1 Musa kaghendelela kulonga, "Hampfika mna isi iyomwing'ani IMNDEWA, Imulungu wenu iwe yenu na kukala mumo, 2 msole chamlimbula kulawa ipfijo pfenu pfose mna isi iyomwing'ani IMNDEWA, Imulungu wenu, mwike pfijo apfo mna ichiseghe. Kuya mghende hanu hayahasaghule IMNDEWA, Imulungu wenu hawe hakaye yake. 3 Ughende kwa mtambika iyosang'ana mna matsuwa agho, na umlongele, ‘Leloli notoghola hambele ha IMNDEWA Imulungu wako, nyingila mna isi iyelahile Imulungu kwa iwahenga wetu ka katsotwing'a twetwe.’ 4 Imtambika yasole ichiseghe ichili mmoko mwako, na yeke hasi hana imatsabahu ya IMNDEWA, Imulungu wenu. 5 Naghwe ulonge apfino hambele ha IMNDEWA, Imulungu wako, ‘Aba wangu tsa Mwalami tsakanga akuno na akuno, kahulumka Misiri kakala kuko, yeye na wayaghe tsa wachidogho, kuko wongetseka wawa wengi, wane ngupfu. 6 Lekeni Wamisiri tsawatutendela pfihile, watudununza na watunanahitsa kusang'ana ng'onde ng'omu ka watumwa. 7 Kuya tumlilila IMNDEWA, Imulungu we iwahenga tsetu, na Imulungu katuhulika na kwona maghayo ghetu, na ng'onde ng'omu na pfatwonelighwe. 8 Apfo Imulungu katulapfa ako Misiri kwa ghumoko ghwake ghuna ingupfu na kwa ghumoko ghwake ighugholoke, kwa ipfihulo, na kwa pfinu pfa kukangawatsa, na pfa kughuma wogha. 9 Naye katughala hanu hano na katwing'a isi ino, inoghile kwa ukulima na ukufughila. 10 Na sambi nokughalila pfijo pfanyanzile kulimbula mna isi yaungaile.’

"Kuya utseghetse ichiseghe acho hambele ha IMNDEWA, Imulungu wako, winame na umtamanile hambele hake. 11 Naghwe kutsodeng'elela aghala ghose ghanoghile ghakwing'ile IMNDEWA, Imulungu wako, kakwing'a ghweghwe na wanu wa akaye yako, na mdeng'elele hamwe na Walawi na wagheni wamkala nawo.

12 "Chila ghumwaka ghwa kadatu ulapfe lifungu lya kumi lye pfijo pfenu kwa Walawi, kwa iwagheni, na kwa iwachuwa, na ipfitsuka, ili nawo wadahe kuja chijo chose chawobama hawokala mmakaye mwenu. 13 Kuya ulonge pfino hambele ha IMNDEWA, Imulungu wako, ‘Ndapfa izaka ienzeluke kulawa mkaye yangu na niweng'a Iwalawi, na iwahenza, iwachuwa na ipfitsuka ka apfila pfaunilaghitse. Silekile baye kukinda wala kwisemwa laghitso lyako lyolyose. 14 Sijile baye izaka ahala hanikalile na chililo, na silibaghule baye ahala hanikalile nyiha hambele ha IMNDEWA, wala silapfile kwa iwanu iwafile baye. Nimtegheletsa IMNDEWA, Imulungu wangu, nitenda chila chinu chayanilaghitse. 15 Ulole hasi kulawa kulanga, hanu hako haenzeluke, uwabaliki iwanu wako wa Isiraeli na isi yautwing'ile ka pfawilahile kwe iwahenga wetu, isi inoghile kwa ukulima na ukufughila.’ "

16 "Leloli ino, IMNDEWA, Imulungu wenu kowalaghitsa kuikinda imiko ino na malaghitso ghano, mghatende kwa ghumoyo ghwenu ghwose. 17 Leloli ino mwemwe mtoghola ghendo ka IMNDEWA yeye Imulungu wenu na mtoghola ukwanga mna tsinzila tsake tsose, na kukinda imiko yake, na malaghitso ghake ghose, namwe mtsotenda chochose chayowalongela. 18 Na leloli IMNDEWA, Imulungu wenu kawatoghola muwe wanu wake ghendo imsaghulighwe ka pfayalongile katsotenda, namwe mwobamighwa mghakinde malaghitso ghake ghose. 19 Mng'atenda apfo, yeye katsowatenda mwemwe muwe wanu wakulu kubita wanu wa isi tsingi wayawaumbile, na iwanu watsowatunya, watsowategheletsa na mtsomanyika. Namwe mtsakuwa wanu wake iwenzeluke, ka apfila pfayalongile."