1 "Musa kaghendelela kulonga, ‘Ka iwanu weli wesonga, waghale ghomba lyawo kune libalatsa wakalamle walamulitsi, ako yumwe yang'oneka kahela totso, na miyaghe yang'ahighighwa, 2 ka ayula iyahighighwe kobamighwa yafapulighwe, imlamtsi yamlaghitse yafuname hasi na yamfapule, na ipfiboko apfo pfighale na litotso lyayatendile. 3 Lekeni kodaha kumfapula pfiboko alubaini. Yang'atowighwa kubita apfo, mwomghuma chinyala miyenu.’ "

4 "Mleke kumwoha chibang'wa ing'ombe ahala hayotowa uhemba."

5 "Ka ndughu weli wokala hamwe, na yumwe yang'afa bila kuleka mwana mmale, imwehe wake yaleke kukwelighwa kungi. Ndughu we munu yafile kobamighwa yamsole ipinga ayo na yamkwele. 6 Imwana mmale wa kwanza iyatsomweleka katsopetighwa wa ayula iyafile ili taghwa lyake lileke kuhupa mna isi ya Isiraeli. 7 Lekeni ka imunu ng'obama baye kumkwela ipinga wa ndugu yake iyafile, ipinga ayo yawaghendele iwakulu we ghumji na yawalongele, ‘Ndughu we mmale wangu iyafile kolema kughendeletsa taghwa lya ndughu yake mna isi ya Isiraeli, kolema ukunikwela nene ili nene nimwelekele ndughu yake imwana mmale.’ 8 Kuya iwakulu we ghumji wamkeme na walonge naye, ka koghendelela kulema na kolonga nene simkwela baye, 9 ipinga ayo yamseghelele hambele ha iwakulu, na yamtsule likwabatsa lyake limwe na yamtemele ghamate mchihanga na yalonge, ‘Apfi pfipfo pfayotendighwa immale iyolema kughendeletsa litaghwa lya ndughu yake.’ 10 Ikaye ya imunu ayo itsomanyika ka ‘Ikaye ya immale iyatsulighwe likwabatsa.’ "

11 "Wamale weli wang'etowa, na mwehe wa yumwe wawo yang'atsa kumwapfila immale wake kwa kumkinda kuisi immale iyetowa na immale wake ili yamwapfile immale wake, 12 umghane ghumoko ghwake ipinga ayo wala uleke kumwonela libatsi."

13 "Mleke kuwa na mabwe meli gha ukupimila, limwe bewe na lingi tito. 14 Mleke kuwa na pfipimo pfili mng'anda mwenu, chimwe chikulu na chingi chidodo. 15 Muwe na pfipimo pfinoghile na pfigholoke, ili mkale matsuwa mengi mna isi iyomwing'ani IMNDEWA Imulungu wenu. 16 Kwaapfila IMNDEWA, Imulungu wenu komuhila imunu iyotenda agho ghose, na wose iwoghutsuka."

17 "Mkumbuke achila chawawatendele Waamaleki hamng'ali mwa mnzila mwakuka kulawa Misiri. 18 Hamwipfile na kutsilika, wawo wetingana namwe mnzila, wawatowa wose iiwakalile kuchughu awala iwepfile ghendo. Waamaleki ng'awampfukile ghendo baye Imulungu. 19 IMNDEWA, Imulungu wenu hayatsowatenda mbwihile kulawa kwa awala wose iwowahila, iwali habehi namwe, mna isi iyomwing'ani iwe yenu, muwakome ghendo Wamaleki wose wahupe, alyo mleke kwisemwa."