1 "Musa kaghendelela ukulonga, Mng'amtegheletsa IMNDEWA, Imulungu wenu na kughakinda pfinoghile malaghitso ghake ghanimwing'ani leloli, yeye katsowatenda mwemwe muwe wakulu kubita wanu wose wali muisi."

2 Mng'amtegheletsa IMNDEWA, Imulungu wenu, mtsobalikiighwa mna ipfinu apfino.

3 "IMNDEWA katsoibaliki imiji yenu na imighunda yenu."

4 "IMNDEWA katsowabaliki muwe na wana wengi, mtsopfuna pfijo pfingi, na mtsakuwa na ng'ombe na ng'olo wengi."

5 "IMNDEWA katsobaliki ipfiseghe pfenu pfitsomema ipfijo na ipfiya pfenu pfamkwambikila napfo pfitsomema ipfijo."

6 "IMNDEWA katsobaliki hamkuya ukaye na hamlawa kunze."

7 "Iwowehila wang'abama kwitowa na mwemwe, IMNDEWA wenu katsomwapfilani muwatowe. Watsakutsa kwa nzila imwe, lekeni watsotsumila nzila saba. 8 IMNDEWA, Imulungu wenu katsowatenda mbalikighwe mna tsing'onde tsenu tsamsang'ana na kumemesa kano tsenu, naye katsowatenda mbalikighwe mna isi iyomwing'ani."

9 "IMNDEWA, Imulungu wenu katsowatenda mwemwe muwe wanu wake iwenzeluke ka pfayelaghane namwe, mng'akinda ghamalaghitso ghake ghose na mng'awinza nzila tsake tsose."

10 Kuya iwanu wose wali muisi watsakona ghendo ka mwemwe msaghulighwa na IMNDEWA, ili muwe wanu wake imwenyegho, nawo watsowapfukani. 11 IMNDEWA katsowatenda mbalikigghwe ghendo, katsoweng'a wana wengi na mifugho mingi na pfijo pfingi mna isi iyelahile kwe iwahenga wenu kuweng'ani. 12 IMNDEWA katsopfughula ikano yake inoghile ili kulanga, naye katsoghala mvula itowe muisi mna ghumsimu ghwake, na katsobaliki chila ng'onde ya ghamoko ghenu. Mtsowatsima iwanu wa isi tsingi, lekeni mwemwe ng'amtsakwatsima baye. 13 Mwemwe mtsakuwa litwi wala ng'amtsakuwa mkila baye, mng'ategheletsa pfinoghile ghamalaghitso ghose ghanimwing'ani leloli na kughatenda, mwemwe mtsakuwa kuchanya na si hasi baye. 14 Mleke kuhunduka akuno wala akula mna ukughakinda ghamalaghitso ghanimwingani leloli, na wala mleke kuwinza milungu ingi na kuitumikila.

15 Lekeni ka mwolema kumtegheletsa Imulungu na mwoleka kukinda ghamalaghitso ghake na imiko yake yose yanimwing'ani leloli, malighito ghano ghose ghatsakuwa ghenu. 16 Kaye tsenu tsitsolighitighwa na mighunda yenu nayo itsolighitighwa. 17 Pfiseghe pfenu pfitsolighitighwa na pfiya pfenu pfamkwambikila pfitsolighitighwa.

18 Wana wenu watsolighitighwa na pfijo pfenu pfili muisi na mifugho yenu itsolighitighwa ileke kwongetseka. 19 Mtsolighitighwa hamkwingila na hamlawa kunze. 20 Ka mwotenda ighehile na mwomleka IMNDEWA, yeye katsowaghalila malighito, na kuwatenda muwelukeweluke, na mghanzike mna chila chinu chamtenda mbaka mwemwe mkomighwe ghendo. 21 IMNDEWA katsowaghalila matamu mbaka wose mkomighwe mna isi yamghenda kuisola iwe yenu. 22 IMNDEWA katsowaghalila utamu mkulu, lihoma, mapute, lijoto ililakatsa, kutsolawila chiyangayanga, na nyahemu, likungugu, agho ghatsowalawila mwemwe mbaka mhupe. 23 Kulanga kutsakuwa ka ishaba nitu, na muisi kutsakuwa ka chuma. 24 IMNDEWA katsotenda litimbwisi na msanga ghuwe mvula yenu, nalyo litsolawa mlanga na litsowatowa mbaka mwemwe mkomighwe. 25 IMNDEWA wenu katsowatenda mwemwe mtowighwe na iwanu iwowahila, mtsowaghendela kwa nzila imwe lekeni mtsotsumila nzila saba, na iwanu wose iwali muisi watsopfuka hawatsakona achila ichiwalawile. 26 Hamtsakufa ng'uli tsenu tsitsakuwa chijo kwa pfideghe iwali mlanga na chijo kwa wanyama iwali muisi, na kutsakuwa kuduhu munu wa kuwawinga. 27 IMNDEWA katsowaghalila mapute ighopwita, ka aghala ighawawapatile Wamisiri, na mtsakuwa na pfilonda na pfibuhu ipfikwawa, namwe ng'amtsohona baye. 28 IMNDEWA katsowadununza kwa kuwatenda muwe na lukwale na muwe pfifita na muweluke. 29 Nemisi mtsoghenda kwa kubumbulitsa bumbulitsa ka munu chifita wala inzila ng'amtsoyona baye na ng'amtsobweda baye kwa chochose chila chamtenda, mtsobunzighwa na kubokighwa na kutsakuwa kuduhu munu wa ukumwapfilani. 30 Mtsowalapfila tsengele wapinga, lekeni wanu wangi watsowasa nawo. Mtsotsenga tsing'anda lekeni watsokala wanu wangi, mtsohanda tsinzabibu, lekeni ng'amtsakuja baye ghamatunda ghake. 31 Wang'ombe wenu watsochinjighwa aku mwolola kwa tsinenge tsenu, lekeni ng'amtsakuja baye inyama yawo, mtsobokighwa pfihongwe wenu aku mwemwe mwolola kwa tsinenge tsenu, lekeni ng'awatsowoyitsa baye. Wang'olo wenu watsoweng'a iwanu iwowehila, na kutsakuwa kuduhu munu wa kumwapfilani. 32 Wana wenu wapinga na wamale watsosolighwa na wanu wangi wakawe watumwa aku mwemwe mwolola. Matsuwa ghose mtsotsodola tsinenge tsenu, na chila tsuwa mtsowalangula iwana wenu kubama woye, lekeni ng'amtsakuwa na ngupfu ya ukutenda chochose baye. 33 Iwanu wa isi ing'amuimanyile watsakuja pfijo pfa isi yenu na ipfijo pfamsang'ane kwa ngupfu yenu. Namwe ng'amtsakwambulila chinu chochose baye, na mtsakonelighwa na kughanzika matsuwa ghenu ghose. 34 Mtsakuwa na lukwale kwa aghala ghamkwona kwa tsinenge tsenu wenyegho. 35 IMNDEWA katsowadudunza kwa kuwaghalila mapute mmafindi na mmaghulu, ighatsowatenda mleke kuhona, na ghatsowenela kulawa kwitsayo mbaka kune litwi. 36 IMNDEWA katsowaghala mwemwe na mfalume wenu yamtsomsaghula wenyegho mna isi ila ng'ana mwemwe muimanye baye wala iwahenga wenu. Ako mtsoitumikila milungu ingi ye mibiki na ghamabwe. 37 Iwanu wa isi iyatsowaghala hawatsomwonani watsokangawala, watsowatendela utalatsi na kuwabetsa. 38 Mtsohanda mbeghu nyingi mna mighunda yenu, lekeni mtsobeta chidogho, kwaapfila wanzighe watsakuja. 39 Mtsohanda mitsabibu na kuisambulila, lekeni ng'amtsakuja baye ghamatunda ghake wala kunwa idipfai yake, kwaapfila wang'onyo watsakuja. 40 Mitseituni itsomela chila hanu mna isi yenu, lekeni ng'amtsopata baye mapfuta ghake, kwaapfila mitseituni itsopughutika. 41 Mtsakweleka wana wamale na wapinga lekeni ng'awatsakuwa wenu baye, kwaapfila iwanu watsowaboka na kukuka nawo. 42 Mibiki yenu yose na ipfijo pfenu ipfili kumghunda pfitsakuwa pfa iwanzighe. 43 Iwagheni iwokala muisi mwenu watsakuwa na ngupfu ghendo namwe mtsoghendelela kuwa nyondenyonde. 44 Mtsowatsima lekeni wawo ng'awatsowatsima baye, wawo watsakuwa litwi namwe mtsakuwa mkila 45 Malighito ghano ghose ghatsowapatani mwemwe, ghatsowadununza mbaka mkomighwe, kwaapfila ng'amumtegheletse baye IMNDEWA wenu na kughakinda ghamalaghitso ghake ghose ghayaweng'ile. 46 Kutsolawila pfitango na pfihulo mna mwemwe na watsukulu wenu matsuwa ghose. 47 IMNDEWA tsakawatenda mbalikiighwe kwa chila chinu, lekeni mwemwe ng'amumtumikile baye kwa ghumoyo ghwa kudeng'elela na ghugholoke. 48 Apfo mtsowasang'anila iwanu iwowehila iyatsowatuma IMNDEWA aku mna nzala, mna ng'ilu, mwa chidako, na mhungukighwa na chila chinu. Katsowoha inila ya chuma mna tsisingo tsenu mbaka hayomalitsa kuwakoma. 49 IMNDEWA katsowaghalila wanu wa isi ingi kulawa kutali, ka chitema pfayoghuluka, na ilugha yawolonga ng'amtsoitanga baye. 50 Wanu wane chihanga chine ndita awo ng'awomwalangula baye imbala wala ng'awomwonela baye libatsi imdodo. 51 Watsakuja iwanyama wenu, na ipfijo pfenu ipfili kumghunda mbaka mwemwe mkomighwe, ng'awatsowalekela baye ipfijo, idipfai, mapfuta, iwang'ombe, iwang'olo mbaka mwemwe mkomighwe. 52 Watsoipfingilila imiji yenu yose ili mna isi yenu iyomwing'ani IIMNDEWA, na mibanda yenu yamuitoghole ighwe hasi. 53 Awala iwowehila hawatsoipfingilila imiji yenu na kuwadununza, mwemwe mtsakuwa na nzala mbaka mtsakuja wana wenu wamale na wapinga, awala imuweleke wenyegho, iyaweng'ile IMNDEWA, Imulungu wenu. 54 Hata imunu mwenyepfale na iyalelighwe pfinoghile katsakuwa na nzala sideke mbaka katsomwima inyama ayo indughu yake, au mwehe wake iyomkunda au iwanaghe iwakalile. 55 Naye ng'atsomgholela baye munu wowose mna wawo inyama ye wanaghe iyatsakuja. Ng'atsokala na chinu chochose baye mna matsuwa agho gha kupfingililighwa na kudununzighwa na iwowahila mna imiji yenu. 56 Hata pinga ayula mdekeke na iyadeghete hata yang'ana yakanyaghe hasi kwa tsayo lya mghulu ghwake, katsomwima hata mlume wake iyomkunda na hata imwanaghe immale na ipinga, 57 katsomja hata imwanaghe iyamweleka sambi, na libapo ahala imwana hayakoneka bila immale wake iyomkunda na iwanaghe kumanya. 58 Ka ng'amkinda baye pfinoghile ghamalaghitso ighandikighwe mna ichitabu chino, na ka ng'amlitegheletsa baye na kulitunya litaghwa lya IMNDEWA Imulungu wenu ilighuma wogha, 59 IMNDEWA katsowaghalilani mwemwe na wanenu matamu makulu namwe ng'amtsohona baye, na maghayo makulu ing'aghomala baye. 60 Katsowaghalila keli chila utamu wamng'ali muupfuka akula Misiri, mtsokala nawo matsuwa ghose. 61 Pfipfila IMNDEWA katsowaghalila chila utamu na maghayo ghangi, aghala ng'ana ghandikighwe baye mna ichitabu chino cha malaghitso mbaka muhupe. 62 Hata ka mwemwe mwawengi ka tsinondo itsili kulanga, lekeni mtsokala chidogho, kwaapfila ng'amtegheletse baye chayolonga IMNDEWA, Imulungu wenu. 63 Ka apfila IMNDEWA pfayang'ali yowadeng'elela mwemwe kwa kuwatendela ighanoghile na kuwatenda mwongetseke, pfipfo pfayatsodeng'elela ukuwaghalila ghamaghayo, na ukuwakoma. Namwe mtsohupa mna isi yamkwingila kuisola iwe yenu. 64 Kuya IMNDEWA, katsowapwililisa mna isi tsose, kulawa hane membe imwe ye isi mbaka membe ingi ya isi, na ako mtsoitumikila milungu ingi ye ghamabwe na mibiki, yang'ana mwemwe muimanye baye wala iwahenga wenu. 65 Mna tsiisi atso mtsakuwa kuduhu ukubweda, kuduhu hanu ha kunyagha tsayo lya mghulu ghwako ubwihile, lekeni IMNDEWA katsowenga ghumoyo ghwa kughudema, nenge tsififiya na ghumoyo ighudundadunda. 66 Matsuwa ghose mtsokala aku mwakwalangula kwalangula iwowahila watsowalagha, mtsakwona wogha chilo na misi, na ng'amtsokala tseghamba baye.

67 "Imimoyo yenu itsomema wogha wa chila chinu chamkwona. Nemitondo mtsolonga, ‘Ng'apfu ing'awile nemihe,’ na nemihe mtsolonga, ‘Ng'apfu ing'awile nemitondo,’ " 68 IMNDEWA katsowoitsa keli Misiri kwa melikebu, kwa nzila ila yaniwalongele mleke kwang'a keli. Ako mwitseutsa muwe watumwa kwe wanu iwowahila, lekeni kuduhu munu iyatsowaghula.