1 "Haghamalile matsuwa aghala IMNDEWA kanongela, ‘Usongole mabamba meli gha ghamabwe ka aghala ghanongole kusongola, na lisanduku lya mbau, kuya utse kuna nene aku kuchidunda. 2 Na nene nitsakwandika mna ghamabamba agho ghamalonga aghala ghanongole ukwandika mna ghamabamba aghala ighalongole, ghaughabenile. Kuya mgheke mna lisanduku alyo.’ "

3 "Apfo nitengenetsa lisanduku lya mbiki ghwa mshita, nisongola ghamabamba meli ghe ghamabwe ka aghala gha mwanduso, na nigheluka kuchidunda aku ng'inda ghamabamba agho mmoko mwangu. 4 Kuya IMNDEWA kandika mna ghamabamba agho meli ghamalonga ka aghala ghayalongole ukwandika, malaghitso aghala kumi ghayawalongele akula kuchidunda, kulawa mmoto, mna litsuwa lya ghumtingano, kuya IMNDEWA kangaya nene ghamabamba agho. 5 Nihunduka, nihulumka kuchidunda, nyika ghamabamba agho meli mna lisanduku lyanitengenetse, ka IMNDEWA pfayanongele, na mbaka sambi ghamumo mna lisanduku alyo ka IMNDEWA pfayanilaghitse."

6 "(Waisiraeli tsawanga kulawa mna pfisima pfa Wayakani mbaka Mosera. Kuko Aruni tsakafa na katsikighwa kuko, Eliazali imwanaghe, kasola ing'onde yake na kawa mtambika. 7 Kulawa kuko, waghenda mbaka wapfika Gudigoda, walawa Gudigoda waghenda Yotibata, isi ayo ina pfikolongo pfingi pfe ghamatsi. 8 Matsuwa agho IMNDEWA kawasaghula iwanu wa likabila lya Lawi, wadute lisanduku alyo lye lilaghano lye IMNDEWA, na wakeme hambele ha IMNDEWA, wamsang'anile, na wawabaliki iwanu kwa taghwa lyake, ka pfowotenda leloli. 9 Apfo pfipfo pfapfili kwa iwanu wa likabila lya Lawi, wawo ng'awabokele baye isi yoyose ila iwe yawo ka ndughu tsawo pfawabokele, lekeni wawo wabokela ing'onde ya kuwa iwatambika we IMNDEWA, ka apfila IMNDEWA pfayawalongele.)"

10 "Ng'ala kuchidunda matsuwa alubaini, chilo na misi, ka pfanongole kutenda, naye IMNDEWA kanitegheletsa keli, naye katoghola na ng'abamile baye kuwakoma. 11 Kuya kanongela, ‘Uke uwalongotse iwanu mna ghumwanza ghokwingila mna isi yanilahile kuweng'a iwahenga wawo.’ "

12 "Lelo, mwemwe Waisiraeli, angu sambi IMNDEWA, Imulungu wenu yobama choni kuna mwemwe? Yeye kowabama mwemwe mumpfuke, mwange mna tsinzila tsake tsose, mumkunde, mumsang'anile yeye kwa ghumoyo ghwenu ghose, na kwa ghumuhe ghwenu ghwose, 13 na mghakinde ghamalaghitso ghake na imiko yake yose yanimwing'ani leloli ili mwemwe mbwede. 14 Mlole, lilanga kwose kwa IMNDEWA, Imulungu wenu, na isi na chila chinu ichili mumo pfakwake. 15 Kuya IMNDEWA wenu tsakawakunda sideke iwahenga wenu, mbaka kamsaghulani mwemwe, imli watsukulu wawo, muwe wanu wake kubita wanu wangi, ka pfaili leloli. 16 Apfo tangiya sambi mumtegheletse IMNDEWA, mleke kuwa wasughu. 17 Kwaapfila IMNDEWA, Imulungu wenu ka Imulungu wa milungu, na ka IMNDEWA wa iwandewa. Yeye ka Imulungu mkulu na yane ngupfu, na wa kupfukighwa. Yeye ng'alolagha chihanga cha munu baye wala ng'obokela hongo baye. 18 Kowonela libatsi iwachuwa na ipfitsuka, naye kowakunda iwagheni na koweng'a ichijo na ghamaghwanda. 19 Apfo namwe muwakunde iwagheni, kwaapfila mwemwe namwe pfipfila tsamkala wagheni akula Misiri. 20 Mumpfuke IMNDEWA, Imulungu wenu na mumsang'anile yeye. Mumnanahile yeye na mwilahe kwa litaghwa lyake. 21 Yeye yuyo utunitso wenu, na yeye yuyo Imulungu wenu, iyawatendele pfinu pfikulu na pfakukangawatsa pfamonile kwa nenge tsenu wenyegho. 22 Iwahenga wenu iwaghendile Misiri tsa wa sabini, na sambi IMNDEWA, Imulungu wenu kawongetsa, na wawa wengi ka tsinondo itsili kulanga."