1 Musa kaghendelela kuwalongela Waisiraeli wose, 2 "Nene sambi nina miyaka miya imwe na ishilini, nilala na sidaha baye kuwalongotsa mwemwe keli. IMNDEWA kanongela ka nene sitsoloka baye ghumto Yoridani. 3 IMNDEWA, Imulungu wenu imwenyegho katsolongola kuloka kumwambu. Katsowakoma iwanu awo hambele henu, namwe mtsoisola isi yawo iwe yenu. Joshua naye katsowalongotsa hamloka, ka IMNDEWA pfayalongile. 4 Na IMNDEWA, Imulungu wenu katsowatendela achila chayawatendile Sihoni na Ogu, wafalume wa Waamori, iyawakomile hamwe na iwanu wa isi tsawo. 5 IMNDEWA katsomwapfilani ukuwatowa, namwe muwatendele ka pfanimlaghitseni. 6 Msindamale na muwe na ngupfu, mleke kuwapfuka, kwaapfila IMNDEWA, Imulungu wenu koghenda hamwe namwe, ng'atsoleka baye kumwapfilani wala kuwaleka mkale mliyeka." 7 Musa kamkema Yoshua, na kamlongela hambele ha Waisiraeli wose, "Uwe na ngupfu na uwe na ghumoyo, kwaapfila kutsoghenda nawo iwanu awano kuna isi IMNDEWA, Imulungu iyelahile kuweng'a iwahenga wawo iwe yawo. 8 Imulungu mwenyegho katsokulongolela na kuwa hamwe naghwe, ng'atsoleka baye kukwapfila wala kukuleka uliyeka. Uleke kupfuka wala kutenyuka ghumoyo."

9 Apfo Musa kandika ghamalaghitso, kaweng'a iwatambika, iwana wa Lawi, iwadutile lisanduku lya lilaghano lya IMNDEWA, na kaweng'a wapfilongotsi wose wa Isiraeli. 10 Kuya Musa kawalaghitsa kaonga, "Chila haghumala ghumwaka ghwa saba, ghumwaka ghwa kuwalekelela ghamadeni wayenu, matsuwa gha ichihungo cha pfibumbulika, ghasomeni kwa kukemelela ghamaghitso aghano hambele ha Waisiraeli wose waghahulike, 11 aho Waisiraeli hawakutsa hambele ha IMNDEWA Imulungu wao hanu hayohasaghula. 12 Wakemeni hamwe, wamale, wapinga, iwana wenu na iwagheni iwokala mmakaye mwenu, waghategheletse na welangitse ukumpfuka Imulungu wenu na kughakinda ghose ighali mna ghamalaghitso aghano. 13 Kwa ukutenda apfo watsukulu wenu, awala ng'ana waghamanye baye ghamalaghitso aghano, waghategheletse na wamanye ukumpfuka IMNDEWA Imulungu wenu, matsuwa ghose ghawokala mna isi yamloka kughenda kuisola iwe yenu ili kumwambu mwa ghumto Yoridani."

14 IMNDEWA kamlongela Musa, "Matsuwa ghako gha ukufa gha habehi. Mkeme Yoshua, utse naye hana Lihema lya kwitinganila, aho nitsomlaghitsa." Apfo Musa na Yoshua waghenda hana Lihema lya kwitinganila. 15 Kuya IMNDEWA kawalawila hana Lihema mna ingutso ya libingu, na libingu lima hambele ha ghumlango ghwa Lihema. 16 IMNDEWA Imulungu kamlongela Musa, "Ghweghwe kwa habehi kuhupa, iwanu awano watsondeka na watsoghenda kuitambikila milungu ingi ili mna isi yawoighendela kuisola. Watsondeka na kuleka kulikinda lilaghano lyanyikile nawo. 17 Hawatsotenda apfo, nene nitsoghudubuka na kuwaleka waliyeka, nitsofisa ichihanga changu waleke kumbona, nawo watsokomighwa. Ghehile na maghayo ghatsowatsila, na matsuwa agho wetseghutsa, ‘Maghayo ghano ghatutsila ng'ambe kwaapfila Imulungu katuleka tuliyeka?’ 18 Na nene nitsofisa ghendo ichihanga changu matsuwa agho, kwaapfila watenda ghehile na waitambikila milungu ingi."

19 "Lelo wandike wila auno, na uwafunde iwanu wa Isiraeli na uwaleke wembe, ili uwe ukalangama kuna wawo. 20 Hanitsowaghala mna isi inoghile kwa ukulima na ukufugha, isi yanilahile kwa iwahenga wawo ka nitsoweng'a, nawo watsakuja weghute na kuneneha, kuya watsoihundukila milungu ingi na kuitumikila, watsonibetsa na kuleka kukinda laghano lyangu. 21 Ghehile na maghayo haghatsowatsila, wila uno utsakuwa ukalangama ka nene sili hamwe nawo baye, na iwatsukulu wawo ng'awatsousemwa baye wila auno. Hata sambi nene nomanya aghala ghawobama ukutenda hata ng'ana niwaghale mna isi yanilahile ukuweng'a." 22 Apfo Musa kandika wila awo tsuwa lilyo, na kawafunda Waisiraeli ukwimba.

23 IMNDEWA Imulungu kamwing'a laghitso alino Yoshua mwana wa Nuni. "Uwe na ngupfu na ugangamale, kwaapfila kutsowalongotsa Waisiraeli mna isi yanilahile kuweng'a, na nene nitsakuwa hamwe na ghweghwe."

24 Musa hayamalitse kwandika ghamalonga gha ghamalaghitso aghano mna chitabu kulawa hayachanzile mbaka hachitsighile, 25 kawalaghitsa Walawi iwang'ali woliduta Lisanduku lya lilagho lya IIMNDEWA, kawalongela, 26 "Mchisole ichitabu achino cha ghamalaghitso na mchisoghetse habehi na lisanduku lya lilaghano lya IMNDEWA wenu, chikale baho ka ukalangama kuna mwemwe. 27 Kwaapfila nowamanya mwemwe pfamli wasughu na pfamli na chidandali. Ka tsamkala wasughu kumtoghola Imulungu aku nene ning'ali namghima na hamwe namwe, lelo usughu wenu awo utsakuwatse hanitsakufa? 28 Lelo nikemeleni hamwe wanzehe wose wa ghamakabila ghenu na pfilongotsi wenu, nilonge nawo malonga aghano waghahulike, aku lilanga lyakona na isi yakona. 29 Kwaapfila nomanya ghendo hanitsakufa mtsakuwa wanu wehile ghendo na kughaleka aghala ghose ghaniwalaghitse. Mna matsuwa ighakutsa, maghayo ghatsowatsilani, kwaapfila mtsotenda ghehile hambele ha IMNDEWA na mtsomtenda IMNDEWA yawaghudubukile kwa aghala ghamtenda."

30 Naye Musa kalonga ghamalonga ighali mna wila awo mbaka wila wose umala aku Wasiraeli wose wohulikitsa.