kutenda chinu chochose kwe ipinga ayo, yeye kahela totso ilimtenda yakomighwe. Ghomba lino lyeghala na lighomba alila lye munu iyamtowile miyaghe na kumkoma. 27 Immale kamghogha ipinga ayo ako kunyika na kawasa naye, ne pinga ayo kakemelele yapfilighwe, lekeni tsakuduhu munu iyamwapfile. 28 Immale yang'etingana na pinga, naye ng'ana yalapfilighwe tsengele baye, na komghogha na kuwasa naye kwa ngupfu, nawo woneka, 29 immale ayo yamlihe aba wake ipinga ayo pfihande hamsini pfa fetsa, naye yamkwele kwaapfila kamnanahitsa yawase naye, na ng'odaha baye kumleka matsuwa ghake ghose. 30 Mmale wowose yaleke kuwasa na wehe wa aba wake, yang'atenda apfo komghuma chinyala aba wake."