1 Kuya tuhunduka, na tughenda kunyika kwa nzila ya Bahali ya Shamu ka IMNDEWA pfayanongele, kwa matsuwa mengi tung'ali tuyungayunga mna isi ya ipfidunda ya Seiri.

2 "Kuya IMNDEWA kanongela, 3 Myungayunga mna isi aino ya ipfidunda kwa matsuwa mengi, lelo sambi mhunduke mghende ubali wa kasikazini. 4 Walaghitse apfino iwanu, ‘Sambi baha mtsakwang'a mna ghumbaka ghwa ndughu tsenu, ilweleko lwa Esau, iwokala mna isi ya Seiri. Wawo watsowapfukani mwemwe, lekeni mwalangitse, 5 mleke kwitowa nawo, kwaapfila sitsoweng'ani baye isi yawo iwe yenu hata hanu chidogho ha ukukanyagha maghulu ghenu, kwaapfila nimwing'a Esau isi ya Seiri iwe yake. 6 Mghule ichijo chamkuja na ghamatsi ghamkunwa kulawa kuna wawo.’

7 "Kwaapfila IMNDEWA, Imulungu wenu, kawabaliki mwemwe kwa chila sang'ano yamtendile kwa ghamoko ghenu. Yeye tsakawalolesa mwemwe akula kunyika hamng'ali mwa mna ghumwanza, na yeye kahamwe na mwemwe kwa miyaka alubaini, namwe ng'amhungukighwe na chinu chochose baye."

8 "Apfo tughendelela na ghumwanza na tuwabita ndughu tsetu, ilweleko lwa Esau iwokala mna isi ya Seiri. Tuhundukila nzila ya Araba, ilawila Elati na Esioni Geberi, tuhunduka na tubita nzila ili mnyika mwa Moabu. 9 Kuya IMNDEWA kanongela, ‘Mleke kuwatsupfa wanu wa Moabu wala kwandusa kwitowa nawo, kwaapfila sitsoweng'a mwemwe baye hata hanu chidogho ya isi yawo. Kwaapfila isi ya Ari niweng'a wana wa Lutu iwe yawo.’"

10 (Aho ghumwande iwanu iwang'ali wokala ako tsa Waemi, awo tsa wana bapfu, na wengi na watali ka wanu wa Anaki. 11 Nawo tsawamanyika ka Warefai ka pfawamanyike Waanaki. Lekeni wanu wa Moabu wowakema Waemi. 12 Na Wahori wang'ali wokala ako Seiri, lekeni watsukulu wa Esau wawawinga, wawakoma, na wakala wao wenyegho muisi, ka pfawatendile Wasiraeli mna isi iyaweng'ile IMNDEWA).

13 "Na IMNDEWA kalonga, ‘Mwinuke, mkaloke chikolongo cha Zeredi ichili mchiwala.’ " Apfo tuloka ichikolongo acho. 14 Tsa ipfosa miyaka salasini na nane tangiya tulawe isi ya Kadeshi Barinea mbaka hatulokile ichikolongo cha Zeredi. Lweleko lwa iwanu wose wa ing'ondo tsawahupa mna indalo, ka apfila IMNDEWA pfayelahile. 15 IMNDEWA tsakaghendelela kuwatsupfa mbaka wose wahupa.

16 Hawafile wose, 17 IMNDEWA kanongela, 18 "Leloli mtsoloka ghumbaka ghwa Moabu kwa kwang'ila Ari. 19 Hamtsopfika habehi na wanu wa Amoni, mleke kuwatsupfa wala kwitowa nawo, kwa apfila sitsoweng'a baye hata hanu chidogho ha isi ya wana wa Amoni iwe yenu. Isi ayo niweng'a watsukulu wa Lutu iwe yawo."

20 Isi ayo nayo ing'ali imanyika ka isi ya wanu wa Refai, kwaapfila Warefai wang'ali wokala ako ghumwande, lekeni Waamoni wowakema Wazamzumi. 21 Wazamzumi tsa wengi, wana ngupfu, na watali ka Waanaki. Lekeni IMNDEWA kawakoma hambele ha Waamoni, iwawabokile isi yawo na ukukala wawo. 22 IMNDEWA katenda ka pfayawatendele wana wa Esau, Waedomu, iwang'ali wokala Seiri, hayawakomile Wahori hambele hawo, nawo wawaboka isi yawo na wakala wawo mna isi ayo mbaka leloli. 23 Pfipfila Waavi, aho ghumwande wang'ali wokala mmbalimbali mwa Ibahari ya Mediteraniya mbaka ghumji ghwa Gaza, Wakafutori iwolawila isi ya Kirete wawakoma nawo wakala mna isi yawo.

24 "Kuya IMNDEWA katulongela, ‘Mke mloke ilwanda lwa Arinoni. Mlole nimwika mmoko mwenu Sihoni, mfalume wa Waamori wa Heshiboni na isi yake, mwanze kuisola isi yake na mumtowe. 25 Kulawa leloli nitsowatenda iwanu wose wali hasi ha lilanga wampfukeni na wone wogha. Na hawatsohulika mbuli tsenu watsoghudema, na kupfuka.’ "

26 "Kuya tsaniwatuma wanu mna inyika ya Kademoti waghenda kwa mfalume Sihoni wa Heshboni, waghale usenga auno iumbama yeye na iwanu wake waleke kwitowa na twetwe." 27 Utuleke twang'e mna isi yako, tulumbilila kuwinza inzila yetu bila kuhunduka kumoso wala kujilo. 28 Utuutsile ichijo chatukuja na ghamatsi ghatukunwa. Lekeni utuleke twang'e muisi mwako, 29 mbaka tuloke ghumto ghwa Yoridani na kwingila mna isi iyotwing'a IMNDEWA, Imulungu wetu. Watsukulu wa Esau, iwokala Seiri na Wamoabu, iwokala Ari, pfipfila watuleka twang'a muisi yawo. 30 Lekeni Sihoni mfalume wa Heshboni katughoma tuleke kwang'a mna isi yake. Kwaapfila IMNDEWA, Imulungu wenu kalitenda litwi lyake na ghumoyo ghwake ghuwe msughu. 31 "IMNDEWA, Imulungu wetu kanongela, ‘Mlole, nimwika mmoko mwenu, mfalume Sihoni na isi yake, lelo mwanduse kumtowa na msole isi yake.’ " 32 Sihoni kalawa na wanu wake katsa kwitowa na twetwe habehi na ghumji ghwa Jahazi. 33 Lekeni IMNDEWA Imulungu wetu kamwika mna ghamwoko ghetu. Tumkoma Sihoni, wanaghe, na wanu wake wose. 34 Bahala tumboka imiji yake yose na kuihinya yose, na tumkoma chila munu, wamale, wapinga na wana wadowado na ng'atumlekile munu wowose baye yawe mgima. 35 Tughogha iwanyama wawo na ipfinu ipfili mna ghumji pfiwe pfetu. 36 IMNDEWA katwapfila kuisola imiji ili mna isi ya Aroeli, na ikalile mmbalimbali mwa lwanda lwa Arinoni na ila ikalile mghati mwe lwanda alyo mbaka Gileadi na kuduhu mji ghwatonile ghuna ngupfu kuna twetwe, IMNDEWA Imulungu tsakatwing'a yose. 37 Lekeni ng'atughendile baye habehi na isi ya Waamoni wala mmbalimbali mwa kolongo lya Yaboki, au mna imiji ili mna isi itsili mpfidunda au hanu hohose ahala hayatughomile IMNDEWA wetu tughende.