1 "IMNDEWA, Imulungu wenu hayatsowakoma iwanu iwokala mna isi iyomwing'ani, namwe hamtsowaboka na kukala mna imiji yawo na mna tsing'anda tsawo, 2 mbaghule miji midatu ikale haghati ghati mwe isi iyomwing'ani IMNDEWA, Imulungu wenu iwe yenu. 3 Mlime tsinzila itsipfika ako, muighole mala ndatu isi iyomwing'ani IMNDEWA, Imulungu wenu iwe yenu, ili munu wowose iyomkoma imunu ghila yadahe kutsumila mna mji ghumwe mna imiji ayo midatu. 4 Imunu yang'amkoma miyaghe ghila, naye tsa ng'amwihile baye, ayo kobamighwa yatsumile ako ili yahone. 5 Tulonge, imunu yang'aghenda na miyaghe kumuhulo kughana tsingodi, na hayoghana lughodi ihoya isomoka na imlagha miyaghe na kumkoma, imunu ayo kobamighwa yatsumile mna imiji ino, ili yahone, yawe mghima. 6 Ka kuna ghumji ghumwe ighuli na utali mkulu kulawa kumuhulo mbaka ako, na indughu we munu iyakomighwe kona maya, na komuwinza yamkome ka ng'obamighwa baye yafe, kwaapfila ng'awang'ali wehila baye. 7 Apfo lelo nowalaghitsa muibaghule imiji midatu."

8 "Ka IMNDEWA, Imulungu wenu kakongetsa ukulu we isi yenu, ka pfayelahile kwe iwahenga wenu, naye kaweng'a isi yose iyalongile koweng'a iwahenga wenu, 9 namwe mng'aghakinda ghamalaghitso ghose ghaniwalaghitsa leloli, na kumkunda IMNDEWA, Imulungu wenu, na kutenda ghose ghayobama, aho mbaghule keli miji midatu ingi. 10 Mbaghule imiji ayo midatu ili iwanu iwakomile ghila waleke kukomighwa mna isi yenu iyomwing'ani IMNDEWA, Imulungu wenu iwe yenu, hela mtsakwoneka mmwagha idamu hela kwa ukukomighwa kwe wanu awo."

11 "Lekeni ka imunu komwihila miyaghe, komwembela na kumkoma, kuya kotsumila mna imiji ino, 12 pfilongotsi wa ghumji ghwe munu ayo watume wanu wakamghoghe na wamuyitse kwa indughu we munu iyakomighwe, iyobama kuliha chisasi, naye yamkome. 13 Mleke kumwonela libatsi, ili ukuwakoma iwanu iwalihela matotso kumale mna isi ya Isiraeli, mng'atenda apfo mtsokala tseghamba."

14 "Aho hamtsakwingila mna isi iyomwing'ani IMNDEWA, Imulungu wenu iwe yenu mleke kuseghetsa libwe lya ghumbaka ghwa miyagho ilikighwe tangia ghumwande ne iwahenga wenu."

15 "Mleke kumuhigha imunu yatotsile kwa ukalangama wa imunu yumwe yaliyeka, wanu weli iwonile walonge ka munu katotsa. 16 Imunu yang'aghetsa kumlapfila maghomba gha ughutsu miyaghe, 17 iwanu weli wesongile watsakwima hambele ha IMNDEWA na hambele ha iwatambika na walamtsi iwali baho, iwosang'ana mna ghamatsuwa agho. 18 Walamtsi waghutse ghutse mna lighomba alyo na ka munu yumwe iyonile chilawile kolonga ughutsu, na kombangitsila maghomba miyaghe kwa ughutsu, 19 naye mumtendele ka pfayabamile kumtendela ndughu yake. Apfo pfipfo pfamtsotenda ighehile ghamale mna mwemwe. 20 Iwanu iwakalile hawatsohulika agho watsopfuka, na agho ighehile ng'aghatsotendeka keli baye mna mwemwe. 21 Mleke kuwonela libatsi wanu ka awo, ughima kwa ughima, nenge kwa nenge, tsino kwa tsino, mwoko kwa mwoko na mghulu kwa mghulu."